Read Zarma Job 4 Bible Online

Job 4 - Zarma bible

Job 4

¹Kala Elifaz Teman bora tu ka ne:

²«D'i ceeci i ma salaŋ da nin, ni si dukur, wala? Day may no ga hin ka dangay?

³A go, nin wo, ni na boro boobo yaamar, Ni na kambe londi-buunay-koyey gaabandi.

⁴Ni sanney doona ka borey kaŋ ga ba ka kaŋ kayandi, Borey kaŋ yaŋ kangey londi bu, ni n'i gaabandi.

⁵Amma sohõ kaŋ a kaa ni gaa, ni gaze, wala? Kaŋ a lamba ni gaa, ni laakalo tun, wala?

⁶Ni Irikoy cimandiyaŋo mana wasa ni se deyaŋ, bo? Ni fundo adilitara mo mana wasa ni se beeje hari, bo?

⁷Ma fongu day, ay ga ni hã, Boro kaŋ sinda taali doona ka halaci, wala? Wala man no i na adilante pati ce fo?

⁸Ay diyaŋ gaa, borey kaŋ yaŋ ga laala fansi ka fari soola, Da borey kaŋ yaŋ ga taabi duma, I ga haŋ kaŋ i duma din wi heemar.

⁹Irikoy funsaro no g'i halaci, A futay dunga no g'i ŋwa.

¹⁰Muusu beeri ga dundu, Muusu izey mo ga follay jinde tunandi, Amma muusu daŋ kaso hinjey no ga ceeri.

¹¹Muusu beeri futo ga bu ham jaŋay se, Muusu way izey mo ga say-say.

¹²Han fo i na sanni fo ciinay te ay se. Ay hanga maa ciina din.

¹³Cin hindiri fonguyaŋ ra no, Saaya kaŋ cine jirbi tiŋo ga boro di.

¹⁴Kala humburkumay da gaaham jijiriyaŋ n'ay di, A n'ay gaa biriyey kulu jijirandi mo.

¹⁵Kala biya fo gaaru ka bisa ay jine. Ay gaa-haabiya kulu kay.

¹⁶Haya din binde ye ka kay, Amma ay mana hin k'a himando fayanka. Himandi fo go ga kay ay jine. Sum! Kal ay maa jinde kaŋ ne:

¹⁷‹Boro kaŋ ga bu, A adilitara ga bisa Irikoy wane no? Boro beeri ga ciya hanante ka bisa nga Takakwa, wala?

¹⁸Guna, a mana nga tamey te deyaŋ hari, A malaykey mo, a na taali dake i boŋ,

¹⁹Sanku fa binde woone yaŋ kaŋ goono ga goro laabu fuyaŋ ra, Borey kaŋ yaŋ i ganda sinjiyaŋ si kala laabu bulungu ra, Ngey kaŋ yaŋ i g'i mutukuru danga naana-baano cine.

²⁰Susuba nda wiciri kambu game ra no i g'i bagu-bagu, I ga halaci hal abada, boro kulu si saal.

²¹I n'i fundi korfa pati, I ga bu laakal-jaŋay ra mo.›