Read Yupik 1 Samuel 15 Bible Online

1 Samuel 15 - Yupik bible

1 Samuel 15

¹Samuel-aaq qanertuq Saul-aamun, “Wiinga wani-wa ATANREM ayagcetellra atawaqercecesqelluten angayuqrurrluten yum'inun Israel-aanun. Kitaki niicugniu ca ATANREM Artuqailnguum qanellra.

²Anucimirqecetaaqatarai Amalek-aam yui ciuliarita inglukellruitki Israel-aam yui Egypt-aamek taillratni.

³Ayagci curugluki-llu Amalek-aam yui piunrinqegcaarluki-llu cait tamalkuita. Carraungraan uitaciiyaqunaci; tamalkuita tuqulluki angutet, arnat, mikelnguut, mikelnguyagaat-llu; kuluviit, qusngit, qulugnelget ungungssit, ciulviit-llu.”

⁴Saul-aam quyurtai anguyagten̄i yuvrirluki-llu Telem-aami: yuinaulliniut qulen tiissitsaat (200,000) anguyagtet Israel-aamek qulen-wa tiissitsaat (10,000) Judah-mek.

⁵Tua-i-llu ellii anguyagten̄i-llu ayagtut Amalek-aam nunarpiinun utaqaluteng-llu alangiilluki curukallerkameggnek kuignayugmi.

⁶Ayagceciuq-llu aarcirtuutmek Kenite-anun yuinun, yuut taukut ciuliarita assirluki ilaliullrukait Israel-aam yui taillratni Egypt-aamek: “Ayagci unilluki Amalekite-at, tapqulluci tuqutenritniamci.” Tua-i Kenite-at ayagtut.

⁷Saul-aam cirlakai Amalek-aam yui, callugluki Havilah-mek ayagluni Shur-aaq tekilluku, calaralirnerani Egypt-aam;

⁸elliin-llu teguaqaa Angayuqaq Agag-aq Amalek-aarmiu unguvaluku tuqulluki-llu yuut tamalkuita.

⁹Tau͡gaam Saul-aam anguyagten̄i-llu uitataat Agag-am unguvii tuqutevkenaki-llu assinqurrait qusngit kuluviit-llu, assinqurrait kuluvayagaat qusngiyagaat-llu, wall'u allat assilriit; kiingan piunrirait atuungailnguut wall'u caungailnguut.

¹⁰ATANEQ qanertuq Samuel-aamun,

¹¹“Pinqigcuumiraunga angayuqrurtellemnek Saul-aaq; wangnek tuigtuq alerquutenka-llu narurrluki.” Samuel-aaq-llu qenertuq, unugpak-llu takumcuca'artuq ATANERMUN.

¹²Unuayaarmi ercan ayagluni kiarcarturaa Saul-aaq. Niituq-llu Saul-aaq ayallruniluku nunarrarmun Carmel-aamun, tuani-llu naucillrulliniuq nallunailkutamek ellminek umyuaqluni, tua-i-llu Gilgal-aamun ayagluni.

¹³Samuel-aam ullagaa Saul-aaq, ciuniuraa-llu elliin, qanerluni, “ATANREM atawaqertelliten, Samuel! Maligtaqullruaqa ATANREM alerquutii.”

¹⁴Samuel-aaq aptuq, “Ciin-mi, niicia kuluviit nepaitnek qusnginek-llu?”

¹⁵Saul-aaq kiuguq, “Anguyagtem̄a tegukengalqait Amalek-aam yuinek. Uitatellruit qusngit kuluviit-llu assinqurrait elliiteknaluki ekualuki ATANERMUN Agayutevnun, pinritqallret-llu tamalkuita piunrillruaput caunrirluki.”[10]

¹⁶“Arulaiqaqaa,” Samuel-aam qanrutaa, “qanrutniamken camek ATANREM qanrutellranek unuk.” “Qanrusnga,” Saul-aaq qanertuq.

