Read Zarma Job 39 Bible Online

Job 39 - Zarma bible

Job 39

¹Ni ga hin ka ham koli ka kande muusu beeri way se no? Wala ni ga muusu izey kungandi, i hara ma ban,

²Waato kaŋ i goono ga gum ngey guusu ra, I ga kani ka batandi ngey gumbo ra?

³May no ga gaaru ŋwaaro soola a se, Waato kaŋ cine a izey goono ga hẽ Irikoy gaa, Ka bar-bare ŋwaari-jaŋay sabbay se?

⁴Wala ni ga bay waati kaŋ cine no tondey ra hinciney ga hay? Wala ni ga hin ka ŋwe jirbey seeda?

⁵Ni ga hin k'i gunde handey lasaabu no? Wala ni ga bay alwaati kaŋ cine no i ga hay?

⁶I ga sombu ka ngey izey kaa taray, I ga ngey hay-zaŋay jarawo kaa.

⁷I izey ga te gaabi, saajo ra mo no i ga beeri. I ga dira, i si ye ka kaa koyne.

⁸May no ka ganji farka taŋ ka fay d'a? May no ka ganji farka tafar feeri?

⁹Ay n'a no saajo a ma ciya a windi, Ciiri laabo mo a nangoray no.

¹⁰A ga donda gallu kosongu, A si maa gaarayko kuuwa.

¹¹A ga tondi kuuku yaŋ windi ka du kuray do, A ga kobto tayo kulu dumi ceeci.

¹²Haw-bi ga yadda ka may ni se, wala? A ga hanna ni alman gaa do, wala?

¹³Ni ga hin ka haw-bi haw nda korfo a ma ni bata far no? A ga ni gana ka gooro batamey far, wala?

¹⁴Ni ga naanay a gaa zama se a gaabo ga beeri no? Ni ga ni goyo talfi a gaa, wala?

¹⁵Ni ga de a gaa a ma ye ka kande ni se ni hayno fu, wala? A m'a margu-margu dubango do?

¹⁶Taatagay fatey goono ga kobi da farhã, Amma a fatey d'a hamney, i gonda gomni baakasinay, wala?

¹⁷Zama a ga nga gunguray jisi k'i naŋ ganda, A m'i dungandi kusa ra.

¹⁸A ga dinya mo hala hambara ce g'i taamu k'i tutubu, Wala ganji ham fo m'i taamu-taamu.

¹⁹A ga futu nga izey gaa, Danga day manti a wane yaŋ no, A si humburu hala nga goyo wo ma si ciya yaamo.

²⁰Zama Irikoy n'a ganji laakal, A mana a no fahamay mo.

²¹Waati kaŋ a tun zuray se, Kal a ma donda bari nda nga kaarukwa.

²²Nin no ka bari no nga gaabo? Nin no k'a jinda no jeza kaŋ ga feeni?

²³Nin no ka naŋ a ma sar sanda do cine, wala? A funsuyaŋ gaakuranta ya humburkumay hari no.

²⁴A ga zankam gooru batama ra, A ga maa nga gaabo kaani. A ga fatta ka koy kubay da wongu jinay.

²⁵Humburkumay wo, a g'a hahaara no, a si sukurutu, A si banda bare mo takuba se.

²⁶Tongo ga kosongu mo a boŋ, Hala nda yaaji da lolo kaŋ ga nyaale mo.

²⁷A ga laabu fisi nda fundi korni nda futay, A si kay hilli hẽeni jinde sabbay se.

²⁸Waati kaŋ cine i ga hilli kar, Kal a ma ne: ‹Ahãa!› Za nangu mooro no a ga wongu, Da wongaaray kaatiyaŋey, nda wongu kuuwa mani ka maa.

²⁹Ni fahama do no gabu ga kaaru beene, A ma nga fatey salle ka koy dandi kambe?

³⁰Wala ni lordi boŋ no zeeban ga tun ka ziji, Ka nga fito te beene?

³¹A nangora go tondi kuuku boŋ, Noodin no a gonda nga nangora, Tondi deene boŋ no, nangu gaabikooni ra.

³²Noodin no a ga ŋwaari ceeci, Nangu mooro no a moy g'a fonnay.

³³A izey mo ga kuri haŋ. Naŋ kaŋ borey kaŋ yaŋ i fun go, Noodin no ni g'a gar.»

³⁴Saaya din Rabbi ne Ayuba se:

³⁵«Janceko ga kakaw nda Hina-Kulu-Koyo no, wala? Boro kaŋ ga kakaw nda Irikoy, a ma tu woodin se!»

³⁶Kala Ayuba tu Rabbi se ka ne:

³⁷«Guna, ay wo manti hay fo no, Ifo no ay ga tu d'a ni se? Ay n'ay kambe daabu ay meyo gaa.

³⁸Sorro folloŋ no ay salaŋ, Ay si ye ka tu koyne. Oho, hala sorro hinka, Amma baa sanni folloŋ ay si tonton.»