Read Zarma Job 33 Bible Online

Job 33 - Zarma bible

Job 33

¹Kulu nda yaadin, ya nin Ayuba, Ay ga ni ŋwaaray ma maa ay sanney sohõ, Ma hanga jeeri ay sanney kulu se.

²Guna, sohõ ay n'ay meyo feeri, Ay deena ga salaŋ ay daana ra.

³Ay sanno g'ay bine cimo bangandi. Ay meyo ga bayray toonante salaŋ.

⁴Irikoy Biya no k'ay te, Hina-Kulu-Koyo fulanzama no k'ay no fundi.

⁵Da ni ga hin, kala ma tu ay se. Ma tun ka kay ka ni sanno soola ay jine.

⁶Guna, Irikoy do ay ya ni cine no. Ay mo, laabo ra no i n'ay sambu, k'ay cina.

⁷Guna, ay manti boro kaŋ ga humburandi, Sanku fa ya ni humburandi. Ay si ni naan da tiŋay mo.

⁸Daahir ni ci, ay maa mo. Ay maa ni sanno jinda mo, kaŋ ni ne

⁹ni ya hanante no kaŋ sinda hartayaŋ, Kaŋ sinda taali no, Laala fo mo si ni gaa.

¹⁰Irikoy goono ga kobay ceeci ni gaa, A na ni ciya nga ibare.

¹¹A ga ni cey daŋ bundu baka* ra, A ga ni fondey kulu batandi mo.

¹²Woodin ra binde ni sinda cimi. Guna, ay ga tu ni se, Zama Irikoy bisa boro beeray.

¹³Ifo se no ni ga kakaw d'a? Zama se a si nga muraadey lasaabuyaŋ no, wala?

¹⁴Zama Irikoy ga salaŋ sorro folloŋ, Oho, hala sorro hinka zaati, Amma boro kulu si ga saal a.

¹⁵Hindiri ra, wala cin bangandi ra, Waati kaŋ jirbi tiŋo ga borey di, Waati kaŋ i ga hahaabiya ngey daarey boŋ,

¹⁶Alwaato din no a ga borey hangey fiti, A ga nga seeda daŋ goojiyaŋ kaŋ a te i se din gaa,

¹⁷Zama nga ma boro candi a ma fay da nga miila, A ma boro ganji boŋbeeray mo.

¹⁸A m'a fundo ganji guusu ra kaŋyaŋ, Yaaji mo s'a fundo halaci.

¹⁹A ga boro gooji da doori mo nga daaro boŋ, Da foyrayyaŋ waati kulu nga biriyey ra,

²⁰Hal a fundo ga ŋwaari fanta, A bina mo ma wangu ŋwaari kaano.

²¹A hamo ma soobay ka halaci hal a ma ye ka komso, A biriyey mo kaŋ i si di waato ma fatta.

²²A fundo goono ga maan guuso me gaa, A fundo goono ga maan halacikoy do mo.

²³Da malayka go a banda, Sasabandiko mo, afolloŋ zambar game ra, Zama a ma boro cabe haŋ kaŋ ga saba nd'a a se,

²⁴Kal a ma gomni te a se ka ne: ‹M'a faaba a ma si gunguray ka koy guuso ra, zama ay du fansa hari!›

²⁵A hamo ma ye ka taji ka bisa zanka wane tajitaray, A ma ye ka kaa nga zankatara gaabo ra.

²⁶Gaa no a ga adduwa te Irikoy gaa, Nga mo g'a ta da gomni, Hal a ga di Irikoy moyduma da farhã. Nga mo ga ye ka nga adilitara no bora se.

²⁷Bora ga baytu borey jine mo ka ne: ‹Ay na zunubi te, ay na cimi fonda siirandi, A mana ay nafa mo.

²⁸Irikoy n'ay fundo fansa hal a ma si gunguray ka koy guuso ra, Ay fundo ga di annura mo.›

²⁹Guna, hayey wo kulu no Irikoy ga goy sorro hinka, Oho, hala sorro hinza zaati boro se,

³⁰Zama a ma ye ka kand'a fundo ka fun d'a guuso ra, Zama a m'a kaarandi mo da fundi kaari.

³¹Ya Ayuba, ma laakal ye ka hanga jeeri ay se. Ma dangay, ay mo, ay ma salaŋ.

³²Gaa no da ni gonda hay fo kaŋ ni ga ba ni ma ci, Ma tu ay se. Ni ma salaŋ, zama ay ga ba ay ma ni adilandi*.

³³Da manti yaadin no, ma maa ay sanno. Ma dangay, ay mo ga ni dondonandi laakal.»