¹⁷Samuel-aaq kiuguq, “Elpenek umyuartequteng'e'rpet cakegtauvkenak, ciuliqagtekaatgen ilakellriartain Israel-aam. ATANREM mingullruaten angayuqrurrluten Israel-aamun,

¹⁸ayagcetellruaten-llu ellimerrluten piunriisqelluki taukut umyuarrliqpialriit Amalek-aam yui. Qanrutellruaten anguyagluki tamalkuita tuqutesqelluki.

¹⁹Ciin-mi, tua-i, niitenriciu? Ciin avula'allrusit tukuutnek, taqulluten-llu quyakenrilkiinek ATANREM?”

²⁰“Maligtaqullruaqa ATANEQ,” Saul-aaq qanertuq. “Ayallruunga pisqellratun, ut'rulluku-llu Angayuqaq Agag-aq, tuqulluki-llu Amalek-aam yui tamalkuita.

²¹Tau͡gaam anguyagtem̄a tuqutellrunritait assinqurrit qusngit kuluviit-llu tegulteng; tailluki tau͡gaam maavet Gilgal-aamun elliiteknaluki ekualuki ATANERMUN Agayutevnun.”

²²Samuel-aaq qanertuq, “Naliak ATANREM assikenruagu: niisngayaraq wall'u elliitet ekuagillerkaq-llu? Assinruuq niisngallra elliin ekuagillermi qusngit assinkacagaitnek elliinun.

²³Ingluliurutlek elliinun cangallrunrituq angalkiyaratun, ucuryagcaraq-llu assiilngiryarauluni agayutngualiyaratun. Taumek qessakngavgu ATANREM alerquutii, elliin qessakaaten angayuqrullerkamun.

²⁴“Aa-ang, assiilngillruunga,” Saul-aaq qanertuq. “Narurtellruaqa ATANREM alerquutii elpet-llu pisquteten. Alinguryullruunga anguyagtemnek maligtellruaqa-llu piyullrat.

²⁵Watua tau͡gaam kaigaunga, au͡g'arisgu assiilnguqa maligglua-llu utertellemni, agayuniartua ATANERMUN.”

²⁶“Maliggluten uterrngaitua,” Samuel-aaq kiuguq. “Qessakellruan ATANREM alerquutii, elliin-llu qessakaaten angayuqrullerkarpenun Israel-aamun.”

²⁷Tua-llu Samuel-aaq tuigtuq ayakatarluni, tau͡gaam Saul-aam tegua ulikutaakun, allegtuq-llu.

²⁸Samuel-aam qanrutaa, “ATANREM au͡g'araa angayuqauvia Israel-aam elpenek ernerpak tunluku-llu allamun angutmun assinerpenun.

²⁹Israel-aam ucurnarqelria Agayutii iqluyuituq umyualinqigcuunani-llu. Yuunginaraunrituq — umyuani-llu cimiyuinaku.”

³⁰“Assiilngirtua,” Saul-aaq qanertuq. “Tau͡gaam caunrilkenritqaqia tangvallratni ciuliqagtaita yuut Israel-aam-llu yuin. Utertellemni maligesnga agayuniartua ATANERMUN Agayutevnun.”

³¹Tua-i Samuel-aam maligtaa, Saul-aaq-llu agayuuq ATANERMUN.

³²“Taiciu Angayuqaq Agag-aq wangnun,” Samuel-aaq qanertuq. Agag-aq elliinun taiguq, uuleggluni alingluni, umyuarteqluni, “Qatlinarqellriatun-llu ayuqvaa tuquqatallermi!”

³³Samuel-aaq qanertuq, “Nuussirpagpet amlleret aanaulriit irniariucetellruciatun, waniwa aanan irniariuciiquq.” Kepuraa-llu Agag-aq tumaumanrirluku ekuaviim ciuqerrani Gilgal-aami.

³⁴Tua-i-llu Samuel-aaq ayagtuq Ramah-mun, Angayuqaq-llu Saul-aaq kinguneminun uterrluni Gibeah-mun.

³⁵Samuel-aam-llu unguvallmi taktaciatun tangenqigtenritaa angayuqaq; tau͡gaam angniilutek'laraa. ATANEQ-llu pinqigcuumirauq angayuqaurtellerminek Saul-aaq Israel-aanun.