Read Yupik 1 Samuel 21 Bible Online

1 Samuel 21 - Yupik bible

1 Samuel 21

¹David-aaq ayagtuq agayulirtem̄un Ahimelech-aamun Nob-ami. Ahimelech-aaq an'uq uuleggluni pairrsaagluku apluku-llu, “Ciin maavet taisit kiivet?”

²“Taigua angayuqam ellimerranga,” David-aam kiugaa. “Qanrutellruanga kitumun nallunriisqevkenaku ca pitekluku taivkaucini. Malinka qanrutellruanka nani quyurtellerkamten̄ek.

³Wanirpak canek avalingqercit? Cikirnga tallimanek kelipanek canek-llu allanek pingqerrutacirpetun.”

⁴Agayulirta qanertuq, “Kelipapianek piitua, kiingan tanqilrianek kelipanek; teguyugngaaten maliten ukaqvaggun arniuqsailkata.”

⁵“Piksailnguut-wa,” David-aaq kiuguq. “Malinka piciryarat aturluki menuitelartut natmun-llu ayacuarangramta; maa-i arcaqerluteng ellimerrumallemten̄i pinarqelriamek!”

⁶Tua-i agayulirtem cikiraa David-aaq tanqilrianek kelipanek, kiingan kelipautengqerrami elliitngullernek Agayutmun, au͡g'arluki qigcignarqellriamek estuulumek cimillritnek nutaranek kelipanek.

⁷(Saul-aam qusngiliurtain ciuqliat, Doeg-aaq, Edom-aarmiu, nall'arulluni tamaantellruuq tuani ernermi, agayumacikun caliarkani caliaqsartuumaluku.)

⁸David-aaq qanertuq Ahimelech-aamun, “Narulkarcuutengqertuten-qaa wall'u nuussirpagmek wangnun cikiuteksugngakevnek? Angayuqam ellimerrutiin ayagarcecanga patakarlua pillerkaitellruunga aqvallerkamnek narulkarcuuteka wall'u allamek saskumek.”

⁹Ahimelech-aaq kiuguq, “Nunaqliqaqa nuussirpii Goliath-aam Philistine-am, tuqutellerpet Elah-m Kuignayuani; tunuantuq as'arcen̄araam qat'gailitam, nemrusngaluni 'lumarrarmun. Piyukuvgu, teguu, kiimi saskuuguq maani.” “Taisgu,” David-aaq qanertuq. “Allamek assinranek nuussirpagmek pitaituq nani.”

¹⁰Tua-i David-aaq ayagtuq, qimagauluni Saul-aamek, ayagluni-llu Angayuqamun Achish-amun Gath-armiumun.

¹¹Angayuqam atanerruari qanertut Achish-amun, “Una-qaa David-aarunrituq, angayuqaulria nunamini? Una imuuguq arnat atuutekellrat, yurarluteng, ‘Saul-aaq tuqucillruuq tiissitsaanek (1,000), tau͡gaam David-aaq tuqucillruuq qulnek tiissitsaanek (10,000).’”

¹²Qanellrita cakneq agturaat David-aam ayuqucia, alinguryukapiartuq-llu Angayuqamek Achish-amek.

¹³Taumek David-aaq avatiitni uitaaqami, umyugairusngualanguq usvillugtellriatun-llu ayuqliriluni nayumiqangnaqaqatni; igaqtaraqluni-llu nunarpiim ikirtuqainun nuiqluni tuaten ungaminun.

¹⁴Tua-i Achish-aq qanertuq atanerruaminun, “Atam tangerqerru! Angun una usvillugtuq! Ciin taiceciu wangnun?

¹⁵Amllenritut-qaa ak'a usvillugtellriit avatemni? Ciin allamek taiceci paayaartekamnek usvillugtellriamek maani nakmiin enemni?”