Read Yupik 1 Samuel 17 Bible Online

1 Samuel 17 - Yupik bible

1 Samuel 17

¹Philistine-at quyurtut Socoh-mun anguyakatarluteng, nunarrarmun Judah-melngurmi; pelatekiurtut Ephes Dammim-aamek at'legmun, Socoh-m Azekah-m-llu akuliinelngurmun.

²Saul-aaq Israel-aam-llu yui quyurtut pelatekiurluteng-llu Elah-m Kuignayuani, tuani-llu uptut anguyakatarluki Philistine-at.

³Philistine-at caniqliqu'urluteng nangertut qemimun Israel-aam-llu yui akilirneranun, akuliitni-wa kuignayuk.

⁴Angun at'lek Goliath-aamek, nunarpiinek Gath-am, an'uq Philistine-at pelatekaumaviatnek inglukarcurluni Israel-aat yuin iliitnek. It'ganret qulngunritaraat cipluku sugtutauq

⁵aturluni punernermek qat'gailitamek uqamaltaluni usperet yuinaat arvinlegen talliman-wa (125) punernermek-llu qamiqurriryailkutmek.

⁶Iruk-llu cali akngircailkuterlutek punernermek capkutamek, tegumiarluni-llu punernermek narulkarcuutmek tusgani agaluni.

⁷Narulkautaa ellegtaluni muragtaatun 'lumarrissuutem muriim, cavik-llu cingilga akimiarnek (15) uspernek uqamaltaluni. Anguyagta-wa ciunrakun ayalria tegumiaqluku capkutaa.

⁸Goliath-aam nangerrluni qayagpagai Israel-aam yui, “Caliceci maani, upingaluci anguyagmun? Wii Philistine-augua, elpeci Saul-aam pistaini! Cucuklirci iliitnek anguyagtevci callugtekamnek.

⁹Anagkengluni tuquskanga, pisteksaguciiqerpecikut wangkuta; tau͡gaam wii anagkenglua tuquskumku, elpeci pisteksaguciiqamceci.

¹⁰Wani-wa wanirpak ingluliisqua Israel-aam yuin anguyagtainun. Alingura'arpek'naci cucukliisqamci kitumek callugtekamnek!”

¹¹Saul-aam anguyagten̄i-llu man'a niitellermeggni, alingqapiartut.

¹²David-aaq qetunraqellrua Jesse-m, Ephrathite-auluni Bethlehem-aamek Judah-mi. Jesse qetunrangqellruuq pingayunlegnek, Saul-aam-llu angayuqrullran nalliini, ak'a angukaraurlu'urrluni.

¹³Kinguqliqellriit pingayun qetunrain maligtellruat Saul-aaq anguyagmun. Amaqliat Eliab-aaruluni, kinguqlia-wa Abinadab-aq, pingayuak-wa Shammah-q.

¹⁴David-aaq kinguqliqacagauluni, pingayun-llu anngani Saul-aami uitallratni,

¹⁵David-aaq ut'rartaqluni Bethlehem-aamun pilallruuq, atami ungungssii auluksarturluki.

¹⁶Goliath-aam ingluliisqelluni Israel-aam yui piurallrui unuakut atakut-llu tamalkuita erenret yuinaak malruk (40) aturluki.

¹⁷Erenret iliitni Jesse qanertuq David-aamun, “Ayauten avganek puckam kelipimalrianek mukaarkanek ukunek-llu qulnek kelipanek, cukangnaqluten ayautniaten anelgutevnun pelatekaumaviatni.

¹⁸Ukut-llu cali ayaulluki qulen cheese-aat atanirturtiitnun. Kangingnaurniaran qaillun amaqlirpet ayuquciat ut'rulluten-llu camek nasvagarkarpenek nallunairluku tangellruciit assirluteng-llu piciit.

¹⁹Angayuqaq Saul-aaq, anngaten, allat-llu tamarmeng Israel-aam yui, Elah-m Kuignayuani anguyagluki Philistine-at.”

²⁰David-aaq makcara'artuq unuaquan, allamek-llu qaunqescirluki qusngit, teguluki neqet, ayagtuq Jesse-m ellimerruciatun. Tekituq pelatekaumaviatnun Israel-aam yui anuraqanratgun anguyallerkameggnun, qayagauraluteng anguyagcuutmek.

