Read Yupik 1 Samuel 25 Bible Online

1 Samuel 25 - Yupik bible

1 Samuel 25

¹Samuel-aaq tuquuq, Israel-aam-llu yuin tamarmeng quyurrluteng angniilutkaat. Tua-i-llu qunguulluku nuniinun Ramah-mi. Mat'um kinguani, David-aaq ayagtuq yuilqurtaanun Paran-aam.

²Angutetangqellruuq ilakellriarinek Caleb-aam aterluni Nabal-amek, kingunengqerrluni nunarriinek Maon-am, nunauterluni-llu yaaqsinrilkiini nunarraam Carmel-aam. Angun una tukuuqapiarluni, pikistekluku tiissitsaat pingayun (3,000) qusngit tiissitsaat-llu (1,000) qusngirngalnguut. Nulirra Abigail-aq kenegnaqapiartuq elisngalriaruluni-llu, tau͡gaam ellii angun umyuarrliqellriaruuq, qenngalriaruluni-llu. Nabal-aq kepliarillruuq qusngiutminek Carmel-aami,

⁴David-aam-llu, yuilqumtellriim, man'a niitaa,

⁵taumek ayagceciuq qulnek ayagyuanek angutnek ellimerrluki ayaasqelluki Carmel-aamun, yuaresqelluku Nabal-aq, aryuqutmek-llu ellminek kingunelegmek qanrutesqelluku.

⁶Elliin alerquagai waten Nabal-aq qanrucesqelluku: “David-aam aryuqutmek tuyuraaten, yugnikekmaa, umyuaqutkegtaarmek piluten, nakmiin-llu ilaten, tamalkuita-llu cat piuteten.

⁷Niituq asmegciniluten qusngivnek, nallunricesqumaaten-llu qusngiliurteten wangkutni uitallruniluki wangkuta-llu picurlallrunritaput. Ca-llu ellaita piat teglegumallrunrituq Carmel-aami uitallrata taktaciatun.

⁸Apeskiki, ellaita qanruciiqaatgen. Taigukut kalukaryarami, David-aam-llu apelciraaten ciuniunqegcaaraasqelluta. Taumek cikirkut wangkuta kevgarpeni pikangqerrutacirpetun yugnikek'ngavnun-llu David-aamun.”

⁹David-aam anguyagtain qanrutkaat man'a qanrutkarkaq Nabal-amun David-aam atrakun. Utaqaluteng-llu tuani,

¹⁰Nabal-aq-llu kiuyaqlirtuq, “David-aaq-qaa? Kituuga tauna? Ciungani niiteksaitua taumek! Makuni ernerni nuna man'a muirumauq ayakallernek pisten̄ek!

¹¹Wiinga tegungaitanka kelipautenka mer'utkaa-llu, ungungssit-llu tuqurqellrenka qusnginek kepliartemnun pikisqelluki, tunluki-llu yugnun taillernun naken kingunengqerruciinateng!”

¹²David-aam anguyagtai utertut elliinun qanrulluku-llu Nabal-am qanellranek.

¹³“Naqugci nuussirpagpecen̄ek!” ellimerrai, tamarmeng-llu tuaten piut. David-aaq-llu cali ellii naqugtuq nuussirpaminek ayagluteng-llu yuinarnek yuinarnek (400) nuniini anguyagtem̄inek maligluni, unilluki yuinaat qulen (200) kingunemeggnun akluliurtelluki.

¹⁴Pistain Nabal-am iliit qanertuq Nabal-am nulirranun Abigail-amun, “Niitellruuten-qaa? David-aaq taivkariuq kevganek yuilqumek kingunerluteng aryuqutmek tuyurluku atanerruaput, tau͡gaam elliin ciuniucurlagai.

¹⁵Tau͡gken ellait wangkutnun assirluteng pillruut; qaillukuaqallrunritaakut, ilakurallemten̄i-llu yuilqumi, ca wangkutnek pikestelek teglegumallrunrituq.

¹⁶Camun pinayukluta murilkellruitkut ernermi unugtuumaan ilalillemta taktaciatun qaunqelluki katngaput.

¹⁷Kitak man'a umyuangcauskiu nallunairluten-llu qaillun pillerkarpenek. Man'a assiitqapiarciqsugnarquq atanerruamten̄un tamalkuitnun-llu nakmiin ilainun. Umyuarrliqsiiyaagami kina maligtaqungaitaa!”

¹⁸Abigail-aq cukangnaqluni quyurciuq yuinarnek qulnek (200) kelipanek, malrugnek qeciignek caqutegnek muirumalutek wine-amek, tallimanek kelipimalrianek qusnginek, malrugnek cuqegnek kelipimalrianek mukaarkanek, yuinarnek tallimanek (100) qillerqanek issuumayagarnek, qulnek-llu yuinarnek (200) kinertarnek fig-anek, atmiulluki-llu ciulvagnun.

¹⁹Qanrutai-llu pistet, “Ciumek ayagci maligciiqamci.” Tau͡gaam camek uini qanrutevkenaku.

²⁰Ayainanermini qemiq uivluku alqunaq igvaartai David-aaq anguyagtai-llu tungminun tailriit.

