Read Yupik 1 Samuel 29 Bible Online

1 Samuel 29 - Yupik bible

1 Samuel 29

¹Philistine-at quyurtait tamalkuita anguyagteteng Aphek-aamun, Israel-aam yui pelatekiurumallratni ulevlami Jezreel-am Kuignayuani.

²Talliman Philistine-at angayuqrit ayagtut anguyagteteng-llu ilait yuinaat tallimaugaqluteng (100) tiissitsaaruaqluteng-llu (1,000) anguyagtet; David-aaq anguyagten̄i-llu ayagtut kingunratgun maliggluku Angayuqaq Achish-aq.

³Philistine-at atanirturtaita tangrrait apluteng-llu, “Caliat makut Hebrew-t maani?” Achish-aq kiuguq, “Una David-aaruuq, atanerruara Angayuqam Saul-aam Israel-aami. Nayullrurtaanga akaarnun maa-i. Camek taquteksaituq canganarqutkaminek tairraanerminek wangnun.”

⁴Tau͡gaam Philistine-at atanerruarita qenrutaat Achish-aq qanerluteng-llu elliinun, “Utercessgu tauna angun nunakiutellerpenun. Maligcecaqunata anguyagyartuqumta; anguyausnginanemten̄i ingluksagucuaraakut. Cakun-qaa allakun angayuqaminun cayuumaksagutenqigtellerkaituq tuqurqillermikun tau͡gaam anguyagtemten̄ek?

⁵Tua-i-wa, una imuuguq David-aaq, arnat atuutekellrat, yurarluteng tuaten, ‘Saul-aaq tuquciuq tiissitsaarugarnek (1,000s), tau͡gaam David-aaq qulnguaqluki tiissitsaarugaat.’” (10,000s)

⁶Achish-am taisqaa David-aaq qanrulluku-llu, “Piciulua qanertua unguvalriakun Agayutiikun Israel-aam elpet piciullruniluten wangnun; quyalua-llu maliksaramken callugyarturlua anguyagmi. Camek picurlautmek nataquteksaitua elpeni tairraanerpenek wangnun. Tau͡gaam allat angayuqat ciuniunritaatgen.

⁷Taumek uterten kingunerpenun nepaunak, camek-llu taqucaqunak umyugaita qiperrlutekaatnek.”

⁸David-aaq-llu kiuguq, “Camek picurlallrusia? Tua-i qanllerpetun, camek nataquteksailkuvet picurlallemnek wangni ernermek ayaglua kevgiungerraanemnek, ciin maligcesciigacia elpet, angayuqamni, callugluki-llu ingluten?”

⁹“Wiinga umyuallguciramken,” Achish-aq kiuguq. “Wiinga umyuarteqlemni piciuguten an'gilaatun Agayutem. Tau͡gaam allat angayuqat qanertut maligcesciigatniluta anguyagmun.

¹⁰Taumek, David-aaq, unuaqu unuakumi elpeci tamarpeci Saul-aaq unilluku taillerni wangnun makcara'arluci tanqigiarauciatun ayakici.”

¹¹Tua-i David-aaq anguyagten̄i-llu ayagyara'artut unuaquan unuakumi uterrluteng Philistia-mun, Philistine-at-llu ciumurrluteng Jezreel-amun.