²¹Philistine-at Israel-aam-llu yuin anguyagtai nek'ameggnun nangertut anguyakatarluteng, atunem caumalluteng.

²²David-aam unitai neqet atanerruamun qaunqestiitnun aklut, aqvaqurluni-llu anguyallerkaata engeliinun, ullagluki anngani, aptai qaillun ayuquciitnek.

²³Qalarusnginanrani, Goliath-aaq ciuvartuq Israel-aam-llu yuinek inglukarcurluni ciungani pilaucirmitun. David-aam-llu niitaa.

²⁴Israel-aam yuin tangrramegteggu Goliath-aaq, aqvaqurluteng qimagaut alingqapiarluteng.

²⁵“Atam tangerqerru!” ilameggnun qanertaarutut. “Niiciu unayaqutii calluusqelluni! Angayuqaq Saul-aaq akqillruuq angtuamek akilirciqniluku kina imna tuqutestii; tunciqaa-llu panini kassuucesqelluku, taum-llu atiin ilai akiliqurautnek akilicivkarngaunaki.”

²⁶David-aam aptai angutet mallgesken̄i, “Camek nunuliutengqerciqa angun uum Philistine-am tuqucestii petuirluku-llu Israel-aaq mat'umek kasngunarqellriamek? Kituuga-llu una agayumanrilnguq Philistine-aq narurciyugngalria anguyagtainek unguvalriim Agayutem?”

²⁷Qanrutaat-llu qaillun pimallerkaanek angun tuqucestii Goliath-aam.

²⁸Eliab-aam, David-aam anngaan, niitaa David-aaq angutet qalarutellrani. Qenqerrutaa David-aaq qanerluni-llu, “Calisit maani? Kia aulukaki qusngiten yuilqumi? Elpet elisngakugtaalalriami! Kiingan taiguten tangvagyarturluki callulriit!”

²⁹“Qaillun-mi-tanem waniwa pisia?” David-aaq aptuq. “Camek-qaa ap'arcesciigatua?”

³⁰Tuiggluni-llu allamun angutmun tuaten cali aptaa, uumikuaqan tua-i aptaqan, kiutiit ayuqurluni.

³¹Ilaita angutet niitaa qanellra David-aam, qanrutaat-llu Saul-aaq, elliin-llu taisqevkaraa.

³²David-aaq qanertuq Saul-aamun, “Elpet Ucurnarqellriami, kina alingenrilli uumek Philistine-amek! Ullagluku wiinga callugyarturciqaqa.”

³³“Qang'a,” kiuguq Saul-aaq. “Qaillun elpet callugyarciu? Tan'gaurluuguten, ellii-llu anguyagten͞gumallruluni yuurqaanerminek!”

³⁴“Elpet Ucurnarqellriami,” David-aaq qanertuq, “Wii atama qusngii qaunqelaranka. Iliini yugtutuli wall'u taqukaq ayauciaqan qusngiyagarmek,

³⁵kingunrakun maligtelaraqa, curukarluku-llu, anirtularaqa qusngiyagaq. Yugtutulim-llu wall'u taqukam caukanga, qecugmigluku tuqluakun kaugtuarulluku tuqutelaraqa.

³⁶Tuqucillrurtua yugtutulinek taqukanek-llu, tuaten-llu piyugngaaqa una agayumanrilnguq Philistine-aq, caunrilkilria anguyagtainek unguvalriim Agayutem.

³⁷ATANREM aviutellruanga yugtutulinek taqukanek-llu; aviuciiqaanga-llu uumek Philistine-amek.” “Kitaki,” Saul-aaq kiuguq, “Ayii, ATANREM-llu nayurliten.”

³⁸Tunaa-llu elliin nakmiin qat'gailitani David-aamun atuusqelluku: punerneq qamiqurri'iryailkun, ellia David-aam qamiqurranun, paltuugluku-llu akngircailkutmek.

³⁹David-aam nemrutaa Saul-aam nuussirpii qat'gailitam qainganun, piyuangnaqluni, tau͡gaam pisciigatuq, tamakunek atuneq elisnganrilamiu. “Callugciigatua makunek aturlua,” qanertuq Saul-aamun. “Waten pineq elisnganritaqa.” Tua-i tamalkuita yuugai.

