Read Yupik 1 Samuel 13 Bible Online

1 Samuel 13 - Yupik bible

1 Samuel 13

¹Saul-aaq allrakungellruuq (yuinarmek qulmek cipluku 30) angayuqaurtellermini, angayuqaullruuq-llu Israel-aami (tayima allrakuni yuinaagni malrugnek 40).[8]

²Saul-aaq cucuklirtuq pingayunek tiissitsaanek (3,000) angutnek, elliin malruk tiissitsaak (2,000) nunaqliqlukek Michmash-ami, qemililriami-llu nuniini Bethel-aam, ayagtelluki-llu atauciq tiissitsaaq (1,000) maligtevkarluku qetunrani Jonathan-aaq Gibeah-mun, nuniitnun ilakellriartain Benjamin-aam. Ilait-llu angutet Saul-aam utertelluki kingunritnun.

³Jonathan-aam tuqutaa Philistine-at anguyagtaita atanirturtiit Geba-mi, allat-llu Philistine-at man'a niitaat. Tua-i Saul-aaq ayagceciuq kevganek qayagasqelluki Hebrew-t anguyagmun cupu'uryaraq cupu'urluku tamalkuan sen̄iluku nuniit.

⁴Niitut-llu Israel-aam yui tamarmeng Saul-aamun tuqutniluku Philistine-at atanirturtiit, Philistine-anun-llu cakneq eq'ukniluteng. Yuut tua-i qayagaurun maligtaat pillguciryartuusqelluku Saul-aaq Gilgal-aami.

⁵Philistine-at-llu quyurtut anguyallerkameggnun Israel-aam yui; yuinaq qulmek tiissitsaat (30,000) anguyagcuutet akalrialget ikamrat, arvinelgen-llu tiissitsaat (6,000) horse-aalget anguyagtet, anguyagtet-llu qau͡gyaitun imarpiim cen̄iini amllertalriit. Michmash-amun ayagtut, calaralirneranun Bethaven-aam, tuani-llu qavartarluteng.

⁶Tua-i-llu tukniluteng curugait Israel-aam yui, uuqassugartelluki. Ilait Israel-aam yui iirtut qerranernun ukinernun-llu wall'u teggalqut akulaitnun petmignun elakanun-llu;

⁷ilaita qeraraat Jordan-aaq Kuik nunainun Gad-am Gilead-aam-llu. Saul-aaq cali Gilgal-aamlluni, yuut-llu ilai kakavluteng alingem ugaani.

⁸Utaqa ernerni malrunlegni Samuel-aaq, Samuel-aam alerqullruciatun, tau͡gaam Samuel-aaq cali taiksaituq Gilgal-aamun. Kiituan yuut unitengaat Saul-aaq,

⁹tua-llu elliin qanrutai, “Taiciki wangnun ekualuki elliitekat, ilakuyutem-llu elliitai.” Elliin-llu elliitekai ekuavkarluki,

¹⁰wani-wa-llu taqeqanrakun, Samuel-aaq tekilluni. Saul-aam-llu anluni pairrsaagaa ciuniurluku-llu,

¹¹tau͡gaam Samuel-aaq qanertuq, “Callrusit?” Saul-aaq kiuguq, “Yuut unitengellruatnga, elpet-llu taiksaunak taiciqnillerpeni; tamatum-llu avatiini cali, Philistine-at ama-i quyurrluteng Michmash-ami.

¹²Taumek umyuartequa, ‘Philistine-at curukataraatnga wani Gilgal-aami, wiinga-llu piksaunii qaillun ilukegcivkallerkaanek ATANEQ.’ Taumek umyuarteqellrulrianga elliilua ekuaginalua.”

¹³“Umyugailnguum tau͡gaam piyallratun piuten,” Samuel-aaq kiuguq. “Maligtaqunritan alerquutii ATANREM Agayutvet pisqellra. Maligtaqullrukuvgu, elliin elpenun kinguverpenun-llu ataniurcecaraa tamalkuan Israel-aaq akwanun.

¹⁴Tau͡gaam watua atanirturinriqatartuten. Narurtellruavgu ellii, ATANEQ piyullminek yuarluni ataniurten͞gurcetqatara yum'inun.”

¹⁵Samuel-aaq-llu ayagtuq Gilgal-amek Gibeah-mun Benjamin-aam nuniinelngurmun. Yuut-llu Gilgal-ami uitalriit maligtaat Saul-aaq ullallrani anguyagten̄i. Gilgal-aamek ayagtut Gibeah-mun nunautiinun Benjamin-aam. Saul-aam yuvrirai anguyagten̄i, tiissitsaam avga yuinarnek tallimanek cipluku (600) amllertaciat nuniinlluni.

¹⁶Saul-aaq, Jonathan-aaq-llu qetunrani, anguyagtetek-llu arulairtut Geba-mi nunautiini Benjamin-aam; Philistine-at arulaingqaviat Michmash-amlluni.

¹⁷Philistine-at anguyagtet ayalartut arulaingqavimeggnek uayaariyarturluteng pingasuirrluteng quyungqalriit: atauciin quyungqalriit Ophrah-m tungiinun ayagtut nunautiinelngurmun Shual-am,

¹⁸allat-llu quyungqalriit tungiinun Beth Horon-aam, allat-llu tuiggluteng tungiinun cetrem caumaluku Zeboim-am Kuignayua yuilquq-llu.

¹⁹Caviliurtetaituq Israel-aami Philistine-at murilken͞gatki Hebrew-t nuussirpagnek narulkarcuutnek-llu cakneq pilisqumavkenaki.

²⁰(Israel-aat tua-i ullalarait Philistine-at itumcissuutmeng nuugit, cakicissuuteteng, piqertuutateng, kepliarissuuteteng-llu ipegcaryarturluki;

²¹akiliutii-wa akicuar atauciq piqertuutamek ipegcarikuvet wall'u kapqaqussuutmek, malruk-wa akicuaraak ipegcarikuvet itumcissuutmek cakicessuutmek-llu.)

²²Taumek ernermi anguyautellratni Israel-aam yuin anguyagtai atauciunger'mi piitelallrulriit nuussirpagnek narulkarcuutnek-llu Saul-aankuk tau͡gaam qetunrani-llu Jonathan-aaq pingqerraqlutek.

²³Philistine-at ayagceciut anguyagten̄ek nayuusqelluku Michmash-ami Tevyaraq.