Read Zarma Job 41 Bible Online

Job 41 - Zarma bible

Job 41

¹Fundi kornokoy si no kaŋ g'a zokoti. Mana binde boro kaŋ ga hin ka kay ay jine?

²May no jin k'ay no, hal ay m'a yeti a se? Hay kulu me kaŋ go beene batama cire, kulu ay wane no.

³Ay si dinya a cey sanni mo, Wala a gaabi beero, wala a gaaham himandi hanna.

⁴May no ga hin k'a fooru? May no ga furo a kobtey game ra?

⁵May no ga hin k'a garbey feeri? A hinjey sasarey kulu ga humburandi.

⁶A banda kobto tiŋa mo ga ti a zamuuyaŋ haro, I goono ga lamba care gaa danga i n'i naagu care gaa no.

⁷I ga maan care gaa mo, Hala haw si hin ka furo i game ra.

⁸Kubanteyaŋ no care gaa, I go ga naagu care gaa, hala i si fay.

⁹A tissoyaŋo ga kaari kaa taray, A moy ga hima mo boyaŋ kaari.

¹⁰Danji yulba kaŋ ga di goono ga fatta a meyo ra, Nune hansey mo goono ga sar ka fittaw.

¹¹A niina ra mo dullu go ga fatta, Sanda kusu kaŋ goono ga walay ra cine.

¹²A fulanzama ga danji bi diyandi, Danji beele goono ga fun a meyo ra.

¹³A jinda gaa no gaabi ga goro, Humburkumay go ga sar a jine.

¹⁴A basi gudey go ga kubay care gaa, I go ga kay da gaabi, i si yooje.

¹⁵A bina ga sandi sanda tondi cine. Oho a ga sandi sanda ganda fufuyaŋ tondi cine.

¹⁶Saaya kaŋ a ga nga boŋ sambu, hinkoyey ga humburu, I ga gartu dirim kala i ma fun ngey laakaley ra.

¹⁷Baa boro kaŋ a boŋ da takuba, A si hay kulu hanse, Wala yaaji, wala hangaw, wala lolo.

¹⁸A do guuru-bi wo, sanda subu no, Guuru-say mo sanda tuuri fumbo no.

¹⁹Hangaw si hin ka naŋ a ma zuru, Finga-finga tondiyaŋ ga hima a se subu tikse.

²⁰Goobu kaso mo ga hima a se bari subu, Yaaji kungayaŋ g'a haarandi no.

²¹A gunda, sanda car-cambu kaano yaŋ no, Danga day i na safayaŋ guuru candi no botogo ra.

²²A ga naŋ gooru guusuyaŋo ma walay sanda kusu cine, A ma teeku himandi sanda ji kolbo.

²³A banda fonda go ga nyaale, Danga day hari guusuyaŋey gonda hamni kwaaray no.

²⁴Ndunnya ra a wadde si no, Takahari kaŋ si humburkumay bay no.

²⁵Takahari fo kulu nda nga darza, A g'a guna nda donda-caray, Bonkooni no boŋbeeray izey kulu boŋ.»