Read Yupik 1 Samuel 16 Bible Online

1 Samuel 16 - Yupik bible

1 Samuel 16

¹ATANREM qanrutaa Samuel-aaq, “Qaillun taktalriamek angniilutkurqatarciu Saul-aaq? Qessakellruaqa angayuqrullerkaa Israel-aamun. Tau͡gaam waniwa olive-aat uquatnek teguten ayagluten-llu Bethlehem-aamun, angutmun Jesse-mek at'legmun, tua-i-wa cucukngamku qetunrain iliit angayuqrusqelluku.”

²“Qaillun tuaten piciqsia?” Samuel-aaq aptuq. “Saul-aam niiskuniu man'a tuquciiqaanga!” ATANEQ kiuguq, “Malilirluten kuluvayagarmek tua-i-llu qanerluten tailluten elliitmek ekuagiyarturniluten ATANERMUN.

³Unayaqniaran Jesse ekuagillerkamun, qanruciiqamken qaillun pillerkarpenek. Uqumek mingugniaran angayuqrurrluku angun pisqumalqa.”

⁴Samuel-aaq piuq ATANREM pisquciatun ayagluni-llu Bethlehem-aamun, tuani nunarpiim ciuliqagtain pairrsaagaat uuleggluteng apluku-llu, “Uitanqegcitkun-qaa taiguten?”

⁵“Aa-ang,” ellii kiuguq. “Taigua elliiyarturlua ekuagilua ATANERMUN. Menuircarci elpecen̄ek maligglua-llu.” Qanrutai-llu cali Jesse qetunrai-llu ellaitnek menuircaasqelluki, unayaqai-llu ekuagillerkamun.

⁶Tekicameng, Samuel-aam tangrraa Jesse-m qetunraa Eliab-aaq umyuarteqluni-llu, “Una angun wani nangengqalria ATANREM ciuqerrani ilumun waniwauyugnarquq elliin cucukellra.”

⁷Tau͡gaam ATANEQ qanertuq elliinun, “Tangvanrilgu sugtutaciakun tangkegcinarqellrakun-llu. Qessakellruaqa, cuqciyuilama yuut cuqcilauciicetun. Tangvalartut alaitellrakun, tau͡gaam wii tangvalaranka ircaqruit.”

⁸Tua-llu Jesse-m qayagauraa qetunrani Abinadab-aq tailluku-llu Samuel-aamun. Tau͡gaam Samuel-aaq qanertuq, “Qang'a, cali una ATANREM cucukenritaa.”

⁹Tua-i Jesse-m taitaa Shammah-q. “Qang'a, cali una ATANREM cucukenritaa,” Samuel-aaq qanertuq.

¹⁰Tuaten piurluni Jesse-m taitai malrunlegen qetunrani Samuel-aamun. Samuel-aaq-llu qanertuq elliinun, “Qang'a, ATANREM cucukenritaa ukut iliit.”

¹¹Tua-llu aptaa, “Cali-qaa allanek qetunrangqertuten?” Jesse kiuguq, “Kinguqlikacaangqertut, tau͡gaam tayima qusnginek qaunqiuq.” “Aqvavkarru,” Samuel-aaq qanertuq, “Elliitekngaitarput ekuagarkaq taivailgan.”

¹²Tua-i Jesse-m taisqevkaraa. Tauna tangkegcinarquq, calrunani yun'erraq, iik-llu qevlialutek. ATANEQ qanertuq Samuel-aamun, “Waniwauguq — uqumek minguggu!”

¹³Samuel-aam olive-aam uqua tegua mingugluku-llu David-aaq anelgutain ciuqerratni. Egmian-llu ATANREM anerneran imiraa David-aaq tuaken-llu ernermek ayagluni elliini uitaluni. Tua-i-llu Samuel-aaq uterrluni Ramah-mun.

¹⁴ATANREM anerneran unitaa Saul-aaq, anernerrluum-llu ATANERMEK kingunelgem nangtaa.

¹⁵Elliin pistain qanrutaat, “Nallunritarput anernerrlugmun Agayutmek kingunelegmun nangteqevkaucin.

¹⁶Taumek ellimerkut kiarrniartukut angutmek aturcetaaryugngalriamek qelutelegmek harp-amek. Anernerrluk tuskan elpenun, angun tauna aturcetaarniartuq, elpet-llu ataam canrirciquten.”

¹⁷Saul-aam ellimerrai, “Yuarucia angutmek aturcetaayulriamek tailluku-llu wangnun.”

¹⁸Nayurtain iliit qanertuq, “Jesse nunarriini Bethlehem-aam qetunrangqertuq aturcetaayulimek. Cali-llu alingura'arpek'nani tangkegcinaqluni-llu, anguyagtekegtaar, puqigluni-llu. ATANREM nayuraa.”

¹⁹Tua-i Saul-aaq ayagceciuq kevganek Jesse-mun qanresqelluki, “Taivkarru qetunraan David-aaq, qaunqituli qusnginek.”

²⁰Jesse-m ayagcetaa David-aaq Saul-aamun malilirluku piyagarmek qusngirngalngurmek, ciulvagmek atmirluku kelipanek, qecik-wa caqun wine-amek muirumaluni.

²¹David-aaq tekituq Saul-aamun kevgiullerkani-llu ayagnirluku. Saul-aam cakneq assikaa nakmikaa-llu ellii saskuminun ayagacisten͞gurcesqelluku.

²²Tua-llu Saul-aaq ayagceciuq kevgamek Jesse-mun qanerluni, “Assikaqa David-aaq. Maani uitavkarru caliamni.”

²³Tuaken ayagluni, anernerrluk Agayutmek kingunelek tut'aqan Saul-aamun, David-aam aqvaluku qelutelek harp-aq aturcetaalartuq. Anernerrluk-llu ayalartuq, Saul-aam-llu ayuqucia assiriluni ayuqucimitun-llu ayuqliriluni.