Read Zarma Job 22 Bible Online

Job 22 - Zarma bible

Job 22

¹Kala Elifaz Teman bora tu ka ne:

²«A ga hin ka te boro ma nafa fo te Irikoy se mate kaŋ laakalkooni ga nafa nga boŋ se?

³Ni adilitara ya hay kaano fo no Hina-Kulu-Koyo se? Wala ni cimi toonanta gonda nafa fo no a se?

⁴Zama a ga humburu nin se no a ga kaseeti ni gaa? Wala nin d'a ga koy ciiti do no?

⁵Ni laala, manti ibambata no? Ni zunubey mo, i sinda me.

⁶Ni na tolme ta ni nya-izo gaa yaamo-yaamo, Ni na dirakooney bankaarayey kaa i gaa.

⁷Ni mana fargantey no hari i ma haŋ, Ni na harayzey ganji ŋwaari mo.

⁸Amma gaabikooni ka bara nda ndunnya, Gaakurantey mo ga goro a ra.

⁹Ni na wayboro kaŋ kurnye bu yaŋ sallama kambe koonu, Ni na alatuumey kambey ceeri mo.

¹⁰Woodin sabbay se no kumsayyaŋ goono ga ni windi, Haŋ kaŋ ga kaŋ farap! folloŋ mo, A humburkuma goono ga ni taabandi.

¹¹Kubay go no hala ni si hin ka di, Beene hirriyaŋ mo ga ni daabu.

¹²Irikoy si yongo beene no? Guna handariyayzey moora! Man i moora salleyaŋo misa?

¹³Ni ne mo: ‹Ifo no Irikoy ga bay? A ga hin ka haŋ kaŋ go kubay ra ciiti no?

¹⁴Beene hirriyaŋ beeray n'a daabu hal a si di, A goono mo ga taamu beene batamey boŋ.›

¹⁵Ni ga fondo zeeno gana, Wo kaŋ boro laaley taamu, wala?

¹⁶Borey kaŋ i n'i hamay ka kaa za i alwaato mana to, I n'i deyaŋ haro bagu-bagu danga hari zuru gooru.

¹⁷Ngey no ka ne Irikoy se: ‹Fay d'iri.› Wala i ne: ‹Ifo no Hina-Kulu-Koyo ga hin ka te iri se?›

¹⁸Amma nga no k'i windey toonandi nda albarka. Amma boro laaley saawarey ga mooru ay.

¹⁹Adilantey ga di woodin ka farhã, Borey kaŋ yaŋ sinda taali mo ga donda-caray haari te i se.

²⁰I go ga ne: ‹Daahir, i duura halaci, Haŋ kaŋ cindi i se mo, danji g'a ŋwa.›

²¹Ni ma Irikoy bay gumo sohõ, ka goro baani, Woodin gaa no ni ga di gomni.

²²Ay ga ni ŋwaaray, ma dondonandiyaŋ ta a meyo ra, K'a sanney jisi ni bina ra.

²³Da ni ye ka kaa Hina-Kulu-Koyo do, ni ga tonton, Hala day ni na adilitaray-jaŋay hibandi ka moorandi ni nangora gaa,

²⁴Ka ni arzaka jisi ganda kusa ra, Ofir wura mo, m'a jisi goorey tond'izey ra,

²⁵Gaa no Hina-Kulu-Koyo ga ciya ni arzaka, A ga ciya nzarfu darzante mo ni se.

²⁶Zama waato din gaa no ni ga farhã Hina-Kulu-Koyo do, Ni ga ni moyduma sambu ka Irikoy guna.

²⁷Ni ga ni adduwa te a gaa, A ga maa ni se mo. Ni ga ni sarto mo toonandi a se.

²⁸Haŋ kaŋ ni soola ni bina ra ga tabbat ni se, Annura mo ga ni fondey kaarandi.

²⁹Saaya kaŋ i na ni soote ganda, Ni ga ne: ‹Tunyaŋ go no koyne.› A ga lalabuko faaba mo.

³⁰Boro kaŋ si jaŋ taali mo, a g'a kaa kambe, Oho, a g'a faaba ni kambey hananyaŋo sabbay se.»