Read Zarma Psalms 102 Bible Online

Psalms 102 - Zarma bible

Psalms 102

¹Taabi hanko baytu no, waati kaŋ a gaabo gaze, A go ga nga hẽeno gusam Rabbi jine mo.

²Ya Rabbi, ma maa ay adduwa, Naŋ ay hẽeno ma furo ni do.

³Ma si ni moyduma tugu ay se ay taabi zaaro ra, Ma ni hanga jeeri ay se. Zaaro kaŋ ay ce mo, ma tu ay se da waasi.

⁴Zama ay jirbey go ga ban sanda dullu cine, Ay biriyey mo go ga di sanda danji ra tuuri cine.

⁵Ay bina lakaw sanda subu kaŋ i kar, kaŋ suugu mo, Hal ay dinya k'ay ŋwaaro ŋwa.

⁶Ay durayyaŋ jinda sabbay se, Kala baa ay biriyey naagu ay baso gaa.

⁷Ay ga hima sanda saajo ra bangu farka, Ay ciya sanda fu kurmu ra kuku.

⁸Ay ga te mo-fasiya, Ay ciya mo sanda sasa kaŋ go fu boŋ nga hinne.

⁹Zaari me-a-me ay ibarey goono g'ay foy. Ngey kaŋ yaŋ goono ga donda ay goono ga laaliyaŋ zeyaŋ te d'ay maa.

¹⁰Zama boosu no ay soobay ka ŋwa sanda buuru cine, Ay haŋyaŋ haro mo, ay n'a margu nda mundi.

¹¹Woodin mo, ni dukuro da ni futa sabbay se no. Zama ni n'ay sambu beene, ni ye k'ay furu koyne.

¹²Ay jirbey ga hima sanda tuuri bi kaŋ ga sosoro, Ay lakaw sanda subu cine.

¹³Amma nin wo, ya Rabbi, ni go no hal abada. Ni gaa fonguyaŋo mo ga goro hala zamaney kulu gaa.

¹⁴Ni ga tun, ni ga bakar mo Sihiyona se, Zama a se gomni teeyaŋ waate to, Oho, alwaati jisanta to.

¹⁵Daahir ni tamey goono ga farhã d'a tondey, I ga bakar a laabo se.

¹⁶Woodin se no dumi cindey ga humburu Rabbi maa, Ndunnya bonkooney kulu mo ga humburu ni darza.

¹⁷Zama Rabbi no ka Sihiyona cina, A bangay mo nga darza ra.

¹⁸A maa moori ra gorokoy adduwa se, A mana donda i adduwa mo.

¹⁹I ga woone hantum zamana kaŋ ga kaa se, Hala zamana din borey kaŋ i ga taka mo ma Rabbi sifa.

²⁰Zama a go nga nangu hanna ra ga ganda fonnay, Beene no Rabbi go, a na ndunnya guna,

²¹Zama nga ma maa hawantey durayyaŋ, A ma borey kaŋ yaŋ i na buuyaŋ ciiti dumbu i boŋ taŋ.

²²Zama Adam-izey ma Rabbi maa baaru dede Sihiyona ra, A sifawo mo Urusalima* ra,

²³Dumey da mayrayey mo ga margu nangu folloŋ zama ngey ma may Rabbi se.

²⁴A n'ay gaabo londo wi fonda boŋ, A n'ay jirbey mo dunguriyandi.

²⁵Ay ne: «Ya ay Irikoyo, ma s'ay sambu saaya kaŋ ay go ay jirbey bindo ra. Ni jiirey go no hala zamaney kulu me.

²⁶Za doŋ ni na ganda sinji, Beeney mo ni kambe goyo no.

²⁷I ga halaci, amma ni wo, ni go no duumi. I kulu ga zeen mo danga kwaay cine, Ni g'i barmay mo danga bankaaray cine, I alhaali ga bare mo.

²⁸Amma nin wo, ni si bare, ni jiirey mo sinda me.

²⁹Ni tamey izey mo ga du duumi nangoray, I banda mo ga sinji ni jine.»