Read Yupik Revelation 8 Bible Online

Revelation 8 - Yupik bible

Revelation 8

¹Malrunelgat-llu takarnarqun callarcaku Qusngiyagaam, qilagmi nepaiteqertuq sass'am avekngalkiini.

²Tuani tangrranka an'gilat malrunelgen Agayutem ciuqerrani nangengqalriit, cupu'uryaranek-llu malrunlegnek cikiumaluteng.

³Alla-llu cali an'gilaq taiguq ekuaviim-llu caniani nangerrluni aruviarcuutmek tegumiarluni suulutaamek; cikiumauq-llu aruvagkamek amllermek ellualriit piicautait aruviisqelluki ekuavigmi suulutaami, aqumllerem ciuqerrani.

⁴Aruvagkam-llu aruvii ellualriit piicautait tapeqluki an'gilam tegumiaranek mayurtuq Agayutmun.

⁵Teguluku-llu aruviarcuun an'gilam imiraa kenermek tuaken ekuavigmek nunamun-llu eggluku; kalluk-llu tem'irtuq qastuluni, kenerpallaraaqluni, nuna-llu pekluni.

⁶An'gilat-llu taukut malrunelgen cupu'uryaranek malrunlegnek tegumialriit uptut cupsuumaluki.

⁷Ciuqliim an'gilam cupngaku, maliggluku kavcirtuq cikunek kenermek-llu, augmek avulutek, nunamun-llu egcimauk; nunam-llu ilii qupain pingayuat ekuamauq, napat-llu tuanelnguut ekuamaut, can'get-llu cungagpiit ekuamaut.

⁸An'gilam-llu tunglia cupngan, ingrirpagngalnguq-llu ekualuni imarpigmun egcimauq: imarpiim-llu ilii qupain pingayuak augurtuq;

⁹imarpiim-llu ungungssii tamaanelnguut tuquut, angyat-llu tamaanelnguut piunriumaut.

¹⁰Pingayuat-llu an'gilaq cupngan, agyarpak ekualria qilagmek igtuq, nunam qupiin pingayuatnun kuignun, ulvelrianun-llu mer'mek.

¹¹Tauna agyaq atengqertuq, “Wormwood.” Tamatum-llu mer'a cungarninariuq, yuut-llu amlleret tamaaken melriit tuquut cungarninarian.

¹²An'gilat-llu cetamiit cupngan, akertem pingasuirtellrin iliit agtuumauq, iralum-llu pingasuirtellrin iliit, agyat-llu pingasuirtellrata ilait, tanqiata-llu pingasuirtellrin iliit tan'gerimauq; erenrem-llu pingasuirtellrin iliit tanqigisciigatevkaumauq, unuum-llu pingasuirtellrin iliit tuaten.

¹³Tua-llu kiartua, niillua-llu yaqulegpiim qalriallranek qastuluni pagaani qilagmi tengaullrani, qanerluni, “Nakleng, nakleng, nakleng nunam qaingani uitalriani, allat an'gilat pingayun cupu'uryarat cupkatki!”