Read Yupik 1 Samuel 24 Bible Online

1 Samuel 24 - Yupik bible

1 Samuel 24

¹Saul-aaq utercan anguyallerminek Philistine-at, qanrutaat David-aaq uitaniluku yuilqumi Engedi-m yaaqsinrilkiini.

²Saul-aaq malilirluni tiissitsaanek pingayunek (3,000) assinqurritnek anguyagtet Israel-aami yuaryarturait David-aankut anguyagtai-llu calaralirnerani atellget Nuyurtalriit Qusngirngalnguut Teggalqut.

³Tekituq qerranqumun mallgeskiitni qusngit casguita tumyaram mengliini iterluni-llu yuqerrnaluni. Cuna-wa waniwa qerranquq tauna David-aam anguyagtain-llu iirumaviat qamani iluqvani.

⁴Qanrutaat, “Waniwa pillerkan! ATANREM qanrutellruaten elliciqniluku inglun pinirpenun elpenun-llu piyullerpetun aulukesqelluku.” David-aam ullakata'arluku Saul-aaq ulikutaan iliinek ilairutuq Saul-aamun elpekevkarpek'naku.

⁵Tau͡gaam David-aaq umyuarniunguq,

⁶qanertuq-llu anguyagtem̄inun, “ATANREM qaunqekilia picurlanritlerqamnun atanirturteka, ATANREM nakmikellra angayuqausqelluku! Akngira'artenrilkilaku carraungraan, tua-i-wa angayuqaungan nakmikumaluni ATANERMEK!”

⁷Tua-i David-aam taringevkarai anguyagten̄i curugarkaunritniluku Saul-aaq. Saul-aaq nangertuq, anluni qerranqumek, ayagluni-llu.

⁸Nutaan David-aaq an'uq kingunrakun qayagaurluku-llu, “Elpet Ucurnarqellriami!” Saul-aaq kingyartuq, David-aaq-llu palurtuq nunamun qigcigyugluni

⁹qanerluni-llu, “Ciin ukveqlarciki yuut qanelriit wangnun akngirtengnaqniluten?

¹⁰Elpenek waniwa tangrran qerranqum ATANREM pinimnun ellillruaten. Ilaita anguyagtem̄a piyaaqaatenga tuqucesqelluten, tau͡gaam wiinga naklekellruamken qanerlua-llu carraungraan wiinga akngirrngaitniluten, ATANREM-wa nakmikellruaten angayuqausqelluten.

¹¹Tang, atamaa, tangrru una ulikutarpet ilii tegumiaqa! Tuqucugngallruyaaqamken, tau͡gaam kiingan uumek ilairutellruunga. Uum taringevkarliten wiinga umyuarteqenrilucimnek elpet ingluknaluten wall'u akngirrnaluten. Elpet pissuravnga tuqutnalua, wiinga camek assiitellriamek piksailengramken.

¹²Kitaki ATANREM cuqeskiliu nalirpuk alarucianek! Kitaki elliin anucimirqecetaaqiliten caliarpenek wii tungemnun, tua-i wiinga akngirrngailamken carraungraan.

¹³Nallunritan avaken qanruyun, ‘Assiilnguq atularaat kiimeng assiilnguut yuut.’ Taumek wiinga akngirrngailkemken.

¹⁴Tangrru angayuqran Israel-aam tuqutengnaqkengaa! Tangrru malirqerakengaa! Tuqumalria qimugta, ungilagliar!

¹⁵ATANEQ cuqciciquq, ellii-llu nallunairiciquq nalirpuk alarucianek. Kitaki man'a yuvriqiliu, ikayurlua, anirturlua-llu wiinga elpenek.”

¹⁶David-aaq taqngan qanenermek, Saul-aaq qanertuq, “Ilumun-qaa elpenguuten, David-aaq qetunramni?” Qiangarrluni-llu.

¹⁷Tua-llu qanertuq David-aamun, “Elluarrluten piuten, wiinga-llu alarrlua. Cakneq assirlua pillruarpenga, wiinga assiitellriamek cakneq taquteng'e'rma elpenun!

¹⁸Mat'umi ernermi manian assilria calian wangnun, tuqutenrilavnga, ATANREM ellingraanga pinirpenun.

¹⁹Qavcirqunek kia ingluni pitaqerraarluku ayagcetenqigtelartau akngirtevkenaku? ATANREM atawaqerceskiliten ernerpak wangnun waten pillerpenek!

²⁰Waniwa ilumunqaartua angayuqrurtarkaucivnek Israel-aamun angayuqauvik-llu ciumuugarkaucia atanirturiluten elpet.

²¹Tau͡gaam akqia ATANREM atrakun uitacesqelluki kinguvrenka, atqa nakmiin-llu ilama atrat taqluni nalluyagucimanritniartuq.”

²²David-aaq akqiuq tuaten piciqniluni. Tua-i-llu Saul-aaq kingunerminun uterrluni, David-aankut-llu anguyagten̄i-llu uterrluteng iirumavimeggnun.