Read Yupik 1 Samuel 3 Bible Online

1 Samuel 3 - Yupik bible

1 Samuel 3

¹Tamakuni ernerni, tan'gaurluum Samuel-aam kevgiullrani ATANEQ, Eli-amek ayuqucirtuasterluni, amllellrunritut qanrutkesqumalriit kingunelget ATANERMEK, tangrruarcetellri-llu nurnarluteng.

²Unuut iliitni Eli-aq, takviarulluni cikmiqatarluni, qavartuq qavarvimini;

³Samuel-aaq qavarluni agayuvigpagmi, qigcignarqellriim Akqutem Yaassiigan uitaviani. Erqaarpailgan, kenurraq cali kumaluni,

⁴ATANREM qayagauraa Samuel-aaq. Kiuguq-llu “Aa-ang!”

⁵aqvaqurluni-llu Eli-amun qanertuq, “Qayagauravnga, taigua wani-wa.” Tau͡gaam Eli-aq kiuguq, “Qayagaunritamken; inarcartua.” Tua-i ataam Samuel-aaq inarcarturtuq.

⁶ATANREM qayagaunqigtaa Samuel-aaq. Tan'gaurluum nallua ATANERMUN picini, tua-i-wa ATANREM ciungani qanruteksailani. Tua-i maktuq, Eli-aq-llu ullagluku, qanertuq, “Qayagauravnga, taigua.” Tau͡gaam Eli-aq kiuguq, “Qetunramaa, qayagaunritamken; inarcartua.”

⁸ATANREM qayagauraa Samuel-aaq pingayiriluni; maktuq, ullagluku-llu Eli-aq qanerluni, “Wani-wa taigua qayagauravnga.” Nutaan Eli-am taringaa ATANERMUN qayagaulaucia tan'gaurluq,

⁹taumek qanrutaa, “Inarcartua; qayagaunqigeskaten, qanerniartuten, ‘Qanra, ATANEQ, pisten niicugniuq.’” Tua-i Samuel-aaq inarcartunqigtuq.

¹⁰ATANEQ tailuni nangerngaluni qayagaunqigtaa, “Samuel-aaq! Samuel-aaq!” Samuel-aaq kiuguq, “Qanra; pisten niicugniuq.”

¹¹ATANEQ qanertuq elliinun, “Cam iliiniku camek imumek taquteqatartua Israel-aam yuinun assinritqapigcan-llu niitellriit tamarmeng tatameciqut.

¹²Tuani ernermi tuc'eciiqanka tamalkuita akeqnerrlugutellrenka Eli-am nakmiin ilainun, ayagnillranek ayagluku iquklitellranun.

¹³Ak'a qanrutellruaqa anucimirqecetaaqatarniluki nakmiin ilai akwarpak tua-i-wa qetunrai qalartellruata assiitqapiaralrianek wangnun. Eli-am nallunritellruyaaqluku watnallrat, tau͡gaam inerqullruvkenaki.

¹⁴Taumek piciulua qanertua Eli-am nakmiin ilainun ekuagarkamun wall'u elliitmun au͡g'arngailucia mat'um pinarqutii assiitqapiaraam assiilnguum.”

¹⁵Samuel-aaq inangqauq unuakurvianun; tua-i-llu makluni ikirqai amiigi ATANREM eniin. Alinguq-llu qanrutlerkaanek Eli-aq tangrruamek.

¹⁶Eli-am qayagauraa, “Samuel-aaq, qetunramaa!” “Aa-ang,” kiuguq Samuel-aaq.

¹⁷“Camek ATANREM qanrutaten?” Eli-aq aptuq. “Aassaqucaqunii. Agayutem anucimirqecetaarciqaaten assiitkapigtellriamek qanrutenrilkuvnga tamalkuitnek qanellrinek.”

¹⁸Tua-i Samuel-aam qanrutaa tamalkuitnek; iliitnek-llu iirutevkenaku. Eli-aq-llu qanerluni, “Ellii ATANRUUQ; elliin assikellermitun caliaqeciqaa.”

¹⁹Samuel-aaq-llu anglillrani, ATANREM nayuraa qanellri-llu Samuel-aam tamalkuita piciurcetai.

²⁰Tua-i tamarmeng-llu Israel-aam yuin, nunameng iquanek ayagluteng iquanun, nallunriraat ilumun Samuel-aaq prophet-aaqucianek ATANERMUN.

²¹ATANEQ-llu pulengtaq nallunailartuq Shiloh-mi, alairvillermini Samuel-aamun ellii-llu qalarulluku. Samuel-aaq-llu qanraqan Israel-aam yui tamarmeng niicugnilartut.