Read Zarma Job 34 Bible Online

Job 34 - Zarma bible

Job 34

¹Elihu soobay ka salaŋ ka ne:

²«Ya araŋ alborey kaŋ yaŋ gonda laakal, Wa maa ay sanney. Ya araŋ kaŋ yaŋ gonda bayray, Wa hanga jeeri ay se,

³Zama hanga ga sanni neesi sanda mate kaŋ cine me ga ŋwaari taba.

⁴Iri ma suuban iri boŋ se haŋ kaŋ ga saba, Iri game ra mo iri ma bay haŋ kaŋ ga boori.

⁵Zama Ayuba ne: ‹Ay ya adilante no, Amma Irikoy n'ay cimo kom.

⁶Ay ma taari no ay cimo boŋ, wala? Baa kaŋ ay sinda taali, ay biyo si ga yay.›

⁷Man boro kaŋ ga hima Ayuba, Kaŋ ga hahaaray haŋ sanda hari cine,

⁸Kaŋ ga dira laala teekoy banda, Kaŋ ga bar-bare boro laaley banda?

⁹Zama a ne: ‹A si hay kulu hanse boro se Irikoy ma maa a kaani.›

¹⁰Woodin sabbay se no, ya araŋ fahamantey, Araŋ ma hanga jeeri ay se. A ga mooru Irikoy gaa a ma ilaalo te, Wala Hina-Kulu-Koyo ma taali te mo!

¹¹Zama a ga boro bana no a goyey boŋ, A ga naŋ mo boro kulu ma gar haŋ kaŋ ga saba nda nga daa alhaalo boŋ.

¹²Oho, daahir Irikoy si taali kulu te, Hina-Kulu-Koyo ya si ciiti siirandi.

¹³May no ka ndunnya talfi a gaa? May mo no ka ndunnya kulu tiŋay dake a boŋ?

¹⁴D'a miila nga bina ra nga ma nga Biya da nga fulanzama margu nga bumbo do,

¹⁵Kala fundikooni kulu ma halaci. Boro kulu mo, kal a ma ye ka ciya laabu.

¹⁶Amma da ni gonda fahamay, ma maa woone, Ma hanga jeeri ay sanney jinda se:

¹⁷Boro kaŋ wongu cimi ciiti teeyaŋ ga hin ka mayray te, wala? Ni ga hinkoy adilante zeeri no?

¹⁸May no ga ne bonkooni se: ‹Ni ya furku no›? Wala i ma ne mayraykoyey se: ‹Araŋ ya boro laalo yaŋ no›?

¹⁹A si baar'a-baar'a te koy-izey se, A si arzakantey darza guna mo ka ne i bisa alfukaarey, Zama ikulu Irikoy kambe goyyaŋ no.

²⁰Mo-ka-mi yaŋ folloŋ no i ga bu. Baa cin bindo ra i ga borey zinji-zinji, i ga ban mo. Hinkoyey ga gana mo, kaŋ manti nda kambe.

²¹Zama a moy goono ga boro fondey guna, A goono ga di a ce daguyaŋ kulu mo.

²²Kubay fo si no, wala biya, Kaŋ ra laala goy-teekoy ga du ka tugu.

²³Zama a si laami nga ma tonton ka laakal ye boro gaa, Hala nd'a ma koy Irikoy jine ciiti se.

²⁴A ga borey kaŋ yaŋ gonda hin bagu-bagu, fintalyaŋ si, Ka boro fooyaŋ daŋ i kayyaŋ nangey ra.

²⁵Woodin se mo a na laakal ye i goyey gaa. A g'i zeeri cin k'i tutubu.

²⁶A g'i kar danga boro laaley cine gomdokoy jine.

²⁷Zama i kamba ka fay d'a ganayaŋ, I wangu ka saal a muraadey kulu,

²⁸Hal i naŋ talkey hẽeno ma koy ka to a do, A ma maa kayna ra waney hẽeno.

²⁹Da nga din ga laakal kanay no, May no ga hin ka ciiti ka zeeri koyne? Wala mo d'a na nga moyduma tugu, May no ga hin ka di a? Danga, d'a n'a te kunda se, Wala boro folloŋ se -- ikulu afolloŋ no.

³⁰Boro kaŋ sinda Irikoy ganayaŋ mana hima ka mayray te, Zama a ma si ciya hirrimi hari talkey se.

³¹D'a-ta day, boro fo go no kaŋ doona ka ne Irikoy se: ‹Ay na goojiyaŋ haŋ, day ay si ye ka taali te?

³²Haŋ kaŋ ay mana di, ni m'ay dondonandi nd'a. D'ay jin ka goy laalo te, Ay si ye ka filla koyne.›

³³A ga bana ni se ni miila boŋ, Za kaŋ ni wangu no, wala? Zama daahir, nin no ga suuban, manti ay no. Woodin se no, kala ni ma ci haŋ kaŋ ni bay.

³⁴Fahamantey ga ne ay se, Oho, laakalkooni kulu kaŋ maa ay sanno ga ne:

³⁵‹Ayuba goono ga salaŋ, kaŋ manti nda bayray, A sanno mo, haŋ kaŋ sinda laakal no.›

³⁶Doŋ day i ma Ayuba neesi hala bananta, Za kaŋ a go ga sanni yeti sanda boro laaley cine!

³⁷Zama a zunubey boŋ no a goono ga murteyaŋ tonton, A goono ga kooma kaa mo iri game ra. A go ga sanni boobo te ka gaaba nda Irikoy.»