Read Yupik Revelation 9 Bible Online

Revelation 9 - Yupik bible

Revelation 9

¹Tallimiit-llu an'gilaq cupngan, tangertua agyamek qilagmek igtellriamek nunamun, ellii-llu cikiumauq petmiim qutailnguum kelucairissuutiinek.

²Ikircaku-llu petmik qutailnguq, aruvagmek anllugtuq tuarpiaq kaminiarpiim aruvii, ella akerta-llu tan'geriuk petmiim aruvianek.

³Tua-llu tuaken aruvagmek petgertayulirpiit an'ut nunamun-llu tull'uteng, taukut-llu piyunarqucimek cikiumaut nunam ciissiatun puukatulitun.

⁴Qanrucimaut-llu agtuusqevkenaki nunam can'gi, cat-llu naulriit, napat-llu, tau͡gaam tamakut yuut Agayutem takarnarqutiinek piilnguut qauramegteggun.

⁵Taukut nangtarkauluki iraluni tallimani, tuqutevkenaki tau͡gaam; nangyutiit-llu puukatulim nangyucillratun ayuquq, yuk puukarqaku.

⁶Ernerni-llu taukuni yuut tuqu yuarciqaat nataqevkenaku-llu; tuquyuumiryaaqeciqut, tuqum-llu qimagciqai.

⁷Tangllermegteggun petgertayulit taukut horse-aatun ayuqut anguyaucaramun upingalriatun; qamiqurritni-llu tuarpiaq nasqerrutet suulutaat; kegginait-llu yuut kegginaicetun ayuqluteng.

⁸Arnartarnek-llu nuyarluteng, keggutait-llu lion-aat keggutaicetun ayuqluteng.

⁹Qeltengqertut-llu tuarpiaq cavigpiit qat'gailitat, yaqruita-llu culu'ugtellrat tuarpiaq ekumassuuterugaat akalrialget horse-aatgun anguyaucartulriit.

¹⁰Taukut-llu pamyungqertut puukatulitun, cukiterluteng, pamyumegteggun-llu piyunarqucingqertut yuut nangtesqelluki tallimani iraluni.

¹¹Ataniumastengqertut-llu petmiim qutailnguum an'gilaanek; tauna Hebrews-aacetun atengqertuq Abaddon, Greek-aacetun-llu aprumaluni Apollyon, “Piunrirista.”

¹²Wani-wa nanikuanaq ciuqliq pellugtuq, tangerrluku, malruk allak cali tut'arkauguk.

¹³Arvinelgat-llu an'gilaq cupngan, erinamek niitua ekuaviim tegumiaqessuutainek cetamanek, Agayutem ciuqerranelngurnek.

¹⁴Qanrulluku an'gilaq arvinelgat cupu'uryaramek tegumialria, “Angiski cetaman an'gilat qillerqumalriit Kuigpagmi Euphrates-aami.”

¹⁵Taukut-llu an'gilat cetaman upingalriit angicimaut, upingaluteng sass'amun, ernermun-llu, iralumun-llu, allrakumun-llu, tuqutarkauluki yuut, nunam qupiin pingayuata yui.

¹⁶Taukut horse-aatgun anguyagtet amllertaut yuinaq tiissitsaat naaqutkenqiggluki qula tiissitsaarqunek: niitellruaqa amllertaciat 200,000,000.

¹⁷Nasvicimallemni horse-aat tangellrenka waten ayuqut: Ugingavikestait qat'gailitangqertut kavircen̄ateng kenertun, qesurcen̄ateng-llu, yellow-aaruluteng-llu quluuratun, horse-aat-llu lion-aartarngalngurnek qamiqurluteng, qanmeggnek-llu kenermek, aruvagmek-llu, quluurmek-llu anllugtut.

¹⁸Makutgun nangteqnarqelriatgun pingayutgun nunam qupain pingayuata yui tuqucimaut kenerkun, aruvagkun-llu, quluurakun-llu taukut qanritnek anelriatgun.

¹⁹Wani-wa taukut horse-aat piningqerrameng qanmegteggun pamyumegteggun-llu; pamyuit ayuqut ciissirpagtun, qamiqurluteng, tamakutgun-llu kilirturilartut.

²⁰Ilait-llu yuut tuqucimanritellriit tamakutgun, nangteqnarqelriatgun umyuarnayagucinritut caliameggnek atullermeggnek, pegcivkenateng-llu agayuyarameggnek anernerrlugnun, agayutnguanun-llu suulutaanun, akingalngurnun, punernernun, teggalqunun, muragnun-llu, wani-wa tangerciigalngurnun, niitesciigalngurnun pektesciigalngurnun-llu.

²¹Umyuarnayagucivkenateng-llu tuqucillermeggnek, tuunrilallermeggnek, akusrarutekillermeggnek, teglellermeggnek-llu.