Read Zarma Job 18 Bible Online

Job 18 - Zarma bible

Job 18

¹Gaa no Bildad Suhi bora tu ka ne:

²«Waati fo no araŋ ga sanney wo dumi naŋ? Wa lasaabu day, a banda iri mo ga salaŋ.

³Ifo se no ni go ga iri himandi danga almanyaŋ, Ni do no iri go danga harramyaŋ cine?

⁴Nin wo, kaŋ na ni boŋ tooru-tooru ni futa ra, I ga ndunnya naŋ koonu ni sabbay se no, Wala i ga tondi hibandi ka kaa nga nango ra?

⁵Daahir i ga boro laalo annura wi, A danji beela kaaro mo ga gaze.

⁶Kaari kaŋ go a nangora ra din ga ciya kubay, Fitilla kaŋ go a boŋ beene din mo ga bu.

⁷A ce taamuyaŋo gaabo ga kankam, Nga bumbo saawara mo g'a soote ganda.

⁸Zama a cey ga kond'a wufa ra, A go no mo ga taamu kumsay boŋ.

⁹Hirrimi g'a di ce kondo gaa, Asuuta mo g'a gaay.

¹⁰I na korfo hirrimi tugu a se ganda, Guusu hirrimi mo go fondo boŋ.

¹¹Humburkumay beeri g'a humburandi kuray kulu. I g'a ce kondo ŋwa k'a gaaray.

¹²Haray g'a gaabo ŋwa, Masiiba go soolante a jarga.

¹³A g'a kuuro ŋwa, Oho, bu doori g'a dabey ŋwa.

¹⁴A nangora kaŋ gaa a ga de, a ra no i g'a hamay ka kond'a humburkumay bonkoono do.

¹⁵Haŋ kaŋ manti a wane no ga goro a windo ra, I ga sufar* say-say a nangora boŋ.

¹⁶A kaajey ga koogu ganda laabo ra, A kambey mo ga lakaw beene.

¹⁷Baa a gaa fonguyaŋ ga daray ndunnya ra, A si maa naŋ kwaara ra.

¹⁸I g'a gaaray ka kaa kaari ra ka kond'a kubay ra, I g'a gaaray hal a ma fun ndunnya ra.

¹⁹A ga jaŋ ize wala haama nga dumey ra, A sinda mo boro kulu kaŋ ga cindi a nangora ra.

²⁰Wayna kaŋay borey dambara nd'a alwaato, Sanda mate kaŋ cine wayna funay borey mo zici dumbu a sabbay se.

²¹Haciika, yaadin cine no borey kaŋ yaŋ sinda adilitaray nangora ga bara. Ngey kaŋ si Irikoy bay mo, I kayyaŋo do yaadin no a ga bara.»