Read Zarma Genesis 11 Bible Online

Genesis 11 - Zarma bible

Genesis 11

¹Ndunnya kulu binde, i deene fo, ciyaŋ folloŋ mo.

²A go mo, waato kaŋ i goono ga dira ka koy wayna funay haray, kal i di batama fo Sinar laabo ra. I goro noodin mo.

³Kal i ne care se: «Iri ma koy ka fareeje kar k'i ton hal a ma boori gumo.» Fareejey binde te i se tondi, botogo mo te i se siminti.

⁴I ne: «Iri ma koy ka kwaara fo da cinari kuuku fo mo cina, kaŋ a boŋo ga to hala beena gaa. Iri ma te iri boŋ se maa hala iri ma si say-say ndunnya kulu ra.»

⁵Rabbi binde zumbu zama nga ma gallo guna, da cinaro kaŋ Adam-izey cina.

⁶Rabbi binde ne: «Guna i go dumi folloŋ, i deene fo mo. Hari kaŋ i sintin ka te neeya. Hay kulu si no mo kaŋ ga mongo i se haŋ kaŋ i ga miila ngey ma te ra.

⁷Iri ma zumbu k'i deeney diibi, i ma si faham da care sanni.»

⁸Yaadin no Rabbi n'i tunandi nd'a noodin, k'i say-say nangey kulu ndunnya ra, hal i fay da gallo cinayaŋo.

⁹Woodin sabbay se no i n'a maa daŋ Babila*, zama noodin no Rabbi na ndunnya kulu deeney diibi. Noodin mo no Rabbi n'i say-say ndunnya kulu ra.

¹⁰Sem bandey neeya: Sem te jiiri zangu, gaa no a na Arpaksadu hay tunfaana haro banda jiiri hinkanta ra.

¹¹Arpaksadu hayyaŋ banda koyne Sem te jiiri zangu gu. A na izeyaŋ hay, alboro nda wayboro.

¹²Arpaksadu te jiiri waranza cindi gu, gaa no a na Sela hay.

¹³Sela hayyaŋ banda koyne Arpaksadu te jiiri zangu taaci nda ihinza. A na izeyaŋ hay, alboro nda wayboro.

¹⁴Sela te jiiri waranza, gaa no a na Heber hay.

¹⁵Heber hayyaŋ banda mo, Sela te jiiri zangu taaci nda ihinza. A na izeyaŋ hay, alboro nda wayboro.

¹⁶Heber mo te jiiri waranza cindi taaci, gaa no a na Peleg hay.

¹⁷Peleg hayyaŋ banda mo Heber te jiiri zangu taaci nda waranza. A na izeyaŋ hay, alboro nda wayboro.

¹⁸Peleg mo te jiiri waranza, gaa no a na Rehu hay.

¹⁹Rehu hayyaŋ banda Peleg te jiiri zangu hinka nda yagga. A na izeyaŋ hay, alboro nda wayboro.

²⁰Rehu te jiiri waranza cindi hinka, gaa no a na Serug hay.

²¹Serug hayyaŋ banda mo, Rehu te jiiri zangu hinka nda iyye. A na izeyaŋ hay, alboro nda wayboro.

²²Serug mo te jiiri waranza, gaa no a na Nahor hay.

²³Nahor hayyaŋ banda mo Serug te jiiri zangu hinka. A na izeyaŋ hay, alboro nda wayboro.

²⁴Nahor mo te jiiri waranka cindi yagga, gaa no a na Tera hay.

²⁵Tera hayyaŋ banda mo Nahor te jiiri zangu nda iway cindi yagga. A na izeyaŋ hay, alboro nda wayboro.

²⁶Tera mo te jiiri wayye, gaa no a na Abram da Nahor da Haran hay.

²⁷Tera baarey neeya: Tera na Abram da Nahor da Haran hay. Haran mo na Lotu hay.

²⁸Haran jin ka bu nga baaba Tera se, laabo kaŋ ra i n'a hay, kaŋ ga ti Ur kwaara Kaldancey laabo ra.

²⁹Abram da Nahor mo na wandeyaŋ sambu. Abram wando maa ga ti Saray. Nahor wando mo maa Milka, Haran ize way fo no. Haran no ga ti Milka da Iska mo baaba.

³⁰Amma Saray wo waygunu no, a sinda ize.

³¹Tera mo na nga izo Abram da nga haama Lotu Haran izo sambu, da nga anzura Saray (sanda nga izo Abram wando nooya). A kond'ey nga banda ka fun Ur Kaldancey laabo ra, zama ngey ma koy Kanaana laabu. I to Haran kwaara, i binde goro noodin.

³²Tera jirbey jiiri zangu hinka nda igu no. Tera bu mo Haran ra.