Read Yupik 1 Samuel 2 Bible Online

1 Samuel 2 - Yupik bible

1 Samuel 2

¹Hannah piicagtuq: “ATANREM imillrua ircaquqa angnimek; angniqapiartua elliin caliallranek! Temciarautekanka inglunka; angniqapiartua Agayutem ikayullruanga!

²“Kitumek tanqilriartaituq ATANERTUN, ellii ayuqaituq, allamek aulukestetaituq Agayutemcetun ayuqellriamek.

³Taqiu qastuluten ucuryagtellren; nepairki ucuryaggluten qanerkaten. Tua-i-wa ATANEQ Agayutnguuq nallunrilnguuluni, cuqcimai-llu yuut tamalkuita callrit.

⁴Urluvrit pinilriit anguyagtet navguumaut, tau͡gken pinialnguut piniriinartut.

⁵Yuut camirrluteng neruratullret akingengnaqut neqkangqerrnaluteng, tau͡gaam kaillret kainrirtut. Qingayuitelleq nuliaq irniuq malrunlegnek mikelngurnek, tau͡gken aanaulria amllernun atauciungraan unegtaarituq.

⁶ATANEQ tuqucilartuq unguirceciaqluni-llu; ayagcecilartuq yugnek tuqumalriit nuniitnun tuamta-llu ut'rulluki.

⁷Yuut ilait arrsaurcet'larai ilait-llu tukuurtelluki; ilait pikegtaunrircet'larai ilait-llu nalugluki.

⁸Nalularai arrsaulriit urr'amek nangertelarai-llu piitulriit nangteqellratnek. Ilagaryugngavkarilarai angayuqat qetunrait aqumevkalarai-llu takarnarqellriit ilagarluki. Nunam tusnganri ATANREM pikai, qaingatnun-llu piliaqellrua ellarpak.

⁹“Qaunqelarai unguvait ukvertulriit yum'i, tau͡gaam carrluulriit tamartut tan'germun; yuk cirlakiyuituq nakmiin elliin pinimikun.

¹⁰Inglukestai ATANREM piunriumaciqut; ellaitnun qilagmek kalirciquq. ATANREM qanercetaarciqaa nuna tamalkuan; pinimek cikirciqaa angayuqani, nakmikellni angayuqaq elliin cirlakivkarciqaa.”

¹¹Tua-i-llu Elkanah kinguneminun utertuq Ramah-mun. Tan'gaurluq-llu Samuel-aaq uitauq Shiloh-mi kevgiuraa-llu ATANEQ ayuqucirtullratun Eli-am agayulirtem.

¹²Qetunrai Eli-am yurrluuqapiartut. Caukevkenaku ATANEQ

¹³alerquutet-llu atuusqumalriit agayulirtet canek piteklilallerkait yugnek. Tau͡gaam, kina imna elliigaqan ekuagarkanek, agayulirtem kevgaa tailartuq tegumiarluni pingayunek nuulegmek kapsuutmek. Kemek-llu uuvailgan,

¹⁴kap'lerutelaraa egatmun, taum-llu kapsuutem antellra agayulirtem pik'laraa. Tamarmeng Israel-aam yui tailriit Shiloh-mun elliiyarturluteng ekuagarkanek pilarait waten.

¹⁵Tuamta-llu, uqua au͡g'arluku ekuamavailgan, agayulirtem pistii tailuni qanlartuq elliiluni ekuagilriamun, “Cikirnga kemegmek agayulirtem maniarkaanek; ciuniurngailaku qallaucimalria kemek elpenek, tau͡gaam qassaulria.”

¹⁶Yuk kiukan, “Pilauciat aturluku elegqaarnaurtuq uqua ciumek; nutaan tegutniartuten piyullerpetun,” agayulirtem kevgaa qanerciquq, “Qang'a! Taisgu wanirpak! Pinrilkuvgu, teguarkaurciiqaqa allurrluten!”

¹⁷Una assiilnguat qetunrain Eli-am arcaqerluni pinarqelriaruuq ATANREM tangvallrani, tua-i-wa aulukngatki elliitet ATANERMUN cakneq qigcikevkenaki.

¹⁸Waten pillrata nalliini tan'gaurluum Samuel-aam kevgiurturaraa ATANEQ, aturarluni qigcignarcaumalriamek 'lumarrarmek manuilitamek.

¹⁹Allamiaqan aaniin pililaraa ulikutacuarmek taitaqluku-llu elliinun maligtaqamiu uini elliiyarturaqan allrakum ekuagiyaraani.

