Read Yupik 1 Samuel 4 Bible Online

1 Samuel 4 - Yupik bible

1 Samuel 4

¹Taum nalliini Philistine-at quyurtut anguyagyartuqatarluteng Israel-aamun, tua-i Israel-aam yui ayagtut callugyarturluki. Israel-aam yui pelatekiurtut Ebenezer-aami Philistine-at-llu Aphek-aami.

²Philistine-at curuameng, callugluki cirlakait Israelite-at tuquciluteng-llu tiissitsaat cetaman nuniitni (4,000) angutnek tamaani anguyagvimeggni.

³Tuqutenritellrit-llu tekicata uitavimeggnun, ciulirnerit Israel-aat qanertut, “Ciin-kiq ATANREM cirlakevkartakut Philistine-anun unuamek? Ataki ATANREM Akqutiin Yaassiiga taiteqerlarput maavet Shiloh-mek, elliin maliggluta anagyaaqutniaraakut inglumten̄ek.”

⁴Tua-i ayagceciluteng kevganek Shiloh-mun taitaat ATANREM Artuqailnguum Akqutiin Yaassiiga, aqumllerciumalria quliigni cherubim-aak.[4] Eli-am-llu malruk qetunraak, Hophni-nkuk Phinehas-aaq-llu, maliggluku Akqutem Yaassiiga taiguk.

⁵Tua-i-llu Yaassiiga Akqutem tekiucatgu, tamarmeng Israel-aat angnimek qastuluteng qayagpiita nuna qiivuq.

⁶Tua-i Philistine-at niitaat qayagpagallrat qanerluteng-llu, “Niiciki qayagpagalriit Hebrew-t arulaingqaviatni! Ca pitekluku piat?” Nallunriameng ATANREM Akqutem Yaassiiga tekiuyuciat Hebrew-t arulaingqaviatnun,

⁷alingut, qanerluteng-llu, “Agayun tekituq arulaingqaviatnun.” Qanertut-llu, “Nakleng wangkuta! Waten ayuqellriim ciungani tekiteksaitakut!

⁸Kia aviuciiqakut piniatnek makut pinilriit agayutet? Makut agayutet nalarpagcetellruit Egypt-aarmiut ayuqenrilngurteggun cangerlagteggun yuilqumi!

⁹Cacetuluci, Philistine-ani! Angutet pilauciicetun callugluci, pisten͞gurcuartukut Hebrew-nun, ellait pistekellrucimcetun. Taumek callugci angutet pilauciicetun!”

¹⁰Tua-i Philistine-at callugtut pitacirramegcetun Israel-aat-llu cirlakluki, qimagtut-llu qingunermeggnun. Amlleret-llu tuqurpagtut: yuinaq qulmek cipluku tiissitsaat (30,000) tuqucimallruut.

¹¹Agayutem-llu Akqutiin Yaassiiga tegumauq, Eli-am-llu qetunraak Hophni-nkuk Phinehas-aaq-llu, tamarmek tuqutauguk.

¹²Angun ilakellriarinek Benjamin-aam aqvaqurturluni anguyalrianek Shiloh-mi ayagtuq tekilluni-llu tuani ernermi. Angniitellni-llu maniluku, aturani allgullrulliniluki urr'arrluku-llu qamiquni.

¹³Tuani tekitellrani, Eli-aq aqumllemini tumyaram mengliini aqumgallruuq kiarqurluni, ircaqurrlugcani Agayutem Yaassiiga pitekluku. Angutem-llu sagtaa man'a qanemciq tamalkuan nunanun, yuut-llu tamarmeng nepngartut alingluteng.

¹⁴Eli-am niitaa nepiit apluni-llu, “Ca pitekluku neplirtat?” Angun-llu cukangnaqluni taiguq qanrulluku-llu Eli-aq.

¹⁵(Eli-aq wani-wa yuinaat cetaman akimiaq pingayunek cipluku (98) allrakungluni takviarutqapiarluni-llu.)

¹⁶Angun qanertuq Eli-amun, “Ayakallruunga anguyagmek ernerpak-llu aqvaqurturlua maavet tekillua.” Eli-am-llu aptaa, “Qaillun piat, qetunramaa?”

¹⁷Qanemcimek taitellria kiuluni qanrutaa, “Israel-aat qimallruut Philistine-anek; amlleqapiaraat tuqucimaut! Taukut-llu avatiitni, qetunraagken Hophni-nkuk Phinehas-aaq-llu tuqutaullruuk, Agayutem-llu Akqutiin Yaassiiga tegumaluni!”

¹⁸Qanrutkellrani Akqutem Yaassiiga, Eli-aq qetkallagtuq aqumlleminek caniani ikirtuqam. Ak'allaussiyaagami-llu uquriluni-llu igcami ayimtaa uyaquni, tuquluni-llu. Ciuliqagten͞gullruluni Israel-aami allrakuni yuinaak malruk (40) aturlukek.

¹⁹Eli-am ukurrii, nulirra Phinehas-aam, qingartuq, irniniararluni-llu. Niitellermini Agayutem Akqutiin Yaassiiga tegumaniluku, cali-llu cakimi uimi-llu tuquciak, alqunaq nep'ngutaa irniluni-llu.

²⁰Tuquqataan, arnat ikayurtain qanrutaat, “Piningnaqluten! Qetunranguten!” Tau͡gaam murilkenrituq kiuvkenani-llu.

²¹Aciraa-llu mikelnguq Ichabod-amek,[5] qanerluni-llu, “Agayutem ucurnarqucian unitaa Israel-aaq!” Akqutem Yaassiigan tegumallra wani qanrutkaa cali-llu cakimi uimi-llu tuqullrak pitekluku.

²²“Agayutem ucurnarqucian unitaa Israel-aaq,” ellii qanertuq, “Agayutem Akqutiin Yaassiiga tegumiin.”