Read Yupik 1 Samuel 11 Bible Online

1 Samuel 11 - Yupik bible

1 Samuel 11

¹Iraluq cipteqerluku Angayuqam Nahash-am Ammon-aarmium ciuliqagtai anguyagten̄i nunarrarmun Jabesh-aamun nunautiini Gilead-aam kassugulluku-llu. Angutain Jabesh-aam qanrutaat Nahash-aq, “Umyuallguteksagulluta qanra, ciuniurniamteggen atanirturteksagulluten.”

²Nahash-aq kiuguq, “Umyuallguteksaguciiqamci waten tau͡gaam piarkaukuma: Ikugciqaqa tamarpeci tallirpilirneq iici kiaresngialirluku-llu tamalkuan Israel-aaq.”

³Ciuliqagtai-llu Jabesh-aam qanertut, “Cikirkut ernernek malrunlegnek ayagceciniartukut qaneryartulrianek qaqilluku nunii Israel-aam. Kia ikayunrilkakut, nutaan wangkutnek tuneniartukut elpenun.”

⁴Kevgat qaneryartulriit tekitut Gibeah-mun, Saul-aam uitavianun, qanemciata-llu, yuut qiangartut ciunerkairulluteng.

⁵Saul-aaq tekicarturluni maramek kuluvautminek maligluni, aptuq-llu, “Qaillun piat? Ciin yuut tamarmeng qiagat?” Qanrutaat kevgat qaneryartulriit Jabesh-aamek egmirtellratnek.

⁶Man'a Saul-aam niicaku, Agayutem anerneran iluiraa, qenertem-llu tull'uku.

⁷Malrugnek kuluviignek tegulluni, kepurak itumllukek, kevganun-llu qaneryartulrianun ayagatelluki tamalkuan nuniinun Israel-aam uumek aarcirtuutmek tapirluku: “Kia imum maligtenrilkunikek Saul-aankuk Samuel-aaq-llu anguyagmun waten pimaciqut kuluvautai!” Yui Israel-aam alingut qaillun ATANREM pillerkaanek, tamarmeng-llu, pinrilqurrunateng, quyurmeng taigut.

⁸Saul-aam quyurtai Bezek-ami: Israel-aamek pilriit yuinaat akimiaq tiissitsaarullruut (300,000). Judah-mek-llu pillret yuinaat qulen tiissitsaat (30,000).

⁹Qanertut kevganun tekitellernun Jabesh-aamek, “Qanruciki yuc'i unuaqu-gguq erneq qukarpailgan anirtuumaciqut.” Yuin Jabesh-aam man'a niicamegteggu, angniqapiartut

¹⁰qanerluteng-llu Nahash-amun, “Unuaqu wangkutnek tunciqukut elpenun, tua-i piyullerpetun piniarpekut, assirngatellrakun.”

¹¹Tuani unugmi Saul-aam yun'i avgai pingasuirrluki, unuayaarmi-llu alqunaq tekiarrluteng inglumeng pelatekarviatnun curukarait Ammonite-at. Erenrem-llu qukallra tekiteqerluku nangluki tuqutait. Tuqutenritellrit-llu sagtut, qimagluteng ellmeggnek anagyaaqulluteng.

¹²Tua-llu yui Israel-aam qanertut Samuel-aamun, “Nauwa taukut yuut qanellret Saul-aaq wangkutnun angayuqauyunaitniluku? Taiciki wangkutnun, tuqutniaput!”

¹³Tau͡gaam Saul-aaq qanertuq, “Yuk atauciunger'mi tuqucimangaituq ernerpak, tua-i-wa mat'umi ernermi ATANREM anirtullruaku Israel-aaq.”

¹⁴Samuel-aam-llu qanrutai, “Gilgal-aamun ayalta tamamta yuut-llu tamalkuita niitelluki qanrutkenqiggluku-llu Saul-aaq wangkutnun angayuqaqsagulluku.”

¹⁵Tamarmeng tua-i ayagtut Gilgal-aamun, tuani-llu tanqilriami uitavigmi nallunairaat yuut tamalkuita nallunrirtelluki Saul-aaq angayuqruniluku. Ekuagiut ilakuyutem elliitainek, Saul-aam-llu yuin-llu tamarmeng Israel-aam angnirpautekaat tuaten pillra.