Read Zarma Psalms 116 Bible Online

Psalms 116 - Zarma bible

Psalms 116

¹Ay ga ba Rabbi, Zama a maa ay jinda d'ay ŋwaarayyaŋey.

²A na nga hanga jeeri ay se, Woodin se no ay mo g'a ce ay fundo me muudu.

³Buuyaŋ korfey n'ay didiji-didiji, Alaahara gurzugay du ay, Ay na taabi nda bine saray gar.

⁴Saaya din ra no ay na Rabbi ce ka ne: «Ya Rabbi, ay ga ni ŋwaaray, m'ay fundo faaba.»

⁵Rabbi ya gomnikoy no, adilitaraykoy mo no. Oho, iri Irikoyo ya bakarawkoy no.

⁶Rabbi ga haggoy da boŋ-baanay-koyey, Ay wo kayna, a n'ay faaba mo.

⁷Ya ay fundo, ma ye ka kaa ni fulanzama do, Zama Rabbi boriyandi ni se.

⁸Zama ni n'ay fundo faaba buuyaŋ gaa, Ay moy mundi gaa, Ay cey mo tansi gaa.

⁹Ay ga dira Rabbi jine fundikooney laabo ra.

¹⁰Ay cimandi, woodin se no ay salaŋ. Ay ne: «Ay kankam gumo.»

¹¹Ay cahã ka ne: «Borey kulu tangarikomyaŋ no.»

¹²Ifo no ay ga bana Rabbi se a gomney kulu kaŋ a te ay se sabbay se?

¹³To, ay ga faaba haŋ-gaasiya sambu, Ka ce Rabbi maa boŋ,

¹⁴Ay m'ay sartey toonandi Rabbi se. Oho, a jama kulu jine n'ay g'a te.

¹⁵Rabbi diyaŋo gaa a wane hanantey buuyaŋ wo darza hari no.

¹⁶Ya Rabbi, daahir ay ya ni tam no, Ay ya ni tam no, da ni koŋŋa izo mo, Ni n'ay bakey* feeri.

¹⁷Ay ga saabuyaŋ sargay salle ni se, Ay ma ce Rabbi maa boŋ,

¹⁸Ay m'ay sartey toonandi Rabbi se. Oho, a jama kulu jine n'ay g'a te

¹⁹Rabbi windo batamey ra, Ni bindo ra no, ya Urusalima*. Alleluya!