Read Zarma Psalms 106 Bible Online

Psalms 106 - Zarma bible

Psalms 106

¹Alleluya! Wa saabu Rabbi se, zama nga ya booriyankoy no. Zama a baakasinay suujo go no hal abada.

²May no ka bara nda hina a ma Rabbi goy bambatey ci, Wala mo a m'a sifawey kulu bangandi?

³Albarkanteyaŋ no gumo borey kaŋ yaŋ ga cimi ciiti haggoy, Da borey kaŋ yaŋ ga adilitaray te waati kulu mo.

⁴Ya Rabbi, ma fongu ay gaa. Waati kaŋ ni ga gomni te ni borey se, M'ay kunfa nda ni faaba.

⁵Zama ay ma di ni wane suubanantey arzaka, Zama ay ma farhã mo da ni jama wane bine kaani, Ay ma zankam ni wane borey banda.

⁶Iri na zunubi te sanda iri kaayey cine, Iri na taali te, iri na laala goy te.

⁷Iri kaayey mana faham da ni dambara goyey Misira laabo ra, I mana fongu ni baakasinay suuji booba gaa mo. Amma i murte teeko me gaa, kaŋ ga ti Teeku Cira.

⁸Kulu nda yaadin a n'i faaba nga maa sabbay se, Zama a ma nga hin beero bangandi.

⁹A kaseeti Teeku Cira gaa mo, hal a haro sundu. A n'i candi i ma gana hari guusey ra danga day saaji fimbi ra cine.

¹⁰A n'i faaba mo k'i kaa borey kaŋ yaŋ wang'ey kambe ra, A n'i fansa* k'i kaa ngey ibarey kambe ra.

¹¹Haro n'i yanjekaarey daabu, Kaŋ yaŋ ra sinda boro kaŋ cindi.

¹²Waato din gaa no i n'a sanney cimandi, I n'a sifaw baytu te mo.

¹³A mana baa gay kaŋ i dinya a goyey gaa, I si g'a saawarey hangan koyne.

¹⁴I bini gumo saajo ra, i na Irikoy si saajo ra mo.

¹⁵A na i no haya kaŋ i ŋwaaray, Amma a na faabiri samba i se i fundey ra.

¹⁶Waato kaŋ i canse da Musa gata ra, Hala nda Haruna, Rabbi wane hananta,

¹⁷Kala laabo feeri ka Datan gon, A na Abiram jama mo daabu.

¹⁸Danji mo di i jama ra, danji beela na laalakoyey ŋwa.

¹⁹I na handayze te Horeb ra, I sududu tooru soogante se.

²⁰Yaadin cine no i na ngey darza barmay d'a k'a himandi yeeji kaŋ ga subu ŋwa.

²¹I dinya Irikoy, kaŋ ti i Faabakwa, Nga kaŋ na dambara goyey te Misira laabo ra,

²²Da goy kaŋ ga dambarandi Ham laabo ra, Da muraadu yaŋ kaŋ ga humburandi Teeku Cira me gaa.

²³Woodin se no a ne nga g'i halaci, Da manti kaŋ a wane suubananta Musa kay a jine ka te i se kosaray, Zama nga ma Rabbi futa bare, hal a ma s'i halaci.

²⁴Oho, i donda laabu kaana, I mana Rabbi sanno cimandi,

²⁵Amma i soobay ka guunu-guunu ngey bukkey ra, I mana hangan Rabbi sanno se.

²⁶Woodin se no a ze i se ka ne nga g'i zeeri saajo ra,

²⁷Nga m'i banda mo jindaw dumi cindey game ra, Nga m'i say-say laabey ra.

²⁸I te me fo mo koyne da Baal-Peyor ka buukoy se sargayey ŋwa.

²⁹Yaadin cine no i soobay ka Rabbi yanje ceeci nd'a ngey goyey do, Balaaw binde kaa ka furo i game ra.

³⁰Waato din gaa no Fineyas tun ka kay, A na kosaray te, hala balaawo kay.

³¹I na woodin lasaabu a se adilitaray, Hala ka koy zamaney kulu me hal abada.

³²Meriba haro do haray mo i na Rabbi bine tunandi koyne, Hala Musa taabi gumo i sabbay se.

³³Zama i murte Rabbi Biya gaa, Musa binde na nga me fiti nda sanni kaŋ si hagu.

³⁴I mana dumey din halaci, Sanda mate kaŋ cine Rabbi ci i se din,

³⁵Amma ngey da dumi woodin yaŋ diibi care ra, Hal i na dumey din goyey dondon.

³⁶I may mo i toorey se. Haya binde ciya i se hirrimi.

³⁷Oho, hal i na ngey ize arey da ize wayey salle sargay ganjiyaŋ se.

³⁸I na borey kaŋ yaŋ sinda taali kuri mun, Kaŋ ga ti i ize arey d'i ize wayey. I n'i te sargay Kanaana toorey se, Hala laabo ziibi nda kuro.

³⁹Yaadin cine no i ziibi nd'a ngey goyey do, I ciya zina-teeriyaŋ ngey goyey ra.

⁴⁰Woodin se no Rabbi futa koroŋ nga borey gaa, Hal a na nga jama fanta.

⁴¹A n'i nooyandi mo dumi cindey se, I konnakoy mo n'i may.

⁴²I ibarey n'i kankam, i n'i kayna mo ngey kambey cire.

⁴³Sorro boobo no a g'i faaba, Amma i saawarey ra i go ga murte. I tibi mo ngey laalayaŋo ra.

⁴⁴Kulu nda yaadin a goono g'i taabey saal waati kaŋ a maa i hẽeno.

⁴⁵A fongu nga alkawlo kaŋ nga te i se din gaa, A baakasinay suuji beero boŋ mo a jalla i gaa.

⁴⁶A naŋ mo i ma du bakaraw borey kulu kaŋ yaŋ kond'ey tamtaray do.

⁴⁷Ya Rabbi iri Irikoyo, m'iri faaba. M'iri margu, iri ma fun dumi cindey ra, Zama iri ma saabu ni maa hanna se, Iri ma fooma mo ni sifayaŋ ra.

⁴⁸Wa Rabbi, Israyla Irikoyo sifa, Za doŋ-doŋ kaŋ sinda me ka koy hal abada abadin. Jama kulu mo ma ne: "Amin!" Alleluya!