Read Zarma Job 21 Bible Online

Job 21 - Zarma bible

Job 21

¹Ayuba tu ka ne:

²«Wa hanga jeeri nda himma ka maa ay sanno, Woone mo ma ciya araŋ suurandiyaŋ hari.

³Wa naŋ, ay mo ma salaŋ. D'ay salaŋ ka ban, Gaa araŋ mo ma soobay ka araŋ hahaaray sanney te.

⁴Ay wo, ay kalima ga margu nda boro no? Ifo no g'ay ganji ya suuru-jaŋay te binde?

⁵W'ay guna ka soobay ka dambara! Wa araŋ kambey daŋ mo ka araŋ meyey daabu.

⁶Baa waati kaŋ ay ga fongu, kala ya kankam, Ay gaahamo kulu ma gasi.

⁷Ifo se no boro laaley ga gay da fundi, I ma zeen, oho, i ma beeri mo da hin?

⁸I ga di ngey banda go ga sinji ngey nangey ra. I moy ga di ngey gunda izey.

⁹I nangorayey go baani samay, Humburkumay kulu si no, Irikoy goobo mo s'i kar.

¹⁰I yeejey ga gunde daŋ, i si fappe, I haw wayey ga hay, i si te gunde hasaraw,

¹¹I ga ngey ize kayney donton, sanda kuru no, I izey go ga sar ka zimbi.

¹²I goono ga doon ka goojey da moolo beeri yaŋ kar, I ga farhã waati kaŋ i ga maa seese jinde,

¹³I goono ga ngey goray te nda arzaka. Amma sahãadin-sahãadin i ga gunguray ka koy Alaahara.

¹⁴Ngey binde no ga ne Irikoy se: ‹Fay da iri, Zama iri si ba iri ma ni muraadey bay.

¹⁵May no ga ti Hina-Kulu-Koyo hala iri ma may a se? Nafa woofo no iri ga du d'iri na adduwa te a gaa?›

¹⁶Guna, i arzakey, manti i kambey ra no a go bo! Borey laaley saawara din ga mooru ay.

¹⁷Sorro marge no boro laaley fitilley bu? Sorro marge no masiiba ga kaŋ i boŋ? Sorro marge mo no Irikoy ga bine saray zaban i se nga futa ra?

¹⁸Sorro marge mo no i ga ciya sanda bari subu kaŋ go haw jine? Wala danga du kaŋ hari haw bambata goono ga hamay ka kond'a?

¹⁹Araŋ wo go ga ne: ‹Irikoy ga boro laala alhakko jisi a izey se.› Dambe day a ma bana boro laalo bumbo gaa, Zama a ma du ka bay!

²⁰Naŋ nga bumbo moy ma di nga halaciyaŋo, Nga bumbo din mo ma Hina-Kulu-Koyo futa haŋ.

²¹Zama a saalay go nga windo gaa a buuyaŋo banda, wala, Waati kaŋ a handey lasaabuyaŋo gaze?

²²Boro kaŋ ga Irikoy dondonandi bayray, a go no, wala? Za kaŋ Irikoy ga beena ra waney ciiti.

²³Boro fo ga bu nga gaabo bindi ra, A fundo go fulanzamay ra, fitina si,

²⁴A gaasey ga to da wa, A biriyey londi mo igani no.

²⁵Afo mo ga bu nga fundo gurzuga ra, A mana kaani taba baa ce fo.

²⁶I kulu afolloŋ no, ganda laabo ra no i ga kani, Nooni no g'i daabu.

²⁷Guna, ay na araŋ fonguyaŋey bay, Da me-hawyaŋey kaŋ araŋ goono ga te ay boŋ, Miila laalo waney.

²⁸Zama araŋ go ga ne: ‹Man mayraykoyo windo? Man windo din kaŋ ra boro laaley goro waato?›

²⁹Araŋ mana dirakoy hã bo? Araŋ mana i seedey bay no,

³⁰Kaŋ i ga boro laalo fay waani masiiba zaari ra? I g'i kaa kambe mo futay zaari ra no?

³¹May no g'a daa cabe a se taray kwaaray? Wala may no g'a goyo alhakko bana a se?

³²Kulu nda yaadin, borey g'a sambu ka kond'a saaray do. I ga haggoy d'a saara mo hal a ma boori.

³³Gooru gu-guwey ga kaan a se, Borey kulu mo ga gana a banda, Sanda ngey kaŋ yaŋ jin, i bisa haŋ kaŋ ga lasaabu.

³⁴Ifo se no binde araŋ goono g'araŋ kunfayaŋ yaamo wo te ay se, Za kaŋ sanney kaŋ araŋ goono ga kande yaŋ, I ra hay kulu mana cindi kala tangari?»