Read Zarma Psalms 111 Bible Online

Psalms 111 - Zarma bible

Psalms 111

¹Alleluya! Ay ga saabu Rabbi se d'ay bina kulu adilantey faada ra, da jama marga ra mo.

²Rabbi goyey ya ibeeriyaŋ no, Ceeciyaŋ hari mo no boro kulu kaŋ ga maa i kaani se.

³A goyo gonda beeray da koytaray darza, A adilitara mo tabbatante no hal abada.

⁴A naŋ i ma fongu nda nga dambara goyey. Rabbi ya gomnikoy no, kaŋ ga to da bakaraw.

⁵A na ŋwaari no borey kaŋ ga humbur'a se, A ga soobay ka fongu nga alkawlo gaa mo hal abada.

⁶A na nga goyo hino cabe nga jama se, Za kaŋ a na dumi cindey tubey no i se.

⁷A kambe goyey ya naanay da cimi ciiti no, A dondonandiyaŋ kulu mo tabbatanteyaŋ no.

⁸I sinji hal abada abadin, A n'i te cimi nda adilitaray ra.

⁹A kande nga jama se fansa, A na nga alkawlo kayandi hal abada. A maa ga hanan, a ga dambarandi mo.

¹⁰Rabbi humburkumay ga ti laakal sintinay. Boro kulu kaŋ g'a lordey goy te, A koy gonda fahamay hanno. Rabbi sifayaŋo go no hal abada.