Read Zarma Psalms 105 Bible Online

Psalms 105 - Zarma bible

Psalms 105

¹Wa saabu Rabbi se, w'a maa ce. W'a goyey bayrandi dumey game ra.

²Wa baytu te a se, wa sifayaŋ baytu te a se, Wa soobay k'a dambara goyey kulu dede.

³Wa fooma nd'a maa hanna. Rabbi ceecikoy biney ma kaan.

⁴Wa Rabbi nda nga hino ceeci, w'a ceeci duumi,

⁵Ya araŋ, a tamo Ibrahim banda, Ya araŋ Yakuba izey, a wane suubanantey,

⁶Wa fongu nd'a dambara goyey kaŋ a te, D'a alaamey, d'a meyo ciiti sanney mo.

⁷Nga no ga ti Rabbi iri Irikoyo, A ciitey go ndunnya kulu ra.

⁸A fongu nga alkawlo gaa hal abada, Sanno din kaŋ a lordi zamana zambar se.

⁹Alkawlo kaŋ a sambu Ibrahim se, Da zeyaŋo kaŋ a ze d'a Isaka se,

¹⁰A n'a tabbatandi Yakuba se a ma ciya hin sanni, Sanda Israyla se nooya a ma ciya alkawli kaŋ ga duumi,

¹¹A goono ga ne: «Ni se no ay ga Kanaana laabo no, Ni baa tubo no.»

¹²Waato kaŋ i go boro ciraariyaŋ, Oho, ikayna fooyaŋ no, yawyaŋ mo no laabo ra,

¹³I di ka bar-bare kunda ka koy kunda, Koytaray fo ka koy jama fo do koyne.

¹⁴A mana naŋ boro fo kulu m'i kankam. A deeni bonkooniyaŋ gaa i sabbay se.

¹⁵A ne: «Araŋ ma s'ay wane suubanantey ham, Wa si hasaraw te ay annabey se mo.»

¹⁶A na haray candi ka kande laabo gaa, A na ŋwaari kaŋ gaa i ga de kulu ceeri.

¹⁷A na boro fo donton i jine, Kaŋ ga ti Yusufu, bora kaŋ i neera a ma ciya tam.

¹⁸I n'a cey maray da baka*, i n'a daŋ guuru-bi ra.

¹⁹Hala waati kaŋ a sanno to, Rabbi sanno n'a neesi mo.

²⁰Bonkoono donton ka ne i m'a feeri. Sanda dumey dabarikwa nooya, a n'a kaa ka taŋ.

²¹A n'a daŋ a ma ciya nga windo jine boro, Kaŋ g'a mayray harey kulu dabari.

²²Zama a ma bonkoono mayraykoyey haw mate kaŋ nga ga ba, A m'a arkusey dondonandi laakal muraadu.

²³Israyla mo koy Misira ra, Yakuba binde na yawtaray te Ham laabo ra.

²⁴Rabbi naŋ nga borey ma baa gumo, A naŋ i ma bisa ngey yanjekaarey gaabi.

²⁵Rabbi na Misirancey biney bare i ma konna nga borey, I ma hiila te nga tamey se.

²⁶Amma a na nga tamo Musa donton, Da Haruna mo kaŋ a suuban.

²⁷I n'a alaamey cabe Misirancey game ra, A dambara goyey mo Ham laabo ra.

²⁸A na kubay samba; a naŋ nango ma ciya kubay, A borey mana ture a sanno gaa bo.

²⁹A n'i harey ciya kuri, a n'i hari hamey halaci.

³⁰I laabo te balancaw marga zugulayaŋ, Hala baa a bonkooney fu lokotey ra.

³¹A salaŋ, kala hamni bi marga zugulayaŋ go, i kaa, Ganiyaŋ mo go kal i laabo hirrey kulu gaa.

³²A n'i kar da gari, sanda hari himandi, Da danji kaŋ ga di mo i laabo ra.

³³A n'i reyzin* nyaŋey da jeejay* nyaŋey kar ka zeeri, A n'i hirrey boŋ tuurey ceeri-ceeri.

³⁴A salaŋ, kal a go, do kaa, Da sar-ganda mo kaŋ sinda me,

³⁵I n'i laabo ra kobtey kulu ŋwa, I n'i laabo nafa kulu mo ŋwa.

³⁶Rabbi n'i laabo ra hay-jiney kulu kar mo, Kaŋ ga ti i kulu gaabi sintina.

³⁷Gaa no a na Israyla kaa taray, I gonda wura nda nzarfu ngey banda. Londibuuno si no i kunda ra mo, baa afolloŋ.

³⁸Misira farhã waato kaŋ i tun, Zama i humburkumay n'i di.

³⁹Rabbi na beene hirriyaŋ daaru ka te daabiri, Danji mo, zama a ma hananyaŋ no cin haray.

⁴⁰I binde, kaŋ i ŋwaaray, a kande i se darfanda, A na i kungandi nda beene ŋwaari mo.

⁴¹A na tondi daari kortu, kala hari bagu ka fatta, A soobay ka te hari zuru mo laabu koga ra sanda isa ra cine.

⁴²Zama a fongu nga sanni hanna gaa wo kaŋ a ci nga tamo Ibrahim se.

⁴³A na nga borey kaa taray da farhã, A wane suubanantey mo da farhã kuuwayaŋ.

⁴⁴A na dumi cindey laabey no i se, Hal i na dumey din taabi albarka ta.

⁴⁵Zama i m'a hin sanney haggoy, i m'a asariyey gaay mo. Alleluya!