Read Yupik 1 Samuel 22 Bible Online

1 Samuel 22 - Yupik bible

1 Samuel 22

¹David-aaq qimagtuq nunarpiinek Gath-am ayagluni-llu qerranqumun yaaqsinrilkiini nunarraam Adullam-aam. Anelgutain nakmiin-llu ilain niicamegteggu tuanetniluku ullagaat.

²Yuut pikegtakumanrilnguut wall'u akiilngulget wall'u narrlagcimalriit ullagaat, nuniini yuinaat yuinaat (400) angutet quyurmeng, ciuliqagteksagutaat-llu.

³David-aaq ayagtuq tuaken Mizpah-mun Moab-ami qanerluni-llu angayuqranun Moab-am, “Kitaki aataka aanaka-llu uitavkaqerkek elpeni nallunrirnatkamnun qaillun Agayutem piqatallra wangnun.”

⁴Tua-i unitak angayuqaagni angayuqranun Moab-am, tuantaurtuk-llu David-aam iirumallran taktaciatun qerranqumi.

⁵Tua-llu prophet-aaq Gad-aq taiguq David-aamun qanerluni-llu, “Maani uitanrilu; patagmek ayii nuniinun Judah-m.” Tua-i David-aaq an'uq ayagluni-llu napainun Hereth-aam.

⁶Caqerluni Saul-aaq Gibeah-metellruuq, aqumgaluni napam tamarisk-amek atellgem aciani qemim qaingani, narulkarcuutminek tegumiarluni, tamarmeng-llu atanerruari nangengqaluteng avatiini. Qanrutaat-llu David-aam anguyagtain-llu nanluciat nallunrirniluku,

⁷qanertuq-llu atanerruaminun, “Niicugnici, yuini Benjamin-aam! Umyuartequci-qaa David-aamun cikirnayukluci naucetaarvignek wine-arkat-llu naucetaarviitnek tamarpeci, atanerruarurrluci-llu anguyagtem̄inun?

⁸Tamana-qaa pitekluku aassaqluci camek picirkiurtuci wangnun? Atauciunger'mi ilavci qanrutenritaanga wiinga nakmiin qetunraqa taqutniluku ililirarkaurrluku David-aaq? Kia atauciunger'mi umyuarniurutkenritaanga wiinga wall'u qanrutevkenii David-aaq, nakmiin anguyagtem̄a iliit, wanirpak waniwa yuarniluku pillerkamek tuqutnalua, qetunramnun-llu eguaqurniluku.”

⁹Doeg-aaq tuani nangerngallruuq Saul-aam atanerruari ilagarluki, ellii-llu qanertuq, “Tangellruaqa David-aam ullallraku Ahimelech-aaq qetunraa Ahitub-aam Nob-ami.

¹⁰Ahimelech-aam aptellrua ATANEQ qaillun David-aaq pillerkaanek, tua-i-llu David-aaq cikirluku neqnek nuussirpiinek-llu Goliath-aam Philistine-am.”

¹¹Tua-i-llu Angayuqam Saul-aam taisqaa agayulirta Ahimelech-aaq tamalkuita-llu ilakutai, taukut cali agayulirten͞gulriit Nob-ami, taigut-llu elliinun.

¹²Saul-aaq qanertuq Ahimelech-aamun, “Niicugni, Ahimelech-aaq!” “Wani-wa, angayuqamaa,” ellii kiuguq.

¹³Saul-aam aptaa, “Ciin elpetek David-aaq-llu aassaqlutek picirkiurcetek wangnun? Ciin neqnek cikillrusiu nuussirpagmek-llu, apelciucilluku-llu Agayutmun? Tua-i waniwa ingluksagutaanga utaqaluni-llu qaku arenqikallrani tuqutnalua!”

¹⁴Ahimelech-aaq kiuguq, “David-aaq piciunqurrauguq atanerruarpeni! Nakmiin nengaukan, atanerruaqluku ciuqliuluni nakmiin nayurtevnun, quyinrulriamek-llu takaqumaluni takarnarqellriami atanruvigmi.

¹⁵Aa-ang, apelciutelaraqa Agayutmun, nutaan-llu pivkenaku. Man'a-llu aassaqlunuk picirkiurnillrat, Elpet Ucurnarqellriami, piciliyunarqenritarpenga wiinga wall'u nakmiin ilama iliit. Wiinga camek nalqapiartua mat'um waten pilriim tungiinun!”

¹⁶Angayuqaq qanertuq, “Ahimelech-aaq, elpet tamalkurmeng-llu ilakutaten tuqunarquci.”

¹⁷Tua-llu qanertuq nayurten̄un canimini nangengqalrianun, “Tuquciki ATANREM agayulirtai! Aassaqluteng picirkiullruut David-aaq ilakluku qanrutevkenii-llu David-aaq ayakallruniluku, nallunritellrung'e'rmegteggu.” Tau͡gaam nayurtet maligarutenritut yaggvikluki tuqutellerkameggnun ATANREM agayulirtai.

¹⁸Tua-i Saul-aaq qanertuq Doeg-aamun, “Elpet tuquski!” —Doeg-aam-llu tamalkuita tuqutai. Tuani ernermi tuquciuq yuinaat cetaman tallimanek cipluku (85) agayulirten̄ek piyunarquciliumaluteng as'arcen̄araam qat'gailitam aturyugngastainek.

¹⁹Saul-aam-llu tamalkuita yui Nob-am, nunarpiita agayulirtet, tuqurqevkarai: angutet arnat-llu, mikelnguut anqiiyagaat, kuluviit, ciulviit, qusngit-llu — tamarmeng tuqucimaut.

²⁰Tau͡gaam Abiathar-aq, Ahimelech-aam qetunrain iliit, ayakartuq, ayagluni-llu ilaksagutaa David-aaq.

²¹Qanrutaa qaillun Saul-aam tuqurqillranek agayulirtainek ATANREM.

²²David-aam qanrutaa, “Tuani ernermi tangllemni Doeg-aaq, nallunritellruaqa nallunailngurmek Saul-aaq qanrutarkaucianek. Taumek wiinga pinarqelriaruunga tuqutaullratnun tamarmeng ilakutarpet.

²³Wangnetauraa alingyaqunak-llu. Saul-aam tamamnuk tuqucugaakuk, tau͡gaam wangni pengegnaiciiquten.”