Read Zarma Job 28 Bible Online

Job 28 - Zarma bible

Job 28

¹Daahir, nzarfu guusu go no, Wura kaŋ i ga hanse mo, a nango go no.

²Ganda laabo ra no i ga guuru fansi, Tondi ra mo no i ga guuru-say mannandi.

³Boro ga hirri daŋ kubay se, A ga koy tondi ceeciyaŋ hala kubay da kubay bi tik ra, Hala hirro me gaa.

⁴A ga guusu fansi mo kaŋ ga mooru naŋ kaŋ borey ga goro. Nango dinya boro ce taamey gaa, Borey se nangu mooro i ga taŋ ka sooli.

⁵Zama laabo wo, a ra no ŋwaari ga fun, A cira mo i g'a bare, danga mate kaŋ danji ga te.

⁶Laabo tondey ra no i ga safir* gudey kaa, I ga du wura a gudey ra.

⁷Curo kaŋ ga ham ŋwa si fonda din bay, Gabu moy mana di a ce fo.

⁸Ganji hamey kaŋ ga zankam mana noodin taamu, Muusu beeri futo mana bisa noodin.

⁹A ga nga kambe salle captu tondi boŋ, A ga tondi kuukey sambu mo hala i tiksey gaa, K'i ganandi.

¹⁰A na hari zuray fondo fansi tondey ra, A moy goono ga di hay kulu kaŋ gonda darza.

¹¹A ga goorey lutu hal i ma si zuru, Haŋ kaŋ go tugante mo, a g'a kaa taray kaari ra.

¹²Amma man gaa no i ga laakal gar? Fahamay mo, man no a go?

¹³Boro s'a hay bay, I s'a gar mo fundikooney laabo ra.

¹⁴Guusuyaŋ ne: ‹A si ay ra.› Teeku ne: ‹Manti ay banda no a go.›

¹⁵Wura si naŋ boro ma hin ka du a, I si nzarfu mo neesi ka ne i g'a hay bana.

¹⁶I s'a nooru kosu nda Ofir wura, Wala nda oniks* kaŋ nooro ga baa, wala safir tondi.

¹⁷Wura wala diji sinda hina ka ciya a wadde, I s'a barmay te mo da wura hanno jinay.

¹⁸I si koral* wala kristal* ciine te, Oho, laakal nooru bisa tondi hiir'ize caadante.

¹⁹Etiyopi laabo topaz*, i s'a kar a gaa, I si nga nda wura zalla deedandi care gaa ka neesi mo.

²⁰To, mana gaa binde no laakal wo ga fun? Mana gaa no fahamay nango go?

²¹Za kaŋ tugante no a go fundikooni kulu se, Daabante mo no a go beene curey se.

²²Halaciyaŋ nda buuyaŋ ne: ‹Iri maa a baaru nda hanga maayaŋ.›

²³Irikoy hinne no ga faham d'a fonda, Nga mo no g'a nango bay.

²⁴Zama a ga guna hala ndunnya me, A ga di hay kulu kaŋ go beena cire.

²⁵Saaya kaŋ a na tiŋay daŋ haw se, Oho, hal a na harey neesi nda deedandiyaŋ hari,

²⁶Saaya kaŋ a na lordi te beene hari se, Da fondo mo koyne maliyaŋ kaatiyaŋey se,

²⁷Waato din no a di laakal, a n'a baaru dede mo. A n'a sinji, oho, a n'a gundu kaa taray.

²⁸Boro mo se a ne: ‹Guna, boro ma humburu Koy Beero, nga no ga ti laakal. Boro ma fay da goy laaley mo, nga no ga ti fahamay.› »