Read Zarma Job 13 Bible Online

Job 13 - Zarma bible

Job 13

¹Guna, woodin yaŋ kulu no ay moy di, Ay hanga maa ka faham mo.

²Haŋ kaŋ araŋ bay, ay mo n'a bay, Yana gaze araŋ gaa bo.

³Kala day ya to d'ay sanno Hina-Kulu-Koyo do, Irikoy jine no ay ga ba ay m'ay sabaabo cabe.

⁴Amma araŋ wo tangari teekoyaŋ no, Safarikoy yaamo yaŋ no araŋ kulu.

⁵D'araŋ yadda, doŋ araŋ ma dangay day, sum! I ga woodin mo ye araŋ do laakal no.

⁶Sohõ wa maa ay sabaabo, Wa hanga jeeri ay me ŋwaarayyaŋo wo se.

⁷Araŋ ga Irikoy gaakasinay da cimi-jaŋay sanni, wala? Araŋ m'a gaakasinay no koyne nda diibi-diiba sanni, wala?

⁸Araŋ ga baar'a-baar'a te a se no? Araŋ ga faasa Irikoy se no?

⁹A boori nooya d'a na araŋ fisi ka kaa taray? Wala araŋ ga hin k'a fafagu sanda mate kaŋ cine i ga boro fafagu?

¹⁰Daahir no a ga kaseeti araŋ gaa, D'araŋ goono ga baar'a-baar'a te tuguyaŋ ra.

¹¹A beera si araŋ humburandi no? Wala a humburkuma joota si araŋ di?

¹²Araŋ sanney ciya sanda boosu cine, Araŋ sabaabey botogo wane yaŋ no.

¹³Wa dangay, wa fay d'ay hinne, ay ma salaŋ. Hay kulu kaŋ ga du ay, a ma soobay ka kaa.

¹⁴Ifo se no ay g'ay baso nama? Y'ay fundo daŋ kambey mo?

¹⁵Baa a g'ay wi, kulu nda yaadin ay ga de a gaa. Amma kulu nda yaadin ay ga kay ay cimo se a jine.

¹⁶Woodin mo ga ciya ay se faaba. Boro kaŋ siino ga may a se si koy a do.

¹⁷W'ay sanno wo hangan. Haŋ kaŋ ay ga ci mo, a ma furo araŋ hangey ra.

¹⁸Guna, ay n'ay kalima soola, Ay bay mo kaŋ ay ga ciya boro kaŋ sinda taali.

¹⁹Man bora kaŋ ga hin k'ay kakaw? D'a go no mo, kala ya dangay, y'ay fundo taŋ.

²⁰Hari hinka hinne no ni ma si te ay se: Woodin gaa no ay si tugu ni se.

²¹Ma ni kamba sambu ay boŋ sap-sap! Ma s'ay humburandi mo nda ni humburandiyaŋ harey.

²²Gaa no ni ma ce, ay mo ga tu. Wala ma naŋ ay ma ce, ni mo ma tu ay se.

²³Ay zunubey d'ay goy laaley, ngey boro marge no? Ni m'ay bayrandi nd'ay hartayaŋ d'ay zunubo mo.

²⁴Ifo se no ni go ga ni moyduma tugu ay se, Ni go ga ay himandi ni ibare no?

²⁵Kobto kaŋ haw ga gaaray no ni ga taabandi, wala? Ni ga subu patarmi kogo kankam, wala?

²⁶Zama sanni kaŋ yaŋ ga fortu no ni goono ga hantum ay boŋ. Ni goono mo g'ay tilasandi y'ay zankataray waate taaley alhakko tubu.

²⁷Ni goono mo g'ay cey daŋ bundu baka* ra. Naŋ kaŋ ay taamu kulu ni go g'ay batu. Ni goono ga hirri daŋ ay ce taamey se.

²⁸Ay ga hima hay fo fumbo kaŋ go ga halaci, Sanda kwaay kaŋ naana-baana ŋwa.