Read Yupik Ruth 1 Bible Online

Ruth 1 - Yupik bible

Ruth 1

¹Ak'a tamaani, cuqcisten̄ek ciuliqagtengqellratni Israel-aat, angayuqanek angayuqangqelangvailgata, piitnaq tut'ellruuq tamaavet nunamun. Taumek angun, Bethlehem-aarmiu Judah-m nuniini ayagtuq Moab-amun uitaqernaluni tamaani, malikluki nuliani malruk-llu qetunraagni.

²Taum angutem atra Elimelech-aaruluni nulirran-llu atra Naomi-uluni, qetunraagken-llu atkek Mahlon-aaq Chilion-aaq-llu; Ephrathite-auluteng Bethlehem-aarmiunguluteng Judah-melngurmi.

³Tamaann͞ginanermeggni Elimelech-aaq Naomi-m uinga tuquuq, Naomi-llu kiimellirluni qetunraagminek tau͡gaam ilaluni.

⁴Taukuk qetunraak nulirturtuk Moabite-agnek, aipaa aterluni Orpah aipaa-llu Ruth-amek. Allrakut qulngungalnguut kinguatni;

⁵tamarmek Mahlon-aankuk Chilion-aaq-llu tuquuk, Naomi-llu nutaan kiimellirluni uingiucami qetunrairulluni-llu.

⁶Tamatum kinguani Naomi niituq ATANERMUN atawaqercetniluki yun'i naucetaarit nauluaqerluki nauvkalallermikun; tua-i uptuq ayagnaluni Moab-amek ukurraagni maliklukek.

⁷Malikluteng ayagtut Judah-mun uterrnaluteng, tau͡gaam tumemeggni

⁸Naomi-m qanrutak, “Uterrlutek aanatek nayuryarturteki. ATANREM-llu assirlutek aulukekilitek, elpetek tuaten wiinga pillrucirpetegtun, cali-llu au͡gkunun tuqullernun.

⁹ATANREM-llu allanek uingyugngarivkaqilitek uitavigkangniartutek.” Tua-i Naomi-m melugarak tua-ingunrituurlukek. Tau͡gaam taukuk aluviliurlutek

¹⁰qanrutaak, “Qang'a! Maligciiqamegten yugpenun.”

¹¹Naomi-m kiugak, “Paniigmaa, ciin maligcugcetegnga? Umyuartequtek-qaa allanek uikarpetegnek qetunrangnayuklua?

¹²Utertek kingunerpetegnun, wiinga ak'allaurtessiyaagama uingenqiggngaitua. Umyuarteqsaaqeng'e'rma cali tuaten piyugngayuklua, tua-llu-qaa ataku uingekuma qetunranglua-llu,

¹³utaqauryartutek-qaa anglinatkaagnun? Tuaten-llu-qaa pikuma allanek uingesciigaluteksarartek? Qang'a, paniigmaa, nallunritartek tamana caperrnarquq. ATANREM wiinga tunutellruanga, takumcuyukapigcaaqua-llu elpetegnek.”

¹⁴Aluviliurtuk cali taukuk. Orpah-m-llu cakini melugarluku tua-ingunrituurraarluku uterrluni kingunerminun, tau͡gaam Ruth-am unicuumiitaa.

¹⁵Naomi-m tua-i qanrutaa, “Ruth-aaq, arcin utertuq yum'inun agayutminun-llu. Maliggluku kingunerpenun uterten.”

¹⁶Tau͡gaam Ruth-am kiugaa, “Unitesqenrilu wangnun! Maligcugamken. Natmun ayallerpenun wiinga-llu ayagciqua; nani uitakuvet wiinga-llu tuanciiqua. Yut'en yuksaguciiqanka, Agayuten-llu Agayuteksagulluku.

¹⁷Nani-llu tayima tuqukuvet, tuani-llu wiinga tuquciqua, tuani-llu tungmagcimaciqua. ATANREM-llu arcaqanrulria anucimirqecetaarutii wangnun tuskili cam allam tuqum avatiini avceskaten!”

¹⁸Tua-i Naomi-m tangrramiu Ruth-aq taq'ingaitellinian maligcullerminek, qanenqigtenrituq.

¹⁹Tua-i ayagtuk tekitnatkamegnun Bethlehem-aamun. Tekitellragni yuut tamaani qiilertut, arnat-llu qanerluteng, “Una-qaa ilumun Naomi-uguq?”

²⁰Kiuluki qanertuq, “Naomi-mek aterpagtevkenii Marah-mek tau͡gaam aterpagcia,[1] tua-i-wa Artuqailnguum Agayutem unguvaka qatlinarqelriatun ayuqlirivkaaku.

²¹Maaken ayallemni camek nuuqiutaunii ayallruunga, tau͡gaam ATANREM utercetaanga camek piinii. Ciin aterpagtaarciqsecia Naomi-mek Artuqailngurmun ATANERMUN pinarqelriarurcetraarlua tut'elluku-llu nangteqnarqelria wangnun?”

²²Tua-i waten ayuqellruuq Naomi-m utertellra Moab-amek Ruth-amek Moabite-amek ukurraminek maligluni. Tekitellragnek nalliini Bethlehem-aamun quyurciyaraq mukaarkanek barley-nek nutaan ayagnillruuq.