²⁰Tua-i-llu Eli-am atawaqercet'larak Elkanah nulirra-llu, qanerluni-llu Elkanah-mun, “ATANREM allanek irniarkavnek cikiqiliten uuggun arnakun cimirkaanek elliinun tunllerpet.” Taum kinguani utertelartuk kingunermegnun.

²¹ATANREM tua-i atawaqercetellrua Hannah, qetunrangluni-llu pingayunek paningluni-llu malrugnek. Tan'gaurluq-llu Samuel-aaq angliuq kevgiurluku ATANEQ.

²²Wani-wa Eli-aq cakneq ak'allaurtuq, niitelarai-llu tamalkuita qetunrami qaillun pilallrat Israel-aanun, inangqalallrat-llu arnanek tutegluteng kevgiulrianek iteryaraani Pelatekaan ATANREM tuanlucian.

²³Taumek qanrutai, “Ciin makunek caliceci? Yuut tamarmeng qanrut'laraatnga elluanritqapiarnek caliavcen̄ek.

²⁴Waten pinrirci, qetunramaa! Man'a assiitqapiartuq yuin ATANREM qalarutkek'ngaat!

²⁵Kina imna assiilngiqan ilaminun, Agayutem anagyaaquciiqaa alartellria, tau͡gaam kia anagyaaquciiqau kina assiilngilria ATANERMUN?”

²⁶Tan'gaurluq Samuel-aaq angliurtuq ilukegcinariinarluni-llu ATANERMUN yugnun-llu.

²⁷Prophet-aaq tekituq Eli-amun waten qanerkarluni ATANERMEK: “Ciulian Aaron-aaq nakmiin-llu ilani kevgaullratni angayuqranun Egypt-aam, wangnek nasvallruunga Aaron-aamun.

²⁸Tamalkuitnek ilakellriartainek Israel-aam cucukellruanka elliin nakmiin ilai wangnun agayulirten͞gusqelluku, kevgiuresqelluki ekuavigmi, tepkegcilriamek aruviaralaasqelluki, manuilitamek-llu as'arcen̄a'armek atulaasqelluku[3] qanellgutkekatnga. Piunarqucimek-llu cikillruanka iliinek tegutelaasqelluki elliitet ekuamallret ekuavigmi.

²⁹Ciin-mi tua-i iigpegun piksugiinermek imangqerrluten tangvagciki ekuagarkat elliitet-llu piteklillrenka yumnek? Ciin, Eli-aaq, qetunraten qigcikenrusiki wangni uqungcartelluki assinqurritnek ekuagarkat yum'a elliitaitnek wangnun?

³⁰Wiinga, ATANERMI Agayutiini Israel-aam, akqutkellruaqa avani pellullermi nakmiin ilavet ilakuralriavet-llu kevgiurarkaulua agayulirten͞guluteng taqsuunateng. Tau͡gaam watua qanertua tuaten piyuumiirullua! Waten tau͡gaam, qigcikciqanka qigcikestenka, eq'ukciqanka-llu caunrilkestenka.

³¹Niicugni, pillerkaq agiirtuq tuqucillerkaqa tamalkuitnek ayagyuanek angutnek ilavni ilakuralriarpeni-llu, atauciunger'mi angun ilavni unguvangairulluku ak'allaurtellerkaa tekilluku.

³²Arenqiallugingaluci tangvalarciqaci ayuqniarluki tamalkuita atawaqautet cikiutekanka allanun yugnun Israel-aanun, tau͡gaam kina atauciunger'mi ilavni unguvangairuciiquq ak'allaurtellerkani tekilluku.

³³Kinguverpet tau͡gaam iliit unguvavkarciqaqa, kevgiurciqaanga-llu agayulirten͞guluni. Tau͡gaam ellii cikmirciquq neryuniurutairulluni-llu, tamarmeng-llu kinguveten pilluggluteng tuquciqut.

³⁴Qetunraagken malruk Hophni-nkuk Phinehas-aaq-llu tamarmek tuqukagnek ernermi ataucimi, tamatum nallunairciqaa qanellrenka tamalkuita piciurtarkauciat.

³⁵Cucuklirciqua agayulirtem̄ek piciugarkamek wangnun maliggluki-llu pisqellrenka pistekaatnek.

³⁶Kinguverpet iliit tuqutaullrunrilnguq agayulirtem̄un taumun ullaulluni kaigalarciquq akimek neqkamek-llu, takumcuca'arluni-llu ikayuryugluki agayulirtet, nerlallerkani pitekluku.”