Read Zarma Psalms 115 Bible Online

Psalms 115 - Zarma bible

Psalms 115

¹Ya Rabbi, manti iri wo bo, manti iri wo bo, Amma i ma ni maa beerandi, Ni baakasinay suujo da ni cimo sabbay se.

²Ifo se no dumi cindey ga ne: «Man no i Irikoyo go binde?»

³To, iri Irikoyo go beene, A te hay kulu kaŋ ga kaan nga se.

⁴I toorey, wura da nzarfu yaŋ no, boro kambe goyyaŋ no.

⁵I gonda meyaŋ, amma i si salaŋ; I gonda moyaŋ, amma i si di;

⁶I gonda hangayaŋ, amma i si maa; I gonda niineyaŋ, amma i si mani;

⁷I gonda kambeyaŋ, amma i si ham; I gonda ceyaŋ, amma i si dira, I si salaŋ mo ngey karrey ra.

⁸I teekoy ga ciya i cine yaŋ, Oho, hala nda boro kulu kaŋ ga de i gaa.

⁹Ya Israyla, ma de Rabbi gaa. Nga no ga ti i gaakasina da i korayo.

¹⁰Ya Haruna kunda, wa de Rabbi gaa. Nga no ga ti i gaakasina da i korayo.

¹¹Ya araŋ kaŋ ga humburu Rabbi, wa de Rabbi gaa. Nga no ga ti i gaakasina da i korayo.

¹²Rabbi fongu iri gaa, a ga iri albarkandi mo. A ga Israyla dumo albarkandi, A ga Haruna kunda mo albarkandi.

¹³Borey kaŋ yaŋ ga humburu Rabbi, A g'i albarkandi, ikayney da ibeerey kulu.

¹⁴Rabbi ma naŋ araŋ ma baa ka tonton, Araŋ d'araŋ izey.

¹⁵Rabbi m'araŋ albarkandi, Nga kaŋ na beene nda ganda te.

¹⁶Beeney ya Rabbi beeney no, Amma a na ganda no Adam-izey se.

¹⁷Buukoy da borey kaŋ yaŋ ga do siw nango ra, I kulu si Rabbi sifa.

¹⁸Amma iri wo, iri ga Rabbi sifa, Za sohõ ka koy hal abada. Alleluya!