Read Zarma Job 36 Bible Online

Job 36 - Zarma bible

Job 36

¹Elihu ye ka ne:

²«Suuru ay se kayna, hal ay ma ni cabe, Zama hala ka kaa sohõ haŋ kaŋ boro ga ci Irikoy se go no.

³Nangu mooro no ay g'ay bayra candi ka kande, Ay g'ay Takakwa adilandi mo.

⁴Zama daahir ay sanney manti tangari wane yaŋ no, Boro fo kaŋ gonda bayray toonante go ni banda.

⁵Guna, Irikoy ya Hinkoy no, Amma a si donda boro kulu, Hinkoy mo no fahamay gaabi ra.

⁶A si boro laaley fundey haggoy, Amma a ga taabantey no haŋ kaŋ ga saba i se.

⁷A si nga moy kaa adilantey gaa mo, Amma a g'i daŋ bonkooney banda karga boŋ hal abada, i m'i beerandi mo.

⁸D'i n'i haw da sisiriyaŋ, I n'i di mo da taabi korfoyaŋ,

⁹Saaya din kal a m'i goyey d'i taaley bangandi i se, Mate kaŋ i na boŋbeeray cabe nd'a.

¹⁰A g'i hangey fiti i ma maa dondonandiyaŋ, A g'i lordi mo ka ne i ma bare ka fay da goy laalo.

¹¹D'i saal, hal i may a se, I ga ngey jirbey kubandi albarka ra, I ma ngey jiirey te kaani maayaŋ ra.

¹²Amma d'i mana saal, Takuba no g'i halaci, I ma bu mo bayray si.

¹³Amma borey kaŋ yaŋ sinda Irikoy ganayaŋ ngey biney ra ga futay jisi no ngey boŋ se, I si gaakasinay hẽeni te d'a n'i haw.

¹⁴Arwasutaray ra no i ga bu. I fundey ga ban tooru maa gaa aru-ci-wayey banda.

¹⁵A ga taabantey faaba ngey taabi haŋyaŋo ra. A g'i hangey fiti kankami do.

¹⁶Oho, doŋ a goono ga ba nga ma ni candi ni ma fun taabi bi wo ra, A ma kande nin ka daŋ nangu tafo ra, Naŋ kaŋ sinda kankami. Naŋ kaŋ a dake ni taablo boŋ doŋ mo, woodin to da ji.

¹⁷Amma sohõ ni to da boro laaley boŋ ciiti, Hala ciiti nda cimi ciiti na ni di.

¹⁸Ma laakal hala biniyay ma si ni candi ni ma dond'a, Fansa beera mo ma naŋ ni ma kamba.

¹⁹Ni arzakey, wala mo ni gaabo hina kulu me, I ga wasa i ma ni wa da kankami no, wala?

²⁰Ma si yalla-yalla nda cin, Naŋ kaŋ i ga borey daŋ i ma daray ngey nangora ra.

²¹Ma haggoy, ma si laakal bare ka ye goy laalo gaa, Zama woodin no ni suuban ka bisa taabi haŋyaŋ.

²²Guna, Irikoy gonda koytaray nga hino ra, May no ga te dondonandiko sanda a cine?

²³May no ka fondo daŋ a se? May no ga ne a se mo: ‹Ni na goy laalo te?›

²⁴Ma fongu day, k'a goyo beerandi kaŋ borey doon.

²⁵Borey kulu di a, Boro g'a fonnay za nangu mooro.

²⁶Guna, Irikoy ya beeraykoy no, Iri s'a bay mo. A jiirey baayaŋ bisa haŋ kaŋ boro ga fintal.

²⁷Zama a ga hari tolliyaŋ candi i ma ziji beene, I ga ciya buuda, i ma sarre.

²⁸Beene burey g'i gusam ganda mo, I goono ga tolli boro boŋ da yulwa.

²⁹Boro fo go no kaŋ g'a hirriyaŋey daaruyaŋ bay no? Sanda a nangoray tanda kaatiyaŋ nooya?

³⁰Guna, a ga nga boŋ windi nda kaari, A ga teeko ganda daabu.

³¹Zama woodin yaŋ do no a ga dumey ciiti, A ga ŋwaari no mo nda yulwa.

³²A ga nga kambey daabu nda maliyaŋ, A n'a no lordi mo a ma goo hay tak!

³³A kaatiyaŋo g'a baaro no, Hawey mo ga maa hirriyaŋ kaŋ ga ba ka kaa baaru.