Read Yupik 1 Samuel 31 Bible Online

1 Samuel 31 - Yupik bible

1 Samuel 31

¹Philistine-at anguyagtut inglukluki Israel-aat Ingrimi Gilboa-mi. Amlleret Israel-aam yui tuani tuqucimaut, ilait-llu, Angayuqaq Saul-aaq qetunrai-llu ilakluki qimagtut.

²Tau͡gaam Philistine-at anguluki pingayun Saul-aam qetunrai tuqutait, Jonathan-aaq, Abinadab-aq, Malchishua-llu.

³Callullrat tukniuq Saul-aam avatiini, ellii-llu nall'artaat ingluin pitegcautiita cakneq akngirrluku.

⁴Qanrutaa-llu yun'erraq saskumi tegumiaqestiit, “Amuluku nuussirpiin tuqusnga, makut agayumanrilnguut Philistine-at ciriteklua tuqutenritniaraatnga.” Tau͡gaam yun'erraq tuaten pillerkaminek alingeqapiartuq. Taumek Saul-aam nakmiin nuussirpani tegua ellminek-llu tuavet iqulluni.

⁵Yun'erraam tangrramiu Saul-aam tuqucia, ellii-llu iqulluni nakmiin nuussirpaminun tuqullgutekluku-llu Saul-aaq.

⁶Tua-i tuaten Saul-aaq, pingayun qetunrai, yun'erraq-llu tuqullruut; tamarmeng Saul-aam anguyagtai tuquluteng tuani ernermi.

⁷Tua-i Israel-aam yui akilirnerani Kuignayuan Jazreel-aam calaralirnerani-llu Kuigem Jordan-aam niicameng Israel-aam yui anguyagtet qimagniluki Saul-aaq-llu qetunrai-llu tuquniluki, nunarrateng cakaarluki qimagtut. Philistine-at-llu tekilluteng nunarraat tamakut yiirait.

⁸Unuaquani anguyallmeng Philistine-at ayagtut tuqumalriit uayaryarturluki akluitnek, nalaqait-llu Saul-aaq qetunrain-llu temait cailkami taklarmeng Ingrimi Gilboa-mi.

⁹Qamiqurriraat Saul-aaq, akngircailkutairluku, kevganun-llu ayagatevkarluku Philistia-q qaqilluku qanrutkesqelluku qanemcikegtaar agayutnguaritnun yuitnun-llu.

¹⁰Tua-i-llu saskui elliluki agayuvianun agayutnguarata arnam Astarte-am, ussukcaulluku-llu temii qacarnermun avapailitaanun nunarpiim Beth Shan-am.

¹¹Niitellermeggni yui Jabesh-aam Gilead-aami mat'umek Philistine-at pillratnek waten Saul-aamun,

¹²alingilqurrait angutet ayagtut arulaiqsaunateng unugpak Beth Shan-amun. Atrartait temait Saul-aam qetunrain-llu qacarnermek, ut'rutait Jabesh-aamun, ekuavkarluki-llu tuani.

¹³Enrit-llu teguluki elaulluki napacuaraam tamarisk-aam acianun nunarrarni, yagluteng-llu nereksaunateng ernerni malrunlegni.