Read Zarma Job 30 Bible Online

Job 30 - Zarma bible

Job 30

¹Amma sohõ, borey kaŋ yaŋ ay zeen ey goono g'ay hahaara, Borey kaŋ yaŋ ay donda i baabey hal ay wongu k'i daŋ ay alman kuray hansey banda.

²Oho, i kambey gaabo, ifo no a hanse ay se waato din? Boro yaŋ nooya kaŋ halaci jiiri toonante ra.

³I faabu mo jaŋay da gazeyaŋ sabbay se. I ga laabu ŋwa naŋ kaŋ kurmu nda saaji fimbi go.

⁴I ga hanam dagu ka kaa karji gaa, Mufa kaaji ya i ŋwaari no.

⁵I n'i gaaray ka kaa borey ra, I g'i gana nda kuuwa sanda zay cine.

⁶Hala tilas i ma goro gooru kaŋ ga humburandi ra, Wala laabu nda tondi guusey ra.

⁷Tuurey game ra no i ga hẽ sanda farkay cine, Karji nyaŋey cire no i ga margu.

⁸Ngey wo saamoyaŋ no, Oho, boro yaamey izeyaŋ no, Goobu no i n'i gaaray d'a laabo ra.

⁹Sohõ mo ay ciya dooni hari i se. Oho, ay ciya hari yaamo i se!

¹⁰I goono g'ay fanta, I go ga kay ay se kuray fo waani. I ga soobay ka yollo tuf'ay moyduma gaa no,

¹¹Zama Irikoy n'ay biraw korfa feeri ay se, k'ay taabandi, I goono ga kasiji furu ay jine.

¹²Ay kambe ŋwaari haray no, i jama tun ka kay, I goono g'ay cey tuti _ka kaa ay cire|_, I goono ga ngey halaciyaŋ fondey hanse ay jine.

¹³I g'ay fonda sara ay se, I ga du riiba ay masiiba do. Boro kulu s'i gaa.

¹⁴Danga day kortimi kaŋ ga tafay ra no i goono ga kaa ay gaa. Windi bagarmey bindi ra no i goono ga zulli ka kaa ay boŋ.

¹⁵Humburkumay kaa ay gaa, I g'ay beera gaaray mo sanda haw cine. Ay albarka mo say-say sanda beene buru cine.

¹⁶Sohõ binde ay fundo go ga soogu ay ra, Kankami jirbey n'ay di.

¹⁷Cin ay biriyey ga fara ay ra, Ay kaajey sinda fulanzamay.

¹⁸Ay bankaara sara ay kankamo sabbay se, A n'ay haw-haw sanda ay kwaay jinda cine.

¹⁹Irikoy n'ay catu botogo ziibo ra, Ay ciya sanda kusa nda boosu cine.

²⁰Ay go ga hẽ ni gaa, amma ni mana tu ay se. Ay ga tun ka kay, amma ni si baa saal ay.

²¹Ni bare ka ciya ay se boro kaŋ si bakar, Ni kambe gaabo no ni goono g'ay gurzugandi nd'a.

²²Ni g'ay sambu k'ay kaarandi haw boŋ, Ni ga naŋ ay ma yangala hari haw beeri ra.

²³Zama ay bay kaŋ ni ga kond'ay buuyaŋ do, Kaŋ ga ti marga windo kaŋ ni te fundikooni kulu se.

²⁴Amma boro kaŋ goono ga kaŋ kurmu citila ra, A ma si nga kambe salle no? Wala a masiibey ra, A ma si gaakasinay hẽeni te no?

²⁵Manti ay doona ka hẽ taabi hanko se? Manti ay bine sara alfukaarey se?

²⁶Waato kaŋ ay na laakal dake gomni gaa, Kala ilaalo go, a kaa. Saaya kaŋ ay na mo daaru ka ne ay ga di annura, Kala kubay go no.

²⁷Ay bina go ga sakulla, a sinda fulanzamay. Kankami jirbiyaŋ kaa ay gaa.

²⁸Ay te ibi, amma manti wayno sabbay se no, Ay ga tun ka kay jama marga ra ka gaakasinay ceeyaŋ te.

²⁹Ay ciya zoŋoyaŋ nya-ize, taatagayyaŋ hangasin mo.

³⁰Ay kuuro ibi no, a go ga hasara ay gaahamo gaa. Ay biriyey ton gaaham konni sabbay se.

³¹Woodin sabbay se no ay moola bare ka ye ka bu hẽeni te. Ay seesa mo bare ka ciya hẽekoyaŋ jinde.