Read Yupik Ruth 4 Bible Online

Ruth 4 - Yupik bible

Ruth 4

¹Boaz-aq ayagtuq quyurtaarviatnun nunat iteryaraatni uitalriamun, aqumluni-llu tuavet. Uitainanrani Elimelech-aam canimenaku tungayii, Boaz-am qanrutkellra, tamaaggun kiturtuq. Boaz-am-llu qayagaurluku, “Tailuten wavet canimnun aqumi.” Taum-llu ullagluku canianun aqumluni.

²Boaz-aq-llu aqvatuq qulnek tuani nunani ciuliqagten̄ek, tuavet-llu cali aqumesqelluki. Aqumumariata,

³qanertuq tungayaminun, “Naomi utercami maavet Moab-amek, tunyugaa nuna tungayamta Elimelech-aam nunautellra,

⁴umyuartequa-llu elpenun man'a nallunritnaqsukluku. Tua-i piyukuvgu kipusgu ukut aqumgalriit angutet takuatni yum'a-llu ciulirnerita takuatni. Tau͡gaam piyuumiilkuvgu qanra, tua-i-wa kiputellerkaan piyunarqucia ciumek elpenun pimauq, nutaan-llu kipucuumiilkuvgu wiinga kipucugngaarkauluku.” Angun tauna qanertuq, “Kipuciiqaqa.”

⁵Boaz-aq-llu qanerluni, “Wangni canrituq, nuna kipuskuvgu Naomi-mek, Ruth-aq tapeqluku kipuciiqan Moabite-aq aipaineq, nuna tauna tuqullrem ilaini uitauraasqelluku.”

⁶Tua-llu angutem kiugaa, “Tuaten ayuqekan nunam kiputellerkaanun piyunarquciqa pegtaqa, nakmiin irniamnun kinguvarngaitellinian. Elpet kipuskiu; wiinga piyuumiirutaqa.”

⁷Tamatum nalliini piciryarangqellruut nunautmek tuniaqameng wall'u navruciaqameng, tun'ilriim aluilitani yuularaa tunluku-llu kiputellriamun. Waten piluteng Israelite-at nasvalaraat tamana tun'illerteng wall'u navrucilteng caqtaarngairucelluku.

⁸Taumek taum angutem qanrucamiu Boaz-aq, “Elpet kipusgu,” aluilitani yuuluku Boaz-amun tunaa.

⁹Tua-i-llu Boaz-am qanrutai ciulirneret allat-llu yuut tuanelnguut, “Elpeci nallunritesten͞guuci unuamek kiputellemnun Naomi-mek cat tamalkuita Elimelech-aam pikellri qetunraagken-llu Chilion-aankuk Mahlon-aaq-llu pikelkek.

¹⁰Tamakunun-llu tapeqluku Ruth-aq Moabite-aq, Mahlon-aam nuliallra, wiinga nuliqsagulluku. Maaggun aklui tuqullrem uitaurararkaurrluteng ilaini, kinguvrin-llu kinguvallrat arulairngaunani yuini nakmiin-llu nuniini. Mat'umun nallunritesten͞guuci unuamek.”

¹¹Taukut-llu ciulirneret allat-llu tuanelnguut qanertut, “Wangkuta nallunritesten͞guukut. ATANREM nulian Rachel-aatun Leah-tun-llu ayuqevkaqiliu, nauwa irnialingevkallrukiik Jacob-aaq. Tukuureskina Ephrath-am yuini niitnaurrluten-llu Bethlehem-aami.”

¹²Mikelnguut ATANREM cikiutekain elpenun uuggun neviarcarkun ilakuralriarucirci ayuqevkaqilitgu ilakuralriaritun Perez-aam, Judah-nkuk Tamar-aq-llu qetunraagnek.

¹³Tua-i Boaz-am Ruth-aq ut'rutaa eneminun nuliqsagulluku. ATANREM-llu atawaqercetaa, qingartuq-llu qetunrangluni-llu.

¹⁴Nunaqliin arnat Naomi qanrutaat, “Nanraumali ATANEQ! Tutgarangevkaraaten tan'gaurlurmek aulukestekarpenek. Tan'gaurluq niitnaureskili Israel-aami!

¹⁵Ukurrarpet kenkaaten, elpenun-llu callra amllenruuq malrunlegni qetunrani. Wani-wa-llu tutgarangevkaraaten tan'gaurlurmek, taum nutaramek yuucimek piciqaaten ak'allaureskuvet-llu aulukciqaaten.”

¹⁶Naomi-m-llu mikelnguq teguamiu manuminun ellia, aulukluku-llu.

¹⁷Nunalgutain arnat tan'gaurluq aciraat Obed-aamek. Yuut-llu tamalkuita qanrulluki, “Naomi irnianguq qetunrangluni!” Obed-aaq ataksagutellrua Jesse-m, Jesse-llu David-aam atakluku.

¹⁸Wani-wa ilakellriit Perez-aamek ayagluteng David-aamun: Perez, Hezron, Ram, Amminadab, Nahshon, Salmon, Boaz, Obed, Jesse, David.