Read Zarma Psalms 107 Bible Online

Psalms 107 - Zarma bible

Psalms 107

¹Wa saabu Rabbi se, zama nga wo booriyankoy no, Zama a baakasinay suujo go no hal abada.

²Rabbi fansantey* ma ci yaadin, Ngey kaŋ a fansa k'i kaa yanjekaari kambe ra.

³A n'i margu, i ma fun laabey kulu ra -- wayna funay da wayna kaŋay, azawa nda dandi kambe.

⁴I te boŋdaray saajo laawaley ra, Naŋ kaŋ boro kulu si no, I mana du kwaara kaŋ ga goro.

⁵I fundey yangala i ra da haray da jaw.

⁶Waato din gaa no i na jinde sambu Rabbi gaa ngey taabey ra, A na i faaba mo k'i kaa i masiibey ra.

⁷A na i jine candi mo fondo kayante ra, Zama i ma koy gallu kaŋ ga goro do.

⁸Wa Rabbi sifa a baakasinay suujo se, D'a dambara goyey sabbay se kaŋ a ga te Adam-izey se.

⁹Zama a ga fundi kaŋ gonda jaw yeesandi, A ga haraykom mo kungandi nda gomni.

¹⁰Boro fooyaŋ go no kaŋ goro kubay da bu biya ra, I go hawante da sisiri da kayna,

¹¹Zama i murte Irikoy sanney gaa, I donda Beeray-Beeri-Koyo saawarey mo.

¹²Woodin se no a na i biney kaynandi nda taabi goy. I kati ka kaŋ, gaako mo si no.

¹³Waato din gaa no i na jinde sambu Rabbi gaa ngey taabey ra, A na i faaba mo k'i kaa i masiibey ra.

¹⁴A n'i kaa kubay da bu biya ra, A n'i bakey* ceeri-ceeri.

¹⁵Wa Rabbi sifa a baakasinay suujo se, D'a dambara goyey sabbay se kaŋ a ga te Adam-izey se,

¹⁶Zama a na guuru-ciray me daabirjey ceeri, A na guuru-bi karangaley dumbu ka pati-pati.

¹⁷Saamey hartayaŋey d'i taaley mo sabbay se no i g'i kankam.

¹⁸I biney na ŋwaari dumi kulu fanta, I maan buuyaŋ meyey gaa.

¹⁹Waato din gaa no i na jinde sambu Rabbi gaa ngey taabey ra, A n'i faaba mo k'i kaa i masiibey ra.

²⁰A na nga sanno samba k'i yayandi, A n'i soolam ka kaa i halaciyaŋey ra.

²¹Wa Rabbi sifa a baakasinay suujo se, D'a dambara goyey sabbay se kaŋ a ga te Adam-izey se.

²²Wa saabuyaŋ sargayyaŋ mo no, W'a goyey fe da farhã baytuyaŋ.

²³Borey kaŋ yaŋ ga zulli ka koy teeko do hiyey ra, Kaŋ yaŋ ga muraadey te hari beerey ra,

²⁴Ngey no ga di Rabbi goy, D'a dambara goyey teeku guusuyaŋey ra.

²⁵Zama a ga lordi ka ne haw kaŋ ga hamay ma tun, Wo kaŋ g'a hari bonday beerey tunandi.

²⁶I ga ziji hala beene, I ga ye ka zumbu guusuyaŋey ra, Borey biney ga jijiri masiiba sabbay se.

²⁷I goono ga teeni, i goono ga langam sanda baji hanko, I ga fay da ngey laakaley parkatak!

²⁸Waato din gaa no i na jinde sambu Rabbi gaa ngey taabey ra, A n'i faaba mo k'i kaa i masiibey ra.

²⁹A na beene hirriyaŋ dangandi, Hala hari bondayey ma kani.

³⁰Saaya din i maa kaani zama nango kani. Yaadin no a kand'ey d'a do-meyo kaŋ i ga ba din ra.

³¹Wa Rabbi sifa a baakasinay suujo se, D'a dambara goyey sabbay se kaŋ a ga te Adam-izey se.

³²W'a beerandi mo jama marga ra, W'a sifa arkusey faada ra.

³³A ga isey bare ka ciya taasi beeri, Hari-moy mo ma koogu ka ciya jaw laabu.

³⁴Laabu albarkanta ga bare ka ciya ciiri batama, A ra gorokoy laala sabbay se.

³⁵A ga taasey boŋ ciya bangu, Laabu kogo mo ma ciya hari-moyaŋ.

³⁶Noodin binde no a ga naŋ harayzey ma goro, Zama i ma gallu cina k'a te nangoray.

³⁷I ma fariyaŋ duma, i ma reyzin* kaliyaŋ tilam, I ma du heemaro din nafa.

³⁸A ga albarka daŋ i se mo hal i ma tonton gumo, A si naŋ mo i almaney ma zabu.

³⁹Koyne i ga kayna ka sumbal kankami nda taabi nda bine saray sabbay se,

⁴⁰A ga donda-caray gusam bonkooney boŋ. A ma naŋ i ma te boŋdaray saajo taasi beerey boŋ, Naŋ kaŋ fondo si no.

⁴¹Amma a ga moori ra goroko sambu nga kayna din ra k'a dake beene, k'a ciya almayaali boobo hal a ma ciya kuru cine.

⁴²Adilantey ga di woodin, i ga farhã mo. Laala kulu mo ga nga me daabu.

⁴³May no gonda laakal? A ma haggoy da muraadu woodin yaŋ, A ma laakal mo da Rabbi baakasinay suujey.