Read Zarma Job 35 Bible Online

Job 35 - Zarma bible

Job 35

¹Elihu ye ka salaŋ koyne ka ne:

²«Woone ga saba ni diyaŋ gaa no, kaŋ ni ga ne: ‹Ay adilitara ga bisa Irikoy wane?›

³Zama ni goono ga ne, Nafa woofo no a ga te ni se? Wala: ‹Ifo no a ga hanse ay se, Kaŋ ay mana zunubi te?›

⁴Kal ay ma tu ni se, nin da ni corey kulu care banda:

⁵Guna beene haray ka di, Guna beene burey gaa haray, Wo kaŋ yaŋ go ni se beene.

⁶Baa ni na zunubi te, Zamba woofo dumi no ni te Irikoy se? Baa ni zunubey te labu-care, ifo no woodin ga te a se?

⁷Baa ni ya adilante no, ni n'a no hay fo, wala? Ifo mo no a ta ni kambe ra?

⁸A ga hin ka te ni laala ma boro sanda ni cine zamba, Ni adilitara mo ma Adam-ize fo nafa.

⁹Kankami boobo se no i go ga hẽ. I ga gaakasinay hẽeni te hinkoyey kambe gaabo sabbay se.

¹⁰Amma boro kulu si ne: ‹Man no Irikoy ay Takakwa go, Nga kaŋ ga borey no dooniyaŋ cin haray?

¹¹A g'iri dondonandi bayray ka bisa ganji hamey wane, Ka naŋ iri ma bisa beene curey laakal.›

¹²Noodin no i ga hẽ, amma a si tu, Boro laaley boŋbeera sabbay se.

¹³Daahir, Irikoy si maa ceeyaŋ yaamo, Hina-Kulu-Koyo si woodin saal,

¹⁴Sanku fa binde kaŋ ni ga ne ni mana di a! Ciiti sanno go a jine, kala ni m'a batu.

¹⁵Sohõ mo, zama a mana bana nga futa ra, Wala a mana borey saamotara saal, baa kayna,

¹⁶Woodin se no Ayuba goono ga nga meyo fiti da sanni kaŋ sinda nafa. A goono ga sanni kaŋ yaŋ sinda bayray tonton.»