Read Yupik 1 Samuel 28 Bible Online

1 Samuel 28 - Yupik bible

1 Samuel 28

¹Tamatum kinguani Philistine-at quyurtait anguyagteteng anguyagnaluku Israel-aaq, Achish-aq-llu qanertuq David-aamun, “Taringumakina anguyagteten-llu callugarkaucirci wiinga ililirlua.”

²“Aa-ang,” David-aaq kiuguq. “Wiinga kevgaqerpenga, tungaunaku-llu tangerciqan qaillun piyugngalqa.” Achish-aq qanertuq, “Assilliniuq! Nakmiin wiinga murilkesteksaguteqataramken.”

³Wani-wa Samuel-aaq tuqullruuq, tamarmeng-llu Israel-aat angniilutkellruluku tungmaggluku-llu Ramah-mun, nakmiin nuniinun. Saul-aam-llu antellrui ciunerkarcutulit angalkumirtaatulit-llu Israel-aamek anesqelluki.

⁴Philistine-at anguyagtet quyurtut pelatekiurluteng-llu yaaqsinrilkiinun nunarraam Shunem-aam; Saul-aam-llu quyurtai Israel-aam yui pelatekiurluteng-llu Ingrimi Gilboa-mi.

⁵Saul-aam tangllermini anguyagtait Philistine-at, cakneq alinguq,

⁶taumek aptaa ATANEQ qaillun pillerkaminek. Tau͡gaam ATANEQ kiunrituq carraungraan, qavangukun wall'u atullrakun Urim-aankuk Thummin-aaq-llu (qigcignarqellriit agayulirtet qemangqatukait qat'gailitameggni tamakut-llu aturluki nallunriraqluku Agayutem pisqutii) wall'u prophet-aatgun.

⁷Tua-llu Saul-aam ellimerrai atanerruani, “Kiarucia arnamek ciunerkarcurtem̄ek, wiinga ullagluku apqauryarturniarqa.” “Endor-ami ataucimek pitangqertuq,” ellait kiugut.

⁸Tua-i Saul-aaq nallunarcartuq ellminek; allanek aturanek at'uq, tan'gerian-llu ayagtuq malrugnek anguyagtegminek maligluni arnaq tangerrsarturluku. “Kangiituucisnga anernernun qanrullua-llu qaillun piarkamek,” tauna qanrutaa, “Qayagaurru anernera angutem aterpagtellma.”

⁹Tauna arnaq kiuguq, “Ilumun nallunritan Angayuqam Saul-aam qaillun pillrucia, qaillun qessangraata ayagcetellrucianek ciunerkarcutulit angalkumirtaatulit-llu Israel-aamek. Ciin-mi, tua-i, napcetengnaqlua tuqutauvkangnaqsia?”

¹⁰Tua-i-llu Saul-aam arnaq akqaa, “Unguvalriakun ATANERKUN akqiunga anucimirqetaarumangaituten watnallren pitekluku.”

¹¹“Kitumek qayagaurutqatarciken?” tauna arnaq aptuq. “Samuel-aamek,” ellii kiuguq.

¹²Arnam tangrramiu Samuel-aaq, aarpagtuq qanerluni-llu Saul-aamun, “Ciin picirkartuyarucia? Elpet Angayuqauguten Saul-aaq!”

¹³“Alingenrilu!” angayuqam qanrutaa. “Camek tangercit?” “Tangertua anernermek pugelriamek nunamek,” arnaq kiuguq.

¹⁴“Qaillun tangellra ayuqa?” aptaa. “Angukara'urluuguq alailria,” kiuguq. “Ulikutamek aturluni.” Tua-i Saul-aam nallunriraa Samuel-aarucia, palurtuq-llu nunamun qigcigyugluni.

¹⁵Samuel-aaq qanertuq Saul-aamun, “Ciin uitacurlagcecia? Ciin utercecia?” Saul-aaq kiuguq, “Wiinga angtuamek arenqiallugingaunga! Philistine-at anguyagaatnga, Agayutem-llu cakaarlua. Kiunanrirlua, prophet-aatgun, qavangutgun-llu. Taumek qayagauqemken, elpenun qanrucesqellua qaillun pillerkamnek.”

¹⁶Samuel-aaq qanertuq, “Ciin qayagaurcia ATANREM ulullrukaten ingluksagulluten-llu?

¹⁷ATANREM piaten qanrutlerminek elpet tumeklua: tegullrua angayuqauvik elpenek tunluku-llu David-aamun.

¹⁸Elpet narurtellruan ATANREM alerquutii nangenqegcaarluki piunrinritlerpegun Amalek-aat tamalkuita-llu cautait. Taumek waten ATANREM pikiiten watua.

¹⁹Tunciqaatek elpet Israel-aaq-llu Philistine-anun. Unuaqu qetunraten-llu ullagciqerpecia, cali-llu Israel-aam anguyagtai ATANREM tunciqai Philistine-anun.”

²⁰Egmianun Saul-aaq iquuq nengingaluni-llu nunami, cakneq alingluni Samuel-aam qanrutellranek. Pinianani, camek nereksailami ernerpak unugpak-llu.

²¹Arnam-llu ullagaa tangerrluku-llu alingqapiarallra, taumek qanrutaa, “Kitaki, angayuqaaq, unguvaka qevvluku pisqellerpetun pillruunga.

²²Niiskiu pisqelqa. Neqkiuqerlaken. Nernarqaaten piningqerrniartuten pektaullerpeni.”

²³Saul-aaq niicuumiituq qanerluni-llu ellii camek nerngaitniluni. Tau͡gaam atanerruarin kiikirturaat neresqelluku. Cayaqlirluni tua-i niituq, nangertuq-llu nunamek, aqumluni-llu inglernun.

²⁴Arnam cukangnaqluni tuqutaa kuluvayagaq uqungcallni. Mukaamek-llu piluni, uptaa, kelipiluni-llu quleciryaraunaku.

²⁵Ellii neqet Saul-aam atanerruarin-llu ciuqerratnun, nerait-llu. Ayagluteng-llu tuani unugmi.