Read Yupik 1 Samuel 27 Bible Online

1 Samuel 27 - Yupik bible

1 Samuel 27

¹David-aaq ellminek qanrutuq, “Erenret makut iliitni Saul-aam tuquciiqaanga. Assinruciquq wangnun qimakuma Philistia-mun. Saul-aam yuanrirniaraanga Israel-aami, wiinga-llu camek aarniunritniartua.”

²Tua-i David-aaq anguyagten̄i-llu tiissitsaam avga yuinarnek tallimanek cipluku (600) amllertalriit egmian ayagtut Achish-amun qetunraanun Moach-am, angayuqranun Gath-am.

³David-aaq anguyagten̄i-llu nunalgartut tuani Gath-ami nakmiin ilateng ilakluki. David-aam nuliagni malruk malikak, Ahinoam-aaq Jezreel-armiu, Abigail-aq-llu, aipaineq Nabal-am kingunra, Carmel-aarmiu.

⁴Saul-aam niicami David-aaq qimallruniluku Gath-amun, taqaa yuanermek.

⁵David-aaq qanertuq Achish-amun, “Yugnikekuvnga, nunacuarmek cikirnga uitavigkamnek. Canricaaquq, wiinga uitallgutkenrilengramken atanruvigmi nunarpagmi.”

⁶Tua-i Achish-am cikiraa nunacuarmek Ziklag-amek, man'a-llu pitekluku Ziklag-aq nakmiillaqaat angayuqrin Judah-m tuakenirnek.

⁷David-aaq Philistia-mi uitallruuq iraluni akimiaq ataucimek cipluku.

⁸Tamatum nalliini David-aam anguyagten̄i-llu curulallruit yui Geshur-aam, Girzi-m, Amalek-aam-llu, tamakumiungumallret nunami ak'anun. Alangiilluki curugaqluki nunait yaaqsilria Shur-aq tekilluku, ak'akik-llu camavet Egypt-aamun,

⁹tuqurqelluki tamalkuita angutet arnat-llu tegularluki-llu qusngit, kuluviit angucalut, ciulviit, qulugtellriit-llu ungungssit, aturaungraata-llu. Utertaqluni Achish-amun,

¹⁰taum aptaqluku, “Natmun maa-irpak ayallrusit?” David-aam-llu qanrulluku ayallruniluni ungalalirneranun Judah-m wall'u nunautiitnun ilakellriarin Jerahmeel-am wall'u nunautiitnun Kenite-at uitaviata.

¹¹David-aam tuqurqaqluki yuut tamalkuita, angutet arnat-llu, kina uterrluku Gath-amun qanemcisqevkenaku qaillun anguyagten̄i-llu piqapiarallratnek. Waten waniwa David-aaq pillrulliniuq Philistia-mi uitallmi taktaciatun.

¹²Achish-am kemyukaa David-aaq qanrulluni, “Cakneq eq'ukumallni pitekluku nakmiin yum'inek Israelite-anek qaillun piviinani kevgiurciqaanga unguvallmi taktaciatun.”