Read Zarma Job 17 Bible Online

Job 17 - Zarma bible

Job 17

¹Ay biya halaci, ay jirbey ban, Saaray hinne no ka cindi ay se.

²Daahir hahaaraykoyey go ay do, Ay g'ay moy basu i zokotiyaŋo gaa.

³Ya Irikoy, ma tolme jisi ni do ay se, Da manti nin, may no ga kay ay se binde?

⁴Zama ni na fahamay tugu i biney se, Woodin sabbay se no ni s'i beerandi.

⁵Boro kaŋ na nga corey amaana ŋwa zama nga ma du alhakku, Baa a izey moy ga te kubay-kubay.

⁶Irikoy n'ay ciya donda-caray hari borey se, I go no mo ga yollo tuf'ay se ay moyduma gaa.

⁷Ay mwa diyaŋ zabu ay bine sara sabbay se, Ay dabey kulu mo ciya sanda tuuri-nya bi cine.

⁸Boro adilantey ga te dambara nda woodin. Borey kaŋ yaŋ sinda taali ga tun ka gaaba nda ngey kaŋ yaŋ siino ga may Irikoy se.

⁹Amma adilanta ga koy nga koyyaŋ, Kambe hanantekoy mo ga soobay ka gaabu ka koy jine.

¹⁰Amma day wa ye ka kaa, araŋ kulu. Wa kaa day, Zama ay mana laakalkooni gar araŋ game ra.

¹¹Ay jirbey bisa, ay miila-miiley mo halaci, Hala nd'ay bina fongu-fongu yaŋey.

¹²Cin ga barmay ka ciya sanda zaari cine. I ga ne: ‹Kaari ga maan, baa kaŋ i go kubay ra.›

¹³D'ay na laakal ye Alaahara gaa, a ma ciya ay windi, Da mo ay n'ay daaro daaru kubay ra,

¹⁴D'ay ne saaray se: ‹Ni ya ay baaba no,› Wala d'ay ne nooni se: ‹Ni ya ay nya d'ay wayme no.›

¹⁵Man gaa binde haŋ kaŋ gaa ay ga laakal dake? Ay beeja mo binde, may no ga di a?

¹⁶Yongo ganda Alaahara no a ga koy, D'iri koy care banda ka fulanzam laabo ra.»