Read Zarma Job 19 Bible Online

Job 19 - Zarma bible

Job 19

¹Ayuba tu ka ne:

²«Waati fo no araŋ g'ay fundo taabandiyaŋo naŋ? Araŋ m'ay bagu-bagu nda sanniyaŋ mo naŋ.

³Sorro way wo kulu araŋ goono g'ay foy no, Haawi mana araŋ di nda mate kaŋ cine araŋ goono g'ay zamba?

⁴Baa da cimi no ay na taali te, Ay taalo day si bisa ay boŋo boŋ.

⁵Hala day daahir boŋbeeray no araŋ goono ga cabe ay se, Ka cabe kaŋ ay masiiba no ga ti ay taali dakeyaŋo sabaabu,

⁶Kulu araŋ ma woodin bay: Irikoy no k'ay zeeri, Nga no ka nga wufa daaru k'ay windi.

⁷Ay goono ga wurru! Ay goono ga yoy-yoy! toonye sabbay se, Yoy-yoy! amma boro kulu siino ga maa. Ay na gaakasinay ce, amma ay mana du cimi ciiti.

⁸A n'ay fonda kosaray hal ay si du ka bisa, A na kubay sinji ay se fonda gaa.

⁹A n'ay darza kulu kaa ay gaa, Ka boŋtoba kaa ay boŋo gaa.

¹⁰A n'ay bagu-bagu kuray kulu, ay ban mo. A n'ay beeja dagu mo sanda tuuri-nya.

¹¹A na nga futa danjo diyandi ay boŋ, A n'ay ye nga yanjekaarey ra.

¹²A marga satey ga kaa care banda, Ka ngey fonda hanse zama ngey ma wongu nd'ay, I goono ga gata sinji k'ay nangora windi.

¹³A n'ay nya-izey moorandi ay gumo, Ay mo-ka-bayrayey mo n'ay fay waani.

¹⁴Ay dumey gaze, Ay goray corey mo dinya ay gaa.

¹⁵Borey kaŋ yaŋ ga zumbu ay kwaara, baa ay koŋŋey mo n'ay himandi sanda yaw cine. Ay ciya i se sanda mebaraw.

¹⁶Ay g'ay bannya ce, Amma a si tu ay se, Baa ay n'a ŋwaaray da sanni.

¹⁷Ay funsaro ciya hay fo yaw ay wando se, Ay ciya fanta hari ay nya ize gundey mo se.

¹⁸Baa zanka kayney go ga donda ay. D'ay tun ka kay, kal i m'ay wow.

¹⁹Ay saaware corey kulu no k'ay fanta, Ay baakoy mo bare ka wangu ay.

²⁰Ay biriyey go ga naagu ay baso nd'ay kuuro gaa. Da cat no ay du ka faaba.

²¹Hay! wa bakar ay se, wa bakar ay se, ya araŋ ay corey, Zama Irikoy kambe n'ay ham.

²²Ifo se no araŋ goono g'ay fundo gurzugandi sanda mate kaŋ cine Irikoy goono ga te? Ay gaa-baso mana wasa araŋ se bo?

²³Doŋ d'i g'ay sanney hantum! Doŋ day i m'i hantum tira fo ra!

²⁴Doŋ i m'i jabu tondi hantumyaŋ ra hal abada da guuru kalam, K'i kawaatimandi nda bidile.

²⁵Zama ay bay kaŋ ay Fansakwa gonda fundi, Kokor banda mo a ga kay ndunnya boŋ.

²⁶Ay gaaham woone halaciyaŋ banda, Kulu nda yaadin ay gaaham ra, ay ga di Irikoy.

²⁷Ay ga di a mo, ay bumbo, Ay moy no ga di a, manti mo sanda boro fo wane bo. Ay bina go ga yalla-yalla ay ra.

²⁸D'araŋ ne: ‹Mate kaŋ iri g'a fundo gurzugandi nd'a neeya!› Kulu sanno kaajo go ay do.

²⁹Kal araŋ ma humburu takuba araŋ boŋ se, Zama dukuri ga takuba ciito candi ka kande, Zama araŋ ma bay kaŋ ciiti hane go no.»