Read Yupik 1 Samuel 30 Bible Online

1 Samuel 30 - Yupik bible

1 Samuel 30

¹Erenrek malruk kinguagni David-aaq anguyagten̄i-llu tekitut Ziklag-amun. Amalekite-at curullrulliniat ungalalirnera Judah-m anguyagluku-llu Ziklag-aq. Ekuavkarluku-llu nunarraq

²teguluki-llu arnat tamalkuita; kitumek tuqucillruvkenateng, tau͡gaam yuut ayaulluki tamalkuita ayiimeng.

³Tua-llu David-aaq anguyagten̄i-llu tekicameng, tangrraat nunarraq ekuamaluni nulirrit-llu, qetunrait, paniit-llu ayautellrulliniluki.

⁴David-aaq anguyagten̄i-llu qiagut mernupiangameng tau͡gaam taqluteng.

⁵David-aam-llu nuliak malruk tamarmek ayautellrullinilukek.

⁶David-aaq tua-i waniwa arenqiallugterpagtuq, tamarmeng anguyagten̄i angtuamek angniilata irniameggnek tamarilteng pitekluku, akeqnerrlualuku-llu teggalqunek miluquyugluku; tau͡gaam ATANREM elliin Agayutiin pinimek cikiraa.

⁷David-aaq-llu qanertuq Abiathar-amun agayulirtem̄un qetunraanun Abimelech-aam, “Taisgu as'arcen̄a'ar qat'gailitaq,” Abiathar-am-llu taitaa elliinun.

⁸David-aam-llu kangiiturvikaa ATANEQ, “Kingunrirturlaki-qaa au͡gkut uayaaritulit? Anguyugngaanka-llu-qaa?” Ellii kiuguq, “Kingunrirturki; anguciqaten anauciiqaten-llu teguat.”

⁹Tua-i David-aaq anguyagten̄i-llu tiissitsaam avga yuinarnek tallimanek cipluku (600) ayagtut, tekicameng-llu Kuiggarmun Besor-amun, ilait tuavet unegtut.

¹⁰Tua-i David-aaq arulairpek'nani ayagtu'rtuq maligluni yuinarnek yuinarnek (400) anguyagten̄ek; allat yuinaat qulen (200) mernussiyaagameng qerallerkameggnek kuicuar unegtut.

¹¹Anguyagtet David-aam malii nalaqutut Egypt-aarmiumek ayagyuamek yuilqumi David-aamun-llu ullaulluku. Cikiraat neqkamek mermek-llu,

¹²kinertarnek-llu fig-anek, malrugnek-llu qillerqaagnek issuumanek. Nererraarluni, piniriqertuq; camek nereksaitellrulliniuq wall'u meqsaunani ernerni pingayuni.

¹³David-aam aptaa, “Kituuga angayuqan, camiungusit-llu?” “Egypt-aarmiunguunga, pisten͞gulua Amalekite-amun,” kiuguq. “Angayuqama unitellruanga amatiinim yaatiini naulluulqa pitekluku.

¹⁴Curugluku uayallruaput nunautiit Cherethite-at ungalalirnerani Judah-m nunautiit-llu ilakellriarin Caleb-aam, ekuavkallruaput-llu Ziklag-aq.”

¹⁵“Ayaucugngaavnga-qaa taukunun uayaaristen̄un?” David-aam aptaa. Ellii kiuguq, “Piciqamken Agayutem atrakun akqekuvnga tuqusngaitnilua wall'u tunngaitnilua angayuqamnun.”

¹⁶Ayautaa-llu David-aaq taukunun. Uayaaristet uitaut sagingaluteng tamaani, nerluteng, merluteng, angnirluteng-llu amlleqapiaraat tegukengateng pitekluki Philistia-mek Judah-mek-llu.

¹⁷Erqaarallrani unuaquan David-aam curugai anguyagluki-llu atakurvianun. Taukut-llu yuinaat yuinaat (400) yun'erraat qulugtellrianun ungungssinun ekluteng ayakallret avatiitni, kitumek qimagluni ayalriartaituq.

¹⁸David-aam anirturai yuut tamalkuita pikliutenqiggluki-llu tamalkuita aklut-llu Amalek-aat tegullrit, nuliagni-llu malruk tapeqlukek;

¹⁹ca carraungermi cataitevkenani. David-aam ut'rutai tamalkuita anguyagtem̄i qetunrait paniit-llu, aklut-llu tamalkuita Amalek-aat tegullrit.

²⁰Tegunqigtai-llu tamalkuita katngiit; anguyagtain ayautait ungungssit tamalkuita ciuqliqluki qanertut-llu, “Ukut David-aamek pikestengqertut!”

²¹Tua-llu David-aaq utertuq imkunun yuinarnun qulnun (200) angutnun piniatessiyaagluteng maligucesciiganateng unegtellernun kuicuarmi Besor Brook-ami. Taigut-llu pairrsaagluki David-aankut anguyagtai-llu, David-aam-llu ciuniurai angnirluni.

²²Tau͡gaam umyuarrliqellriit pikegtaunrilnguut-llu anguyagtet David-aam malillri qanertut, “Maligtellrunrilatkut, cikirngaitaput ilaitnek uayaaramta. Tegurraarluki nuliateng irniateng-llu ayagniartut.”

²³Tau͡gaam David-aaq kiuguq, “Anelgutemni, waten pinarqenrituci ATANREM wangkutnun cikiutellrinek! Qaunqellruakut cirlakutmek-llu cikirluta uayaaristen̄un.

²⁴Kia imum ciuniurngaitaa qanelci! Tamarmeng tuvqakutarkaugut: kina imna uneggluni aklut nayullrukaki ayuqluku cikiumaciquq pikaanek ayagluni anguyalleq pitacirluku.”

²⁵David-aaq mat'umek picirkiutmek taqutuq, tuakenirnek-llu piciryaraqluku Israel-aami.

²⁶David-aaq utercami Ziklag-amun, ayauceciuq tegukengameng ilaitnek yugnikek'ngaminun, ciuliqagtainun Judah-m, qanercirluki, “Wani-wa cikiun elpecen̄un uayaaramten̄ek ATANREM inglukestainek.”

²⁷Ayaucetai Bethel-aam yuinun, Ramah-m yuinun ungalalirnerani Judah-m, nunarraat-llu yuitnun Jattir-aami,

²⁸Aroer-aami, Siphmoth-aami, Eshtemoa-mi,

²⁹Racal-aami-llu; ilakellriarinun Jerahmeel-am, Kenite-anun,

³⁰yuinun-llu nunarraitni Hormah-m, Borashan-aam, Athach-aam,

³¹Hebron-aam-llu. Ayagceciuq tamalkuitnun nunanun anguyagten̄i-llu ayagavillermeggnun.