Read Zarma Job 38 Bible Online

Job 38 - Zarma bible

Job 38

¹Waato din gaa no Rabbi tu Ayuba se, Jinda fun hari haw bindi ra, ka ne:

²«May no woone binde kaŋ goono ga saaware te kubay da sanniyaŋ kaŋ ra sinda bayray?

³Ma guddu sohõ sanda alboro, Zama ay ga ni hã, kala ni ma dede ay se.

⁴Man no ni go waato kaŋ ay na ganda dabey sinji? Dede hinne day, da ni gonda fahamay!

⁵May no k'a hirro daŋ, za kaŋ ni ga bay? May no ka neesiyaŋ korfo salle a boŋ?

⁶Ifo boŋ no i n'a dabey cina? Wala may no k'a lokoto tondey sinji

⁷waato kaŋ susubay handariyayzey doon care banda, Irikoy izey kulu mo kuuwa farhã sabbay se?

⁸May mo no ka teeko daabu-daabu nda daabirjiyaŋ waati kaŋ a bagu, ka fun taray, Danga day gunde ra no a fun?

⁹Waati kaŋ ay n'a daabu nda beene hirriyaŋ sanda kwaay cine, Kubay bi tik! mo ciya a se sanda hayyaŋ zaara-zaara.

¹⁰Ay n'ay hirro daŋ a se mo, Ay na karangaleyaŋ nda kanjarey daŋ a gaa.

¹¹Ay ne mo: ‹Naŋ kaŋ ni ga kaa neeya, Amma ni si bisa a gaa. Noodin binde no ni hari bonday boŋbeeraykoyey ga kay.›

¹²Za ni teeyaŋ, ni doona ka susubay no lordi, wala? Ni naŋ mo boyaŋ ma nga nango bay no?

¹³Zama a ma ndunnya hirro me di, ka boro laaley kokobe ka kaa a ra mo?

¹⁴Ndunnya ga bare sanda botogo kaŋ gaa i na kawaatimi kar, A ga fun taray kwaaray, danga kwaay taalamante cine.

¹⁵I ga boro laaley ganji ngey kaaro, Kambe sambante mo no ga ceeri.

¹⁶Nin wo, ni doona ka furo naŋ kaŋ teeku ga fatta no? Wala ni doona ka bar-bare a guusuyaŋey lokotey ra?

¹⁷I na buuyaŋ windi me dabirjey cabe ni se ce fo no? Wala ni jin ka di buuyaŋ biya windi me daabirjey?

¹⁸Ni ga ndunnya tafayyaŋo bay, wala? To. Ma ci, hala day ni ga woodin yaŋ kulu bay!

¹⁹Man fonda kaŋ ga koy kaari nangora do? Kubay binde, man no a nango go?

²⁰Hala nda ni ma kond'a noodin a nango ra, Ni ma fondey mo bay kaŋ ga koy a kwaara!

²¹Sikka si ni ga bay, Zama alwaato din i na ni hay, Ni jirbey kuuyaŋo ga baa mo!

²²Ni furo neezo* buwayaŋ ra ce fo no? Wala ni bay ka di gari buwayaŋ no?

²³Wo kaŋ yaŋ ay jisi kankami jirbey sabbay se, Danga wongu nda tangami jirbey sabbay se no.

²⁴Fondo woofo ra no i ga kaari fay-fay? Mate no i ga wayna funay hawo say-say d'a ndunnya boŋ?

²⁵May no ka goota kortu hari-yaa se? Wala may no ka fondo kortu kaatiyaŋ maliyaŋ se?

²⁶Zama beene hari ma kaŋ laabu kaŋ boro si no boŋ, Taasi beerey boŋ, naŋ kaŋ boro si no,

²⁷Zama a ma laabu kogo nda gangani kungandi, A ma naŋ mo subu tayo ma zay ka fatta.

²⁸Beene hari gonda baaba, wala? Wala may no ka harandaŋ tolliyaŋ hay?

²⁹May gunda ra no gari fun? Beene gar'ize kwaarayey mo, may no k'i hay?

³⁰Hari bare ka sandi sanda tondi cine, Guusuyaŋey batama ciya glas.

³¹Ni ga hin ka Dibi handariyayzey marga haw, wala? Wala ni ga hin ka Aliyu hawyaŋ korfey feeri?

³²Handariya margey alaamey binde, Ni ga hin k'i daŋ fondo? Ni ga hin ka Ywa nda nga izey candi?

³³Ni ga beeney farilley bay? Wala ni ga hin k'i mayray sinji ndunnya boŋ?

³⁴Ni ga hin ka ni jinde sambu a ma to burey gaa, Zama hari kaŋ ga yulwa ma gusam ka ni daabu, wala?

³⁵Ni ga hin ka maliyaŋ donton no? A ga koy ni se no ka ne ni se: ‹Iri neeya?›

³⁶May no ka laakal daŋ hala boro bina ra? Wala may no ka fahamay no boro bina se?

³⁷May no ga hin ka burey lasaabu nga laakalo do? Wala may no bora kaŋ ga hin ka beene foobey bare,

³⁸Waati kaŋ ganda laabo margu nangu folloŋ ka sandi, Laabu guwey mo go ga naagu care gaa?