⁴⁰Tegua qusngiliurcuun ayaruni tegulluni-llu tallimanek manigcetellrianek teggalqunek kuiggaarmek ekluki-llu qemaggviminun. Elluqautni upingaluku, an'uq pairrsaagluku Goliath-aaq.

⁴¹Philistine-aq piyuaguq tungiinun David-aam, capkutami tegumiaqestii ciunermikun piyuavkarluku. Canimelliinarluni,

⁴²tangrramiu-llu mecikluku David-aaq, umyuamikun cakneq caunrilkaa tan'gaurluqegtaaraungan.

⁴³Qanertuq-llu David-aamun, “Cassuutngua tamana muragaq? Qimugten͞guyukarpenga-qaa?” Qayagaurauq-llu aniqlaatnek agayutminek David-aamun.

⁴⁴“Kitaki,” kiikirturaa David-aaq, “tuneniarqa temen yaqulegnun ungungssinun-llu neresqelluku.”

⁴⁵David-aaq kiuguq, “Ullagarpenga nuussirpagluten, narulkautarluten, cavigmek-llu nuulegmek narulkarcuuterluten, tau͡gaam wiinga ullagamken atrakun ATANREM Artuqailnguum, Agayutiitgun Israel-aam anguyagtain, caunrilkellerpet.

⁴⁶Mat'umi ernermi ATANREM elliciqaaten pinimnun; cirlakciqamken qamiqun-llu kepluku. Tunciqanka-llu Philistine-am anguyagtain temait yaqulegnun ungungssinun-llu neresqelluki. Ellarpiim tamarmi nallunrirciqaa Israel-aam Agayutengqerrucia,

⁴⁷tamarmeng-llu maanelnguut tangerciqaat ATANEQ nuussirpagnek wall'u narulkautnek aturyugngailucia anirtuqataquniki yun'i. Cirlakituuq anguyagmi, tamarpeci-llu wangkutnun cirlakevkarciqaaci.”

⁴⁸Goliath-aaq ataam piyuaguq David-aam tungiinun, David-aaq-llu cukamek aqvaqurtuq Philistine-at anguyagmun upingalriit tungiitnun callugyarturluku.

⁴⁹Kauluku qemaggvini anciuq teggalqumek, tauna-llu elluqautaa Goliath-aamun. Nall'artaa cunguakun qupluku ilqurra, Goliath-aaq-llu iquuq pucikarluni nunamun.

⁵⁰Tua-i, nuussirpagmek aturpek'nani, David-aam cirlakluku tuqutaa Goliath-aaq elluqautmek teggalqumek-llu caskirluni!

⁵¹Aqvaqurluni ullagartaa, canianun-llu nangerrluni, tegua Goliath-aam nuussirpii caquanek, qamiqurra-llu kepaa tuqulluku. Philistine-at tangrramegteggu anamacestem̄eng tuqucia, qimagluteng ayagtut.

⁵²Anguyagtain Israel-aam Judah-m-llu qayagpagaluteng aqvaqurluteng maligtait Gath-aq tekilluku ikirtuqainun-llu Ekron-aam. Philistine-at iqulartut akngiringalriit tumyaram mengliinun ayalriim Shaaraim-amun, tekilluku Gath-aq Ekron-aaq-llu.

⁵³Tua-llu Israel-aam yui utercameng malirqallermeggnek Philistine-at, uayaaraat qavartarviat.

⁵⁴David-aam-llu teguluku Goliath-aam qamiqurra ayautaa Jerusalem-aamun, tau͡gaam Goliath-aam saskui elliin avaliqai pelatekamini.

⁵⁵Tua-llu Saul-aam tangllerminiu David-aaq callugyartullrani Goliath-aaq, aptaa Abner-aaq, anguyagtem̄i atanirturtiit, “Abner-aaq, kia au͡gna qetunraqau?” “Nalluaqa,” Abner-aam kiugaa.

⁵⁶“Kitak ayagluten nallunringnaqiu,” Saul-aam ellimerraa.

⁵⁷Tua-i-llu David-aaq utercan pelatekaumavigmun tuquqaarluku Goliath-aaq, Abner-aam ullautaa Saul-aamun. David-aam cali ang'aqluku Goliath-aam qamiqua.

⁵⁸Saul-aam aptaa, “Tan'gurraaq, kia qetunraqaten?” “Wiinga qetunraqaanga kevgarpet Jesse-m Bethlehem-aamek,” David-aaq kiuguq.