Read Zarma Job 12 Bible Online

Job 12 - Zarma bible

Job 12

¹Gaa no Ayuba tu ka ne:

²«Sikka si araŋ no ga ti bayraykooney, Laakal mo ga bu araŋ banda!

³Amma ay mo gonda fahamay, manti araŋ hinne no bo. Yana gaze araŋ gaa. Day, man boro kaŋ si harey din dumi bay?

⁴I n'ay ciya danga boro kaŋ te haari hari nga coro se. Ay, boro kaŋ na adduwa te Irikoy gaa, A tu ay se mo. Adilante no ay, cimi toonante koy, I n'ay ciya haari hari mo.

⁵Boro kaŋ goono ga maa ndunnya kaani, A bina ra a ga donda masiiba ka ne a go soolante boro kaŋ ca ga ba ka tansi din se.

⁶Fondo kosaraykoy nangorayey ga te albarka, Borey kaŋ yaŋ ga Irikoy zokoti mo ga goro baani samay, I gonda ngey tooro mo ga gaay ngey kambey ra.

⁷Amma sohõ ni ma ganji hamey hã, I ga ni dondonandi mo. Beene batama curayzey mo ga ci ni se.

⁸Wala ma salaŋ ganda laabo se, a ga ni dondonandi. Teeku hamey mo ga dede ni se.

⁹Woodin yaŋ kulu ra, Man wo kaŋ mana bay kaŋ Rabbi kamba no ka woodin goy?

¹⁰A kambe ra no fundikooni kulu fundi bara, Hala nda Adam-izey kulu fulanzam funsuyaŋey.

¹¹Hanga, manti a ga sanni neesi no, Sanda mate kaŋ cine deene ga nga ŋwaaro taba?

¹²Laakal go arkusu zeeney do, Aloomar kuuku ra mo no fahamay bara.

¹³Irikoy se no laakal da hina bara, A do mo no saaware da fahamay go.

¹⁴A go, a ga zeeri, daama si no borey ma ye ka cina. A ga boro daabu, fitiyaŋ daama si no mo.

¹⁵A ga beene hari ganji, hala nango ma koogu, Koyne, a ga ye k'a taŋ mo, Hal a ma laabu ŋwa.

¹⁶Hina nda laakal si kal a se. Halliko da boro kaŋ a ga halli, ikulu a wane yaŋ no.

¹⁷A ga saawarekoy ku ka kond'ey, A ga alkaaley ciya saamoyaŋ.

¹⁸A ga bonkooney hawyaŋ sisirey feeri, K'i cantey haw da guddama.

¹⁹A ga alfagey ku ka kond'ey, A ga hinkoyey mo zeeri.

²⁰A ga sanni gonitaraykoyey dangandi, A ga dottijey fayanka ta i gaa mo.

²¹A ga donda-caray gusam koy-izey boŋ, A ga gaabikooney guddamey feeri.

²²A ga kubay ra gundu fisi ka kaa taray, A ga buuyaŋ biya bangandi taray kwaaray.

²³A ga ndunnya dumey ciya iboobo, a ma ye k'i halaci. A m'i yulwandi, ka kond'ey tamtaray mo.

²⁴A ga ndunnya boro beerey fahamay ta i gaa, A ga naŋ i ma te boŋdaray saaji ra naŋ kaŋ fondo si no.

²⁵I goono ga dadab kubay ra, kaari si no. A ga naŋ i ma dira ka teeni sanda boro kaŋ bugu cine.