Read Zarma Job 20 Bible Online

Job 20 - Zarma bible

Job 20

¹Zofar Naama bora tu ka ne:

²«Woodin se no ay fongu-fongu yaŋey ga naŋ ay ma tu, Laakal tunay kaŋ go ay gaa sabbay se.

³Ay maa taali dakeyaŋo kaŋ n'ay haawandi, Amma ay fahama ra no ay biya go ga naŋ ay ma tu.

⁴Ni mana bay kaŋ za doŋ, Za waati kaŋ i na boro daŋ ndunnya ra,

⁵Boro laalo zamuuyaŋ wo, idunguriyo no? Borey kaŋ yaŋ si may Irikoy se mo, i farhã ya mo-ka-mi yaŋ no.

⁶Baa a beera to kala beene, A boŋo mo ma to beene burey gaa,

⁷Kulu nda yaadin a ga halaci no, Sanda nga bumbo wuro cine hal abada, Hala borey kaŋ yaŋ di a doŋ ga ne: ‹Day, man no a go?›

⁸A ga tun ka deesi ka daray sanda hindiri cine, I si ye ka di a koyne. Oho, i g'a gaaray sanda cin hindiri cine.

⁹Mwa kaŋ di a waato si ye ka di a koyne. A nangora mo si ye ka di a koyne.

¹⁰A kambey mo ga ngey duura yeti, A izey ga gomni ceeci talkey gaa.

¹¹A zankataray biriyey to nda gaabi, Amma nga nd'a no ga kani ganda laabo ra.

¹²Baa laala ga kaan a meyo ra, Wala baa a n'a tugu nga deena cire,

¹³Baa a n'a haggoy, a mana yadda nga m'a taŋ, Amma a n'a gaay nga me ra hala ka kaa sohõ,

¹⁴Kulu nda yaadin a ŋwaaro ga bare a gunda ra ka ciya gondi naaji a ra.

¹⁵A na arzaka gon, a ga ye k'a yeeri koyne. Irikoy no ga naŋ a m'a mun ka kaa nga gunda ra.

¹⁶A ga firsa naaji sunsum, Gondi deene no g'a zeeri.

¹⁷A si hari zuray goorey guna, Danga yu nda ji isey kaŋ yaŋ ga zuru nooya.

¹⁸Haŋ kaŋ a taabi ka du, Kal a ma ye k'a no, a s'a gon bo. A si farhã mo nda nga duura yulwayaŋ.

¹⁹Za kaŋ a na talkey kankam k'i furu mo, A windo, manti nga no k'a cina, A n'a kom no da gaabi kwaaray.

²⁰Zama a biniya ra a si laakal kanay bay, Haŋ kaŋ a ga ba gumo kulu no a si du ka baa afo faaba.

²¹Hay kulu si no kaŋ n'a biniya yana, Woodin se no a arzaka si duumi.

²²A arzaka yulwanta ra no a ga di kankami. Taabi hankoy kulu kambey ga kaŋ a boŋo boŋ.

²³A goono ga soola ka nga gunda toonandi nooya, Kala Irikoy ma nga futay korna gusam a boŋ. A g'a dooru a boŋ sanda hari cine, Woodin mo no ga ciya a ŋwaari.

²⁴A go zuray ra guuru wongu jinay se, Kala guuru-say biraw hayyaŋ g'a fun,

²⁵I goono g'a dagu, kal a ma fatta banda haray, Oho, hangaw deena kaŋ ga nyaale din ga fatta a tayo ra. Humburkumay kaa a gaa nooya.

²⁶I na kubay hinne jisi a arzaka se. Danji kaŋ boro kulu mana funsu no ga bora din ŋwa. Danjo ga haŋ kaŋ cindi a nangora ra ŋwa.

²⁷Beeney g'a laala fisi ka kaa taray, Ganda mo ga tun nga ma kond'a kalima.

²⁸A windo nafa ga say ka bambari Irikoy futa zaaro ra.

²⁹Woodin yaŋ kulu laalakoy baa no Irikoy kambe ra, A tubo nooya kaŋ Irikoy waadu a se.»