²¹David-aaq umyuartequ'urallruluni, “Ciin-kiq qaunqellrusia au͡g'um angutem aklui maani yuilqumi? Ca-llu elliin pia teglegumallruvkenani, waten tua-lli-wa ayuqellriakun akinauqiinga ikayullemnek!

²²Agayutem yaggviklua tuquskilia tuqutenrilkumki tamaq'apiaraita au͡gkut anguyagtet unuakuurpailgan!”

²³Abigail-am tangrramiu David-aaq, atraqertuq aqumgaviminek nunamun-llu palurrluni

²⁴David-aam it'gainun, qanerluni-llu elliinun, “Kitaki niicugninga! Wiinga avalitngunaurtua.

²⁵Ilangcivkenaku uitasgu Nabal-aq, camun atuunrilnguq! At'mi kangia atuq'apiararaa — usvitunrilnguq![11] wiinga tuantellrunritua pisteten tekitellratni.

²⁶ATANRUUQ tauna akinaurcetenritevkallren tuqutenritevkartiit-llu inglukestevvet. Akqiunga waniwa unguvalriakun ATANERKUN inglukesteten tamalkuita-llu akngirtengnaqesteten anucimirqecetaarumaarkaurrluteng Nabal-atun.

²⁷Kitaki, ciuniurru una cikiun taitelqa elpenun, tunluku-llu anguyagtevnun.

²⁸Kitaki-tang au͡g'arisnga, carraungraan picurlallemnek. ATANREM angayuqrurceciiqaaten, kinguveten-llu, calluucavgu anguyainek; assiilngurmek-llu camek pingaituten unguvallerpet taktaciatun.

²⁹Kia imum curukaqaten tuqutengnaqluten-llu, ATANREM Agayutvet camun pivkarngaitaaten, yuum qaunqilauciatun piksunarqellrianek tukuutnek. Imkut tau͡gaam inglukesteten egciiqai, yuum teggalqumek elluqaqutekun milqalauciatun.

³⁰ATANREM-llu tamalkuita pimarikaki assilriit akqutkellni elpenun angayuqaurrluten-llu Israel-aamun,

³¹pinqigcuumirataiciiquten wall'u umyuarniurutaunak, tuqucillerpenek camek pitaunak wall'u umyuan aturluku akinaullerpenek. ATANREM-llu atawaqercecimarikaten, kitaki nalluyagucaqunii.”

³²David-aaq-llu qanertuq elliinun, “Nanraumali ATANEQ, Agayutii Israel-aam, taivkarten ernerpak pairrsaagtellua!

³³Quyanarquq Agayun umyuaqegtaaravnek mat'umek-llu ernerpak caliarpenek wiinga aviullua tuqucillerkamnek wall'u umyuaqa aturluku akinaullerkamnek.

³⁴ATANREM nayumiqallruanga akngircetevkenak. Tau͡gaam piciulriamek qanertua unguvalriakun Agayutiikun Israel-aam cukangnaqluten paiqallrunrilkuvnga, tamarmeng Nabal-am anguyagtai tuqutauyartut unuakullrani.”

³⁵Tua-i-llu David-aam ciuniurai taitellri ellminun qanerluni-llu elliinun, “Uterten kingunerpenun peng'garcaqunak-llu. Pisqumallren aturciqaqa.”

³⁶Abigail-aq utertuq Nabal-amun, enemini kalukalriamun angayuqam kalukalauciatun. Taangiqluni angnirluni-llu, tua-i camek qanrutenritaa unuaquan tau͡gaam.

³⁷Tua-i-llu, taangiqenrian, qanrutaa tamalkuitnek. Nal'aqertuq-llu temii pekcesciiganani.

³⁸Erenret-llu tayima qulen kinguatni ATANREM agturaa Nabal-aq tuquluni-llu.

³⁹David-aam niicami Nabal-aq tuquniluku, qanertuq, “Nanraumali ATANEQ! Akinauraa Nabal-aq picurlallranek wangnun wiinga-llu kevgamini picurlagcetevkenii. ATANREM anucimirqecetaaraa Nabal-aq umyuarrliqellranek.” Tua-i-llu, David-aaq ayagceciuq qanermek kassuucugluku Abigail-aq.

⁴⁰Pistain ullagaat Carmel-aami qanrulluku-llu, “David-aam taivkaraakut ellminun taicesqelluten nuliqsugluten.”

⁴¹Abigail-aq palurtuq nunamun qanerluni-llu, “Wiinga kevgaugua elliinun, upingalua pistain it'gaitnek erurillerkamnun.”

⁴²Egmian nangertuq ekluni-llu ciulvaminun. Maligluni tallimanek kevgaminek, maligtai David-aam pistai, David-aam-llu nuliqsagutaa.

⁴³David-aaq nulirtullruuq Ahinoam-aamek Jezreel-armiumek, tua-i-llu cali waniwa Abigail-aq nuliqsagulluku.

⁴⁴Tamatum-llu nalliini, Saul-aam tunellruluku panini Michal-aaq, David-aam nuliaqellra, Palti-mun qetunraanun Laish-aam, kingunelegmek nunarriinek Gallim-aam.