Read Yupik 1 Samuel 19 Bible Online

1 Samuel 19 - Yupik bible

1 Samuel 19

¹Saul-aam qanrutaa Jonathan-aaq qetunrani tamalkuita-llu atanerruani, upniluni tuqutnaluku David-aaq. Tau͡gaam Jonathan-aam assikqapiararaa David-aaq,

²taumek elliin qanrutaa, “Atama tuquituraaten. Mulngakekina unuaqu unuakumi; iiqina nallunarqellriamun natmun tuantaurluten-llu.

³Ayagciqua nangerrlua-llu atama caniani naucetaarvigmi iirumavigpeni, qanerciqua-llu elpenek elliinun. Camek nallunriquma nallunriceciiqamken.”

⁴Jonathan-aam nanraraa David-aaq Saul-aamun qanerluni-llu, “Picurlagmek caliyaqunak kevgarpenun David-aamun. Ellii picurlagmek taquteqaqsaituq elpenun; pairrluku tau͡gaam, ca tamalkuan pillra angtuaruluni ikayuutnguuq elpenun.

⁵Unguvani qevellrua tuqutellerminiu Goliath-aaq, ATANREM-llu cirlakivkallrua Israel-aaq angtuamek. Tangllerpegu quyallruuten. Ciin-mi waniwa, picurlagmek piyugciu camek pinarqutailnguq yuk tuqulluku-llu David-aaq camek pitailengraan?”

⁶Saul-aaq ilumunqaartuq Jonathan-aam qanellranek akqiluni-llu ATANREM atrakun tuqusngaitniluku David-aaq.

⁷Tua-i Jonathan-aam qayagauraa David-aaq qanrulluku-llu canek tamalkuitnek pillernek; tua-i-llu ullaulluku Saul-aamun, David-aam-llu kevgiuraa angayuqaq ciungani pillrucimitun.

⁸Anguyak-llu Philistine-at inglukluki ayagninqigtuq. David-aam curugai cirlakuurateng-llu qimagtut.

⁹Erenret iliitni anernerrluum ATANERMEK kingunelgem iluiraa Saul-aaq. Tuani aqumgaluni enemini narulkautmek tegumiarluni, David-aaq-llu tuanlluni, aturcetaarluni qelutellegmek harp-aminek.

¹⁰Saul-aam David-aaq ussukcaucessaagyaaqaa qacarnermun narulkautmikun, tau͡gaam David-aaq avituq, narulkaun-llu qacarnermun kapulluni. David-aaq-llu qimagluni anagtuq.

¹¹Tuani cali unugmi Saul-aaq ayagceciuq anguyagten̄ek David-aam enii murilkesqelluku tuqucesqelluku-llu unuaqu unuakumi. Michal-aam, David-aam nulirran, aarcirturaa, “Atakurpak qimanrilkuvet, unuaqu tuqumaciquten.”

¹²Atrartaa egalerkun, qimagluni-llu anagtuq.

¹³Tua-llu tegulluni enemelngurmek agayutnguamek, ellia inglermun, putuskaq-llu qusngirngalnguut melquitnek pilimalria qamiquan nalliinun elliluku, patuluku-llu.

¹⁴Saul-aam-llu anguyagtain tailuteng aqvallratgu David-aaq, Michal-aam qanrutai naulluuniluku.

¹⁵Tau͡gaam Saul-aam utercetai ellaitnek tangrresqelluku David-aaq. Elliin ellimerrai, “Akigarluku ingelrikun wangnun taiciu, tuqutniarqa.”

¹⁶Itertut-llu ellait nataqluku-llu enemiutaq agayutnguaq inglerni putuskaq-llu qusngirngalnguut melqurritnek piliaq qamiquan nalliini.

¹⁷Saul-aam aptaa Michal-aaq, “Ciin picirkartuyarucia waten ingluka-llu ayagtelluku?” Arnaq kiuguq, “Qanellruuq tuquciiqnilua ikayunrilkumni anagtelluku.”

¹⁸David-aaq anagtuq ayagluni-llu Samuel-aamun Ramah-mi qanrutaa-llu canek tamalkuitnek Saul-aam ellminun pillrinek. Tua-i Samuel-aaq-llu ayagtuk Naioth-aamun tuantaurlutek-llu.

¹⁹Saul-aaq-llu qanrutaat David-aaq Naioth-aametniluku Ramah-mi.

²⁰Ayagceciuq-llu anguyagten̄ek qillerrluku tegustekainek. Tangertut quyungqalrianek prophet-aanek yuralrianek qayagpagaluteng-llu, Samuel-aamek ciuliqagterluteng. Tua-llu Agayutem anerneran nuvai Saul-aam anguyagtai, ellait-llu cali yurangut qayagpagaluteng-llu.

²¹Mat'umek Saul-aaq niicami, cali kevganek ayagceciuq, taukut-llu cali ellait yurangut qayagpagaluteng-llu. Ayagcecinqigtuq-llu pingayiriluni, taukut-llu tuaten cali piut.

²²Tua-i-llu ellii ayagtuq Ramah-mun. Tekicami-llu elakarpagmun Secu-mi, apyutkak nanluciagnek Samuel-aankuk David-aaq-llu qanrutaat-llu Naioth-aametnilukek.

²³Ayainanrani ellii-llu anerneran Agayutem iluiraa, yuranguq-llu qayagpagaluni tuaten Naioth-aaq tekilluku.

²⁴Aturani yuugai yurarluni-llu qayagpagaluni Samuel-aam takuani, inangqaluni-llu matarmi tuani ernermi unugpak-llu. (Man'a ayagneqaa waten qanlallrata, “Saul-aaq-llu-qaa prophet-aarurtuq?”)