Read Zarma Job 26 Bible Online

Job 26 - Zarma bible

Job 26

¹Kala Ayuba tu ka ne:

²«Guna day mate kaŋ ni na hina-buuno gaa d'a! Guna ka di mate kaŋ ni na kambe kaŋ sinda gaabi faaba nd'a.

³Guna mate kaŋ ni na saaware no boro kaŋ sinda laakal se d'a! Ni na bayray hanno ci mo kaŋ yulwa!

⁴May se no ni na ni sanney ci? May biya mo no ka fun ni do?

⁵Refayimey goono ga jijiri haro da nga ra gorokoy cire.

⁶Koonu no Alaahara bara Rabbi jine, Halaciyaŋ do mo sinda daabuyaŋ hari.

⁷A ga azawa kamba daaru batama kwaaray koono boŋ, A na ndunnya mo sarku, hay kulu si a cire.

⁸A ga harey kunsum nga beene hirriyaŋ kuba ra, Kulu nda yaadin hirriyaŋo mana kortu i cire.

⁹A ga nga karga alhaalo daabu, Ka nga buro daaru a boŋ.

¹⁰A na haro batama me kurkutu ka windi hal a koy ka kubay da kaari fay-fayyaŋ.

¹¹Beene gaayyaŋ harey goono ga jijiri, Alyanga n'i di a deeniyaŋo se.

¹²A goono ga teeku kanandi nda nga hino, A n'a boŋbeera gooru nda nga fahama mo.

¹³A Biya no i ga beene batama taalam d'a, A kamba mo no ga gondi kaŋ ga zuru gooru.

¹⁴Guna, woodin yaŋ wo a hina muraadey caso hinne no, A baaro ciinay kayniyo no iri goono ga maa! Amma a hino kaatiyaŋo, May no hin ka faham d'a?»