Read Zarma Job 40 Bible Online

Job 40 - Zarma bible

Job 40

¹Gaa no Rabbi tu Ayuba se, Jinda fun hirriyaŋ haw ra ka ne:

²«Ma guddu sohõ ka te alboro teera, Zama ay ga ni hã, ni ma dede ay se mo.

³Daahir, ni g'ay ciito ganandi no? Ni g'ay zeeri zama se nin wo ma ciya adilante no?

⁴Ni gonda kambe sanda Irikoy cine no? Wala ni ga hin ka kaati nda jinde sanda Irikoy cine no?

⁵To. Ma taalam sohõ da darza beeri nda gaakuri. Ma beeray da koytaray darza daŋ ka daabu ni gaa.

⁶Ma ni futay booba mun, Ma boŋbeeraykoy kulu guna k'a kaynandi.

⁷Ma boŋbeeraykoy kulu guna k'a ye ganda, Ma boro laaley taamu-taamu nangey kaŋ i bara ga kay.

⁸M'i tugu care banda kusa ra, M'i haw tuguyaŋ do.

⁹Waato din gaa kal ay ma ni seeda, Ka ne ni kambe ŋwaari hino no ga hin ka ni faaba.

¹⁰Guna Behemot kaŋ ay te ni banda, A ga subu ŋwa sanda haw cine.

¹¹Guna, a gaabo go a kungurso ra. A hino mo go a gunde baso ra.

¹²A ga nga sunfa salle danga sedre* nya no, A tanje kaajey go no.

¹³A biriyey sanda guuru-say garu gomboyaŋ no, A cey mo sanda guuru-bi tafayyaŋ no.

¹⁴Nga no ga ti Irikoy danayey ra ijina wane, Nga kaŋ n'a te n'a no takuba.

¹⁵Daahir, tondi kuukey ga ŋwaari kaa taray a se, Noodin no ganji hamey kulu ga fooru.

¹⁶Lotus* tuuri cire no a ga kani, Kuubu zugu beeri nda farro ra no.

¹⁷Lotus tuurey ga te a se bi, Gooru ra windi bundu no g'a windi.

¹⁸Guna, baa isa na bonday tunandi, nga wo si jijiri. A laakalo ga kani, Baa Urdun* isa haro furo hal a meyo gaa.

¹⁹Boro fo go no kaŋ g'a di waati kaŋ a go ga batu? Wala man boro kaŋ g'a niina fun nda guuru darb'ize?

²⁰Ni ga hin ka Lebiyatan* candi nda darb'ize no? Wala m'a deena naan da korfo?

²¹Ni ga hin ka korfo daŋ a niina ra no? Wala m'a garbey fun ka goti daŋ i gaa?

²²A ga ni ŋwaaray gumo no? A ga sanni baano te ni se, wala?

²³A ga alkawli sambu ni se no? Wala ni g'a di a ma ciya ni bannya no hal abada?

²⁴Ni ga fooru nd'a sanda curayze cine no? Wala mo ni g'a haw zama a ma ciya ni wandiyey se foori hari no?

²⁵Hari ham neerako jama g'a hayci yaŋ te, wala? Wala i g'a fay fatawc'izey game ra?

²⁶Ni ga hin k'a kuuro hay nda harji no? Wala ni g'a boŋo toonandi nda hari-ham diire loloyaŋ?

²⁷Da ni na kambe dake a gaa ce folloŋ, Ni ga fongu nda tangamo, ni si ye k'a filla bo!

²⁸Guna, ni tammahãyaŋo wo yaamo no, Baa a diyaŋo, manti a ga naŋ boro gaa